Texts

tataḥ samīkṣya śayane sannaṃ śokena pārthivam / (1.1) Par.?

kausalyā putraśokārtā tam uvāca mahīpatim // (1.2) Par.?

rāghavo naraśārdūla viṣam uptvā dvijihvavat / (2.1) Par.?

vicariṣyati kaikeyī nirmukteva hi pannagī // (2.2) Par.?

vivāsya rāmaṃ subhagā labdhakāmā samāhitā / (3.1) Par.?

trāsayiṣyati māṃ bhūyo duṣṭāhir iva veśmani // (3.2) Par.?

atha sma nagare rāmaś caran bhaikṣaṃ gṛhe vaset / (4.1) Par.?

kāmakāro varaṃ dātum api dāsaṃ mamātmajam // (4.2) Par.?

pātayitvā tu kaikeyyā rāmaṃ sthānād yatheṣṭataḥ / (5.1) Par.?

pradiṣṭo rakṣasāṃ bhāgaḥ parvaṇīvāhitāgninā // (5.2) Par.?

gajarājagatir vīro mahābāhur dhanurdharaḥ / (6.1) Par.?

vanam āviśate nūnaṃ sabhāryaḥ sahalakṣmaṇaḥ // (6.2) Par.?

vane tv adṛṣṭaduḥkhānāṃ kaikeyyānumate tvayā / (7.1) Par.?

tyaktānāṃ vanavāsāya kā nv avasthā bhaviṣyati // (7.2) Par.?

te ratnahīnās taruṇāḥ phalakāle vivāsitāḥ / (8.1) Par.?

kathaṃ vatsyanti kṛpaṇāḥ phalamūlaiḥ kṛtāśanāḥ // (8.2) Par.?

apīdānīṃ sa kālaḥ syān mama śokakṣayaḥ śivaḥ / (9.1) Par.?

sabhāryaṃ yat saha bhrātrā paśyeyam iha rāghavam // (9.2) Par.?

śrutvaivopasthitau vīrau kadāyodhyā bhaviṣyati / (10.1) Par.?

yaśasvinī hṛṣṭajanā sūcchritadhvajamālinī // (10.2) Par.?

kadā prekṣya naravyāghrāv araṇyāt punarāgatau / (11.1) Par.?

nandiṣyati purī hṛṣṭā samudra iva parvaṇi // (11.2) Par.?

kadāyodhyāṃ mahābāhuḥ purīṃ vīraḥ pravekṣyati / (12.1) Par.?

puraskṛtya rathe sītāṃ vṛṣabho govadhūm iva // (12.2) Par.?

kadā prāṇisahasrāṇi rājamārge mamātmajau / (13.1) Par.?

lājair avakariṣyanti praviśantāv ariṃdamau // (13.2) Par.?

kadā sumanasaḥ kanyā dvijātīnāṃ phalāni ca / (14.1) Par.?

pradiśantyaḥ purīṃ hṛṣṭāḥ kariṣyanti pradakṣiṇam // (14.2) Par.?

kadā pariṇato buddhyā vayasā cāmaraprabhaḥ / (15.1) Par.?

abhyupaiṣyati dharmajñas trivarṣa iva māṃ lalan // (15.2) Par.?

niḥsaṃśayaṃ mayā manye purā vīra kadaryayā / (16.1) Par.?

pātu kāmeṣu vatseṣu mātṝṇāṃ śātitāḥ stanāḥ // (16.2) Par.?

sāhaṃ gaur iva siṃhena vivatsā vatsalā kṛtā / (17.1) Par.?

kaikeyyā puruṣavyāghra bālavatseva gaur balāt // (17.2) Par.?

na hi tāvad guṇair juṣṭaṃ sarvaśāstraviśāradam / (18.1) Par.?

ekaputrā vinā putram ahaṃ jīvitum utsahe // (18.2) Par.?

na hi me jīvite kiṃcit sāmarthyam iha kalpyate / (19.1) Par.?

apaśyantyāḥ priyaṃ putraṃ mahābāhuṃ mahābalam // (19.2) Par.?

ayaṃ hi māṃ dīpayate samutthitas tanūjaśokaprabhavo hutāśanaḥ / (20.1) Par.?

mahīm imāṃ raśmibhir uttamaprabho yathā nidāghe bhagavān divākaraḥ // (20.2) Par.?