Texts

evam uktas tu bharato niṣādādhipatiṃ guham / (1.1) Par.?

pratyuvāca mahāprājño vākyaṃ hetvarthasaṃhitam // (1.2) Par.?

ūrjitaḥ khalu te kāmaḥ kṛto mama guroḥ sakhe / (2.1) Par.?

yo me tvam īdṛśīṃ senām eko 'bhyarcitum icchasi // (2.2) Par.?

ity uktvā tu mahātejā guhaṃ vacanam uttamam / (3.1) Par.?

abravīd bharataḥ śrīmān niṣādādhipatiṃ punaḥ // (3.2) Par.?

katareṇa gamiṣyāmi bharadvājāśramaṃ guha / (4.1) Par.?

gahano 'yaṃ bhṛśaṃ deśo gaṅgānūpo duratyayaḥ // (4.2) Par.?

tasya tadvacanaṃ śrutvā rājaputrasya dhīmataḥ / (5.1) Par.?

abravīt prāñjalir vākyaṃ guho gahanagocaraḥ // (5.2) Par.?

dāśās tv anugamiṣyanti dhanvinaḥ susamāhitāḥ / (6.1) Par.?

ahaṃ cānugamiṣyāmi rājaputra mahāyaśaḥ // (6.2) Par.?

kaccin na duṣṭo vrajasi rāmasyākliṣṭakarmaṇaḥ / (7.1) Par.?

iyaṃ te mahatī senā śaṅkāṃ janayatīva me // (7.2) Par.?

tam evam abhibhāṣantam ākāśa iva nirmalaḥ / (8.1) Par.?

bharataḥ ślakṣṇayā vācā guhaṃ vacanam abravīt // (8.2) Par.?

mā bhūt sa kālo yat kaṣṭaṃ na māṃ śaṅkitum arhasi / (9.1) Par.?

rāghavaḥ sa hi me bhrātā jyeṣṭhaḥ pitṛsamo mama // (9.2) Par.?

taṃ nivartayituṃ yāmi kākutsthaṃ vanavāsinam / (10.1) Par.?

buddhir anyā na te kāryā guha satyaṃ bravīmi te // (10.2) Par.?

sa tu saṃhṛṣṭavadanaḥ śrutvā bharatabhāṣitam / (11.1) Par.?

punar evābravīd vākyaṃ bharataṃ prati harṣitaḥ // (11.2) Par.?

dhanyas tvaṃ na tvayā tulyaṃ paśyāmi jagatītale / (12.1) Par.?

ayatnād āgataṃ rājyaṃ yas tvaṃ tyaktum ihecchasi // (12.2) Par.?

śāśvatī khalu te kīrtir lokān anucariṣyati / (13.1) Par.?

yas tvaṃ kṛcchragataṃ rāmaṃ pratyānayitum icchasi // (13.2) Par.?

evaṃ sambhāṣamāṇasya guhasya bharataṃ tadā / (14.1) Par.?

babhau naṣṭaprabhaḥ sūryo rajanī cābhyavartata // (14.2) Par.?

saṃniveśya sa tāṃ senāṃ guhena paritoṣitaḥ / (15.1) Par.?

śatrughnena saha śrīmāñ śayanaṃ punar āgamat // (15.2) Par.?

rāmacintāmayaḥ śoko bharatasya mahātmanaḥ / (16.1) Par.?

upasthito hy anarhasya dharmaprekṣasya tādṛśaḥ // (16.2) Par.?

antardāhena dahanaḥ saṃtāpayati rāghavam / (17.1) Par.?

vanadāhābhisaṃtaptaṃ gūḍho 'gnir iva pādapam // (17.2) Par.?

prasrutaḥ sarvagātrebhyaḥ svedaḥ śokāgnisambhavaḥ / (18.1) Par.?

yathā sūryāṃśusaṃtapto himavān prasruto himam // (18.2) Par.?

dhyānanirdaraśailena viniḥśvasitadhātunā / (19.1) Par.?

dainyapādapasaṃghena śokāyāsādhiśṛṅgiṇā // (19.2) Par.?

pramohānantasattvena saṃtāpauṣadhiveṇunā / (20.1) Par.?

ākrānto duḥkhaśailena mahatā kaikayīsutaḥ // (20.2) Par.?

guhena sārdhaṃ bharataḥ samāgato mahānubhāvaḥ sajanaḥ samāhitaḥ / (21.1) Par.?

sudurmanās taṃ bharataṃ tadā punar guhaḥ samāśvāsayad agrajaṃ prati // (21.2) Par.?