Texts

āśvāsayantaṃ bharataṃ jābālir brāhmaṇottamaḥ / (1.1) Par.?

uvāca rāmaṃ dharmajñaṃ dharmāpetam idaṃ vacaḥ // (1.2) Par.?

sādhu rāghava mā bhūt te buddhir evaṃ nirarthakā / (2.1) Par.?

prākṛtasya narasyeva āryabuddhes tapasvinaḥ // (2.2) Par.?

kaḥ kasya puruṣo bandhuḥ kim āpyaṃ kasya kenacit / (3.1) Par.?

yad eko jāyate jantur eka eva vinaśyati // (3.2) Par.?

tasmān mātā pitā ceti rāma sajjeta yo naraḥ / (4.1) Par.?

unmatta iva sa jñeyo nāsti kāciddhi kasyacit // (4.2) Par.?

yathā grāmāntaraṃ gacchan naraḥ kaścit kvacid vaset / (5.1) Par.?

utsṛjya ca tam āvāsaṃ pratiṣṭhetāpare 'hani // (5.2) Par.?

evam eva manuṣyāṇāṃ pitā mātā gṛhaṃ vasu / (6.1) Par.?

āvāsamātraṃ kākutstha sajjante nātra sajjanāḥ // (6.2) Par.?

pitryaṃ rājyaṃ samutsṛjya sa nārhati narottama / (7.1) Par.?

āsthātuṃ kāpathaṃ duḥkhaṃ viṣamaṃ bahukaṇṭakam // (7.2) Par.?

samṛddhāyām ayodhyāyām ātmānam abhiṣecaya / (8.1) Par.?

ekaveṇīdharā hi tvāṃ nagarī sampratīkṣate // (8.2) Par.?

rājabhogān anubhavan mahārhān pārthivātmaja / (9.1) Par.?

vihara tvam ayodhyāyāṃ yathā śakras triviṣṭape // (9.2) Par.?

na te kaścid daśaratas tvaṃ ca tasya na kaścana / (10.1) Par.?

anyo rājā tvam anyaś ca tasmāt kuru yad ucyate // (10.2) Par.?

gataḥ sa nṛpatis tatra gantavyaṃ yatra tena vai / (11.1) Par.?

pravṛttir eṣā martyānāṃ tvaṃ tu mithyā vihanyase // (11.2) Par.?

arthadharmaparā ye ye tāṃs tāñ śocāmi netarān / (12.1) Par.?

te hi duḥkham iha prāpya vināśaṃ pretya bhejire // (12.2) Par.?

aṣṭakāpitṛdaivatyam ity ayaṃ prasṛto janaḥ / (13.1) Par.?

annasyopadravaṃ paśya mṛto hi kim aśiṣyati // (13.2) Par.?

yadi bhuktam ihānyena deham anyasya gacchati / (14.1) Par.?

dadyāt pravasataḥ śrāddhaṃ na tat pathy aśanaṃ bhavet // (14.2) Par.?

dānasaṃvananā hy ete granthā medhāvibhiḥ kṛtāḥ / (15.1) Par.?

yajasva dehi dīkṣasva tapas tapyasva saṃtyaja // (15.2) Par.?

sa nāsti param ity eva kuru buddhiṃ mahāmate / (16.1) Par.?

pratyakṣaṃ yat tad ātiṣṭha parokṣaṃ pṛṣṭhataḥ kuru // (16.2) Par.?

satāṃ buddhiṃ puraskṛtya sarvalokanidarśinīm / (17.1) Par.?

rājyaṃ tvaṃ pratigṛhṇīṣva bharatena prasāditaḥ // (17.2) Par.?