Texts

śrīmārkaṇḍeya uvāca / (1.1) Par.?

tato gacchettu rājendra karoḍīśvaram uttamam / (1.2) Par.?

yatra vai nihatāstāta dānavāḥ sapadānugāḥ // (1.3) Par.?

indrādidevaiḥ saṃhṛṣṭaiḥ satataṃ jayabuddhibhiḥ / (2.1) Par.?

teṣāṃ ye putrapautrāśca pūrvavairam anusmaram // (2.2) Par.?

kruddhairdevasamūhaiśca dānavā nihatā raṇe / (3.1) Par.?

teṣāṃ śirāṃsi saṃgṛhya sarve devāḥ savāsavāḥ // (3.2) Par.?

nikṣipya narmadātoye bandhubhāvam anusmaram / (4.1) Par.?

tatra snātvā surāḥ sarve sthāpayitvā umāpatim // (4.2) Par.?

indreṇa sahitāḥ sarve 'pūjayaṃllokasiddhaye / (5.1) Par.?

hṛṣṭacittāḥ surāḥ sarve jagmurākāśamaṇḍalam // (5.2) Par.?

dānavānāṃ mahābhāga sūditā koṭiruttamā / (6.1) Par.?

tadā prabhṛti tattīrthaṃ karoḍīti mahītale // (6.2) Par.?

vikhyātaṃ tu tadā loke pāpaghnaṃ pāṇḍunandana / (7.1) Par.?

aṣṭamyāṃ ca caturdaśyām ubhau pakṣau ca bhaktitaḥ / (7.2) Par.?

upoṣya śūlinaścāgre rātrau kurvīta jāgaram // (7.3) Par.?

satkathāpāṭhasaṃyukto vedādhyayanasaṃyutaḥ / (8.1) Par.?

prabhāte vimale prāpte pūjayet tridaśeśvaram // (8.2) Par.?

pañcāmṛtena saṃsnāpya śrīkhaṇḍena ca guṇṭhayet / (9.1) Par.?

śastaiḥ pallavapuṣpaiśca pūjayettu prayatnataḥ // (9.2) Par.?

bahurūpaṃ japanmantraṃ dakṣiṇāśāṃ vyavasthitaḥ / (10.1) Par.?

yathoktena vidhānena nābhimātre jale kṣipet // (10.2) Par.?

tilāñjaliṃ tu pretāya dakṣiṇāśām upasthitaḥ / (11.1) Par.?

śrāddhaṃ tatraiva viprāya kārayed vijitendriyaḥ // (11.2) Par.?

viṣamairagrajātaiśca vedābhyasanatatparaiḥ / (12.1) Par.?

gohiraṇyena sampūjya tāmbūlairbhojanaistathā // (12.2) Par.?

bhūṣaṇaiḥ pādukābhiśca brāhmaṇānpāṇḍunandana / (13.1) Par.?

bhavetkoṭiguṇaṃ tasya nātra kāryā vicāraṇā // (13.2) Par.?

tasmiṃs tīrthe tu yaḥ kaścit tyajed dehaṃ vidhānataḥ / (14.1) Par.?

tasya bhavati yatpuṇyaṃ tacchṛṇuṣva narādhipa // (14.2) Par.?

yāvadasthīni tiṣṭhanti martyasya narmadājale / (15.1) Par.?

tāvadvasati dharmātmā śivaloke sudurlabhe // (15.2) Par.?

tataḥ kālāccyutastasmādiha mānuṣatāṃ gataḥ / (16.1) Par.?

koṭidhanapatiḥ śrīmāñjāyate rājapūjitaḥ // (16.2) Par.?

sarvadharmasamāyukto medhāvī bījaputrakaḥ / (17.1) Par.?

vikhyāto vasudhāpṛṣṭhe dīrghāyurmānavo bhavet // (17.2) Par.?

punaḥ smarati tattīrthaṃ tatra gatvā nṛpottama / (18.1) Par.?

karoḍeśvaramabhyarcya prāpnoti paramāṃ gatim // (18.2) Par.?

indracandrayamair rudrairādityairvasubhistathā / (19.1) Par.?

viśvedevaistathā sarvaiḥ sthāpitastridaśeśvaraḥ // (19.2) Par.?

revāyā uttare kūle lokānāṃ hitakāmyayā / (20.1) Par.?

mānavo bhaktisaṃyuktaḥ prāsādaṃ kārayettu yaḥ // (20.2) Par.?

tasmiṃstīrthe naraśreṣṭha sadgatiṃ samavāpnuyāt / (21.1) Par.?

nyāyopāttadhanenaiva dārupāṣāṇakeṣṭakaiḥ // (21.2) Par.?

brāhmaṇaḥ kṣatriyairvaiśyaiḥ śūdraiḥ strībhiśca śaktitaḥ / (22.1) Par.?

te 'pi yānti narā loke śāṃkare surapūjite // (22.2) Par.?

yaḥ śṛṇoti sadā bhaktyā māhātmyaṃ tīrthajaṃ nṛpa / (23.1) Par.?

tasya pāpaṃ praṇaśyeta ṣaṇmāsābhyantaraṃ ca yat // (23.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe karoḍīśvaratīrthamāhātmyavarṇanaṃ nāma dviṣaṣṭitamo 'dhyāyaḥ // (24.1) Par.?