Texts

baleḥ putraśataṃ tvāsīnmahābalaparākramam / (1.1) Par.?

teṣāṃ pradhāno dyutimān bāṇo nāma mahābalaḥ // (1.2) Par.?

so 'tīva śaṅkare bhakto rājā rājyamapālayat / (2.1) Par.?

trailokyaṃ vaśamānīya bādhayāmāsa vāsavam // (2.2) Par.?

tataḥ śakrādayo devā gatvocuḥ kṛttivāsasam / (3.1) Par.?

tvadīyo bādhate hyasmān bāṇo nāma mahāsuraḥ // (3.2) Par.?

vyāhṛto daivataiḥ sarvairdevadevo maheśvaraḥ / (4.1) Par.?

dadāha bāṇasya puraṃ śareṇaikena līlayā // (4.2) Par.?

dahyamāne pure tasmin bāṇo rudraṃ triśūlinam / (5.1) Par.?

yayau śaraṇamīśānaṃ gopatiṃ nīlalohitam // (5.2) Par.?

mūrdhanyādhāya talliṅgaṃ śāṃbhavaṃ bhītavarjitaḥ / (6.1) Par.?

nirgatya tu purāt tasmāt tuṣṭāva parameśvaram // (6.2) Par.?

saṃstuto bhagavānīśaḥ śaṅkaro nīlalohitaḥ / (7.1) Par.?

gāṇapatyena bāṇaṃ taṃ yojayāmāsa bhāvataḥ // (7.2) Par.?

athābhavan danoḥ putrāstārādyā hyatibhīṣaṇāḥ / (8.1) Par.?

tārastathā śambaraśