Texts

atha śailād viniṣkramya maithilīṃ kosaleśvaraḥ / (1.1) Par.?

adarśayac chubhajalāṃ ramyāṃ mandākinīṃ nadīm // (1.2) Par.?

abravīc ca varārohāṃ cārucandranibhānanām / (2.1) Par.?

videharājasya sutāṃ rāmo rājīvalocanaḥ // (2.2) Par.?

vicitrapulināṃ ramyāṃ haṃsasārasasevitām / (3.1) Par.?

kusumair upasaṃpannāṃ paśya mandākinīṃ nadīm // (3.2) Par.?

nānāvidhais tīraruhair vṛtāṃ puṣpaphaladrumaiḥ / (4.1) Par.?

rājantīṃ rājarājasya nalinīm iva sarvataḥ // (4.2) Par.?

mṛgayūthanipītāni kaluṣāmbhāṃsi sāmpratam / (5.1) Par.?

tīrthāni ramaṇīyāni ratiṃ saṃjanayanti me // (5.2) Par.?

jaṭājinadharāḥ kāle valkalottaravāsasaḥ / (6.1) Par.?

ṛṣayas tv avagāhante nadīṃ mandākinīṃ priye // (6.2) Par.?

ādityam upatiṣṭhante niyamād ūrdhvabāhavaḥ / (7.1) Par.?

ete 'pare viśālākṣi munayaḥ saṃśitavratāḥ // (7.2) Par.?

mārutoddhūtaśikharaiḥ pranṛtta iva parvataḥ / (8.1) Par.?

pādapaiḥ pattrapuṣpāṇi sṛjadbhir abhito nadīm // (8.2) Par.?

kaccin maṇinikāśodāṃ kaccit pulinaśālinīm / (9.1) Par.?

kaccit siddhajanākīrṇāṃ paśya mandākinīṃ nadīm // (9.2) Par.?

nirdhūtān vāyunā paśya vitatān puṣpasaṃcayān / (10.1) Par.?

poplūyamānān aparān paśya tvaṃ jalamadhyagān // (10.2) Par.?

tāṃś cātivalguvacaso rathāṅgāhvayanā dvijāḥ / (11.1) Par.?

adhirohanti kalyāṇi niṣkūjantaḥ śubhā giraḥ // (11.2) Par.?

darśanaṃ citrakūṭasya mandākinyāś ca śobhane / (12.1) Par.?

adhikaṃ puravāsāc ca manye ca tava darśanāt // (12.2) Par.?

vidhūtakaluṣaiḥ siddhais tapodamaśamānvitaiḥ / (13.1) Par.?

nityavikṣobhitajalāṃ vigāhasva mayā saha // (13.2) Par.?

sakhīvac ca vigāhasva sīte mandākinīm imām / (14.1) Par.?

kamalāny avamajjantī puṣkarāṇi ca bhāmini // (14.2) Par.?

tvaṃ paurajanavad vyālān ayodhyām iva parvatam / (15.1) Par.?

manyasva vanite nityaṃ sarayūvad imāṃ nadīm // (15.2) Par.?

lakṣmaṇaś caiva dharmātmā mannideśe vyavasthitaḥ / (16.1) Par.?

tvaṃ cānukūlā vaidehi prītiṃ janayatho mama // (16.2) Par.?

upaspṛśaṃs triṣavaṇaṃ madhumūlaphalāśanaḥ / (17.1) Par.?

nāyodhyāyai na rājyāya spṛhaye 'dya tvayā saha // (17.2) Par.?

imāṃ hi ramyāṃ gajayūthalolitāṃ nipītatoyāṃ gajasiṃhavānaraiḥ / (18.1) Par.?

supuṣpitaiḥ puṣpadharair alaṃkṛtāṃ na so 'sti yaḥ syān na gatakramaḥ sukhī // (18.2) Par.?

itīva rāmo bahusaṃgataṃ vacaḥ priyāsahāyaḥ saritaṃ prati bruvan / (19.1) Par.?

cacāra ramyaṃ nayanāñjanaprabhaṃ sa citrakūṭaṃ raghuvaṃśavardhanaḥ // (19.2) Par.?