Texts

idānīṃ lokanātharasaṃ prakaṭayannāha śuddha iti // (1) Par.?

sūtaḥ pāradaḥ śuddhaḥ saṃskāritaḥ saṃskārā hyasya pūrvaṃ kathitāḥ bubhukṣitaḥ kṣudhitaḥ kāritaḥ dravyairiti śeṣaḥ sa ca bhāgadvayaparimitaḥ tathā gandhasya dvau bhāgau tatheti grahaṇena gandhakasyāpi śodhanaṃ darśitam // (2) Par.?

tayoriti gandhakapāradayoḥ sūtāccaturguṇeṣvevetyādi sūtāt sūtaparimāṇāt // (3) Par.?

kapardakeṣu varāṭakeṣu kapardakalakṣaṇaṃ ca tantrāntarādavagantavyam // (4) Par.?

tadyathā / (5.1) Par.?

tulanāyāṃ gurutarān pañca gulmān daśa dvijān / (5.2) Par.?

varāṭān sthūlapītāṃśca rasakarmaṇi yojayet / (5.3) Par.?

iti // (5.4) Par.?

bhāgaikaṃ ṭaṅkaṇaṃ dadyāditi ko'rthaḥ pāradaparimāṇādardhabhāgaṃ saubhāgyakṣāraṃ saṃgṛhya gokṣīreṇa saha kalkīkṛtyānenaiva kalkena tān rasagarbhitavarāṭān vimudrayed ityabhiprāyaḥ // (6) Par.?

tathā śaṅkhasya khaṇḍānāmiti śodhitaśaṅkhasya khaṇḍānāṃ śakalānāṃ bhāgā aṣṭau grāhyāḥ // (7) Par.?

pāradasyaikabhāgāpekṣayetyarthaḥ // (8) Par.?

saṃpradāyastu śaṅkhaśakalāni kṣīre saṃśodhya paścāttenaiva kṣīreṇa saha ślakṣṇāni sampiṣya paścādanenaiva kalkena tān varāṭān lepayedityabhiprāyaḥ // (9) Par.?

anye tu śaṅkhaśakalāni varāṭikābhiḥ saha puṭet // (10) Par.?

cūrṇaliptaśarāvayoriti // (11) Par.?

cūrṇaṃ śuktikādisaṃbhavaṃ tacca kaliśabdavācyaṃ tenāliptaśarāvakau kṛtvā tābhyāṃ sampuṭaṃ kārayedityarthaḥ // (12) Par.?

śarāvasampuṭasandhiṣu sāmpradāyikī mudrā kāryeti vyavahāraḥ // (13) Par.?

tadupari ca mṛllepaḥ kārya ityapi vyavahāraḥ // (14) Par.?

gajapuṭeneti // (15) Par.?

yathā gajapuṭavidhānaṃ tathaivātra puṭedityarthaḥ // (16) Par.?

tacca gomayādinā garte kṛtam // (17) Par.?

ekonatriṃśadūṣaṇairiti ekena yadūnaṃ maricānāṃ triṃśattena saha ṣaḍraktikapramāṇaṃ bhakṣayet // (18) Par.?

ghṛtena vātaje dadyādityādi // (19) Par.?

atra vātaje pittaje kaphaje ca atīsārādāvagre vakṣyamāṇā niyamā boddhavyāḥ // (20) Par.?

tasyopari ghṛtānnamiti pūrvaṃ rasaṃ bhakṣayitvā paścāttadupari kavalatrayaṃ ghṛtānnaṃ bhuñjīta ghṛtena yuktamannaṃ ghṛtānnam // (21) Par.?

annam atraudanam // (22) Par.?

mañce khaṭvāyām // (23) Par.?

anupadhānake upadhānaṃ gendukaṃ tena rahite mañce iti śeṣaḥ // (24) Par.?

etena samyaguttānaṃ yathā syāttathā saṃviśedityarthaḥ // (25) Par.?

paścāt pathyāpathyam āha anamlamityādi // (26) Par.?

anamlam amlarasarahitam amlaṃ ca mātuluṅgaprabhṛtikam // (27) Par.?

annaṃ saṃskṛtam annaṃ tena bhaktādikam // (28) Par.?

ghṛtamiti ghṛtayuktam // (29) Par.?

madhuraṃ dadhīti // (30) Par.?

madhuraṃ komalajīvitaṃ yadvā madhurayuktaṃ tattu rasālādi // (31) Par.?

prāyeṇa jāṅgalaṃ māṃsamiti māṃsabhakṣaṇaṃ cātra vihitaṃ bāhulyena jāṅgalaṃ pradhānatamaṃ tadapi ghṛtapācitaṃ kāryam // (32) Par.?

yadyapi jāṅgalavargo'ṣṭavidhaḥ // (33) Par.?

tadyathā jāṅgalā viṣkirāḥ pratudā guheśayāḥ prasahāḥ parṇamṛgā bileśayāḥ grāmyāśceti // (34) Par.?

tathāpyete tu rogāpekṣayā deyāḥ ghṛtapācitamiti tailaniṣedhāt guṇādhikyācca // (35) Par.?

tathāhi / (36.1) Par.?

māṃsaṃ yattailasiddhaṃ tu vīryoṣṇaṃ pittakṛdguru / (36.2) Par.?

laghvagnidīpanaṃ grāhyaṃ ruciṃ dṛṣṭiprasādanam // (36.3) Par.?

anuṣṇavīryaṃ pittaghnaṃ manojñaṃ ghṛtasādhitam / (37.1) Par.?

iti // (37.2) Par.?

ghṛtāniti ghṛtasādhitān athavā sarpiṣā ghṛtena snānaṃ kuryāt koṣṇodakena snānaṃ tu adhaḥkāyasyeti // (38) Par.?

yataḥ / (39.1) Par.?

uṣṇāmbunādhaḥkāyasya pariṣeko balāvahaḥ / (39.2) Par.?

tenaiva tūttamāṅgasya balahṛt keśacakṣuṣām / (39.3) Par.?

iti // (39.4) Par.?

kvacit tailaṃ na gṛhṇīyāditi kvacit kutrāpi tailagrahaṇaṃ na kāryaṃ tena dīpādiṣvapi tailaṃ niṣiddhaṃ syāt // (40) Par.?

atha tyājyamāha bilvamiti // (41) Par.?

bilvaphalaṃ kāravellakaṃ loke karelāśabdavācyam // (42) Par.?

phalamiti // (43) Par.?

vārtākaṃ vṛntākaṃ śapharīṃ kṣudramatsyān ciñcā prasiddhā vyāyāmaṃ śarīrāyāsajananaṃ karma maithunaṃ strīsevā madyādikamiti sugamam // (44) Par.?

tyajedayuktanidrāṃ ceti ayuktanidrā divānidrādikam // (45) Par.?

kakārādiyutaṃ sarvamiti sarvamāhāranimittaṃ kakārapūrvakaṃ śākaphalādikaṃ tyajet // (46) Par.?

site pakṣe śukle pakṣe agnibhṛṣṭam // (47) Par.?

jayācūrṇamiti jayā bhaṅgā barhipakṣabhasmeti barhī mayūraḥ // (48) Par.?

mṛgāṅke mṛgāṅkapoṭṭalike hemagarbhe hemagarbhapoṭṭalike mauktikākhye mauktikākhyapoṭṭalike apareṣvapi pañcaratnapoṭṭalikaprabhṛtiṣu eṣa vidhiḥ prayojya iti // (49) Par.?