Texts

atha triṣv āśrameṣu pakvakaṣāyaḥ prājāpatyām iṣṭiṃ kṛtvā sarvavedasaṃ dakṣiṇāṃ dattvā pravrajyāśramī syāt // (1.1) Par.?

ātmanyagnīn āropya bhikṣārthaṃ grāmam iyāt // (2.1) Par.?

saptāgārikaṃ bhaikṣam ācaret // (3.1) Par.?

alābhe na vyatheta // (4.1) Par.?

na bhikṣukaṃ bhikṣeta // (5.1) Par.?

bhuktavati jane atīte pātrasaṃpāte bhaikṣam ādadyāt // (6.1) Par.?

mṛnmaye dārupātre 'lābupātre vā // (7.1) Par.?

teṣāṃ ca tasyādbhiḥ śuddhiḥ syāt // (8.1) Par.?

abhipūjitalābhād udvijeta // (9.1) Par.?

śūnyāgāraniketanaḥ syāt // (10.1) Par.?

vṛkṣamūlaniketano vā // (11.1) Par.?

na grāme dvitīyāṃ rātrim āvaset // (12.1) Par.?

kaupīnācchādanamātram eva vasanam ādadyāt // (13.1) Par.?

dṛṣṭipūtaṃ nyaset pādam // (14.1) Par.?

vastrapūtaṃ jalam ādadyāt // (15.1) Par.?

satyapūtaṃ vadet // (16.1) Par.?

manaḥpūtam ācaret // (17.1) Par.?

maraṇaṃ nābhikāmayeta jīvitaṃ ca // (18.1) Par.?

ativādāṃs titikṣeta // (19.1) Par.?

na kaṃcanāvamanyeta // (20.1) Par.?

nirāśīḥ syāt // (21.1) Par.?

nirnamaskāraḥ // (22.1) Par.?

vāsyaikaṃ takṣato bāhuṃ candanenaikam ukṣataḥ / (23.1) Par.?

nākalyāṇaṃ na kalyāṇaṃ tayor api ca cintayet // (23.2) Par.?

prāṇāyāmadhāraṇādhyānanityaḥ syāt // (24.1) Par.?

saṃsārasyānityatāṃ paśyet // (25.1) Par.?

śarīrasyāśucibhāvam // (26.1) Par.?

jarayā rūpaviparyayam // (27.1) Par.?

śārīramānasāgantukavyādhibhiś copatāpam // (28.1) Par.?

sahajaiśca // (29.1) Par.?

nityāndhakāre garbhe vasatim // (30.1) Par.?

mūtrapurīṣamadhye ca // (31.1) Par.?

tatra ca śītoṣṇaduḥkhānubhavanam // (32.1) Par.?

janmasamaye yonisaṃkaṭanirgamanāt mahadduḥkhānubhavanam // (33.1) Par.?

bālye mohaṃ guruparavaśyatām // (34.1) Par.?

adhyayanād anekakleśam // (35.1) Par.?

yauvane ca viṣayāprāptāv amārgeṇa tadavāptau viṣayasevanān narake patanam // (36.1) Par.?

apriyair vasatiṃ priyaiśca viprayogam // (37.1) Par.?

narake ca sumahadduḥkham // (38.1) Par.?

saṃsārasaṃsṛtau tiryagyoniṣu ca // (39.1) Par.?

evam asmin satatayāyini saṃsāre na kiṃcit sukham // (40.1) Par.?

yad api kiṃcit duḥkhābhāvāpekṣayā sukhasaṃjñaṃ tad apyanityam // (41.1) Par.?

tatsevāśaktāv alābhe vā mahadduḥkham // (42.1) Par.?

śarīraṃ cedaṃ saptadhātukaṃ paśyet // (43.1) Par.?

vasārudhiramāṃsamedo'sthimajjāśukrātmakam // (44.1) Par.?

carmāvanaddham // (45.1) Par.?

durgandhi ca // (46.1) Par.?

malāyatanam // (47.1) Par.?

sukhaśatair api vṛtaṃ vikāri // (48.1) Par.?

prayatnād dhṛtam api vināśi // (49.1) Par.?

kāmakrodhalobhamohamadamātsaryasthānam // (50.1) Par.?

pṛthivyaptejovāyvākāśātmakam // (51.1) Par.?

asthisirādhamanīsnāyuyutam // (52.1) Par.?

rajasvalam // (53.1) Par.?

