Texts

athāto grahotpattimadhyāyaṃ vyākhyāsyāmaḥ // (1) Par.?

yathovāca bhagavān dhanvantariḥ // (2) Par.?

nava skandādayaḥ proktā bālānāṃ ya ime grahāḥ / (3.1) Par.?

śrīmanto divyavapuṣo nārīpuruṣavigrahāḥ // (3.2) Par.?

ete guhasya rakṣārthaṃ kṛttikomāgniśūlibhiḥ / (4.1) Par.?

sṛṣṭāḥ śaravaṇasthasya rakṣitasyātmatejasā // (4.2) Par.?

strīvigrahā grahā ye tu nānārūpā mayeritāḥ / (5.1) Par.?

gaṅgomākṛttikānāṃ te bhāgā rājasatāmasāḥ // (5.2) Par.?

naigameṣastu pārvatyā sṛṣṭo meṣānano grahaḥ / (6.1) Par.?

kumāradhārī devasya guhasyātmasamaḥ sakhā // (6.2) Par.?

skandāpasmārasaṃjño yaḥ so 'gnināgnisamadyutiḥ / (7.1) Par.?

sa ca skandasakhā nāma viśākha iti cocyate // (7.2) Par.?

skandaḥ sṛṣṭo bhagavatā devena tripurāriṇā / (8.1) Par.?

bibharti cāparāṃ saṃjñāṃ kumāra iti sa grahaḥ // (8.2) Par.?

bālalīlādharo yo 'yaṃ devo rudrāgnisaṃbhavaḥ / (9.1) Par.?

mithyācāreṣu bhagavān svayaṃ naiṣa pravartate // (9.2) Par.?

kumāraḥ skandasāmānyādatra kecidapaṇḍitāḥ / (10.1) Par.?

gṛhṇātītyalpavijñānā bruvate dehacintakāḥ // (10.2) Par.?

tato bhagavati skande surasenāpatau kṛte / (11.1) Par.?

upatasthurgrahāḥ sarve dīptaśaktidharaṃ guham // (11.2) Par.?

ūcuḥ prāñjalayaścainaṃ vṛttiṃ naḥ saṃvidhatsva vai / (12.1) Par.?

teṣāmarthe tataḥ skandaḥ śivaṃ devamacodayat // (12.2) Par.?

tato grahāṃstānuvāca bhagavān bhaganetrahṛt / (13.1) Par.?

tiryagyoniṃ mānuṣaṃ ca tritayaṃ jagat // (13.2) Par.?

parasparopakāreṇa vartate dhāryate 'pi ca / (14.1) Par.?

devā manuṣyān prīṇanti tairyagyonīṃstathaiva ca // (14.2) Par.?

vartamānair yathākālaṃ śītavarṣoṣṇamārutaiḥ / (15.1) Par.?

ijyāñjalinamaskārajapahomavratādibhiḥ // (15.2) Par.?

narāḥ samyak prayuktaiśca prīṇanti tridiveśvarān / (16.1) Par.?

bhāgadheyaṃ vibhaktaṃ ca śeṣaṃ kiṃcin na vidyate // (16.2) Par.?

tadyuṣmākaṃ śubhā vṛttirbāleṣveva bhaviṣyati / (17.1) Par.?

kuleṣu yeṣu nejyante devāḥ pitara eva ca // (17.2) Par.?

brāhmaṇāḥ sādhavaścaiva guravo 'tithayastathā / (18.1) Par.?

nivṛttācāraśauceṣu parapākopajīviṣu // (18.2) Par.?

utsannabalibhikṣeṣu bhinnakāṃsyopabhojiṣu / (19.1) Par.?

gṛheṣu teṣu ye bālāstān gṛhṇīdhvamaśaṅkitāḥ // (19.2) Par.?

tatra vo vipulā vṛttiḥ pūjā caiva bhaviṣyati / (20.1) Par.?

evaṃ grahāḥ samutpannā bālān gṛhṇanti cāpyataḥ // (20.2) Par.?

grahopasṛṣṭā bālāstu duścikitsyatamā matāḥ / (21.1) Par.?

vaikalyaṃ maraṇaṃ cāpi dhruvaṃ skandagrahe matam // (21.2) Par.?

skandagraho 'tyugratamaḥ sarveṣveva yataḥ smṛtaḥ / (22.1) Par.?

anyo vā sarvarūpastu na sādhyo graha ucyate // (22.2) Par.?