ṣaṭtvacam // (54.1) Par.?

asthnāṃ tribhiḥ śataiḥ ṣaṣṭyadhikair dhāryamāṇam // (55.1) Par.?

teṣāṃ vibhāgaḥ // (56.1) Par.?

sūkṣmaiḥ saha catuḥṣaṣṭir daśanāḥ // (57.1) Par.?

viṃśatir nakhāḥ // (58.1) Par.?

pāṇipādaśalākāśca // (59.1) Par.?

ṣaṣṭir aṅgulīnāṃ parvāṇi // (60.1) Par.?

dve pārṣṇyoḥ // (61.1) Par.?

catuṣṭayaṃ gulpheṣu // (62.1) Par.?

catvāryaratnyoḥ // (63.1) Par.?

catvāri jaṅghayoḥ // (64.1) Par.?

dve dve jānukapolayoḥ // (65.1) Par.?

ūrvaṃsayoḥ // (66.1) Par.?

akṣatālūṣakaśroṇiphalakeṣu // (67.1) Par.?

bhagāsthyekam // (68.1) Par.?

pṛṣṭhāsthi pañcacatvāriṃśadbhāgam // (69.1) Par.?

pañcadaśāsthīni grīvā // (70.1) Par.?

jatrvekam // (71.1) Par.?

tathā hanuḥ // (72.1) Par.?

tanmūle ca dve // (73.1) Par.?

dve lalāṭākṣigaṇḍe // (74.1) Par.?

nāsā ghanāsthikā // (75.1) Par.?

arbudaiḥ sthālakaiśca sārdhaṃ dvāsaptatiḥ pārśvakāḥ // (76.1) Par.?

uraḥ saptadaśa // (77.1) Par.?

dvau śaṅkhakau // (78.1) Par.?

catvāri kapālāni śirasaśceti // (79.1) Par.?

śarīre 'smin sapta sirāśatāni // (80.1) Par.?

nava snāyuśatāni // (81.1) Par.?

dhamanīśate dve // (82.1) Par.?

pañca peśīśatāni // (83.1) Par.?

kṣudradhamanīnām ekonatriṃśallakṣāṇi navaśatāni ṣaṭpañcāśaddhamanyaḥ // (84.1) Par.?

lakṣatrayaṃ śmaśrukeśakūpānām // (85.1) Par.?

saptottaraṃ marmaśatam // (86.1) Par.?

saṃdhiśate dve // (87.1) Par.?

catuṣpañcāśadromakoṭyaḥ saptaṣaṣṭiśca lakṣāṇi // (88.1) Par.?

nābhir ojo gudaṃ śukraṃ śoṇitaṃ śaṅkhakau mūrdhā kaṇṭho hṛdayaṃ ceti prāṇāyatanāṇi // (89.1) Par.?

bāhudvayaṃ jaṅghādvayaṃ madhyaṃ śīrṣam iti ṣaḍaṅgāni // (90.1) Par.?

vasā vapā avahananaṃ nābhiḥ klomā yakṛtplīhā kṣudrāntraṃ vṛkkakau bastiḥ purīṣādhānaṃ āmāśayaḥ hṛdayaṃ sthūlāntraṃ gudam udaraṃ gudakoṣṭham // (91.1) Par.?

kanīnike akṣikūṭe śaṣkulī karṇau karṇapattrakau gaṇḍau bhruvau śaṅkhau dantaveṣṭau oṣṭhau kakundare vaṅkṣaṇau vṛṣaṇau vṛkkau śleṣmasaṃghātikau stanau upajihvā sphicau bāhū jaṅghe ūrū piṇḍike tālūdaraṃ bastiśīrṣau cibukaṃ galaśuṇḍike avaṭuścetyasmin śarīre sthānāni // (92.1) Par.?

śabdasparśarūparasagandhāśca viṣayāḥ // (93.1) Par.?

nāsikālocanatvagjihvāśrotram iti buddhīndriyāṇi // (94.1) Par.?

hastau pādau pāyūpasthaṃ jihveti karmendriyāṇi // (95.1) Par.?

mano buddhir ātmā cāvyaktam itīndriyātītāḥ // (96.1) Par.?

idaṃ śarīraṃ vasudhe kṣetram ityabhidhīyate / (97.1) Par.?

etad yo vetti taṃ prāhuḥ kṣetrajñam iti tadvidaḥ // (97.2) Par.?

kṣetrajñam api māṃ viddhi sarvakṣetreṣu bhāvini / (98.1) Par.?

kṣetrakṣetrajñavijñānaṃ jñeyaṃ nityaṃ mumukṣuṇā // (98.2) Par.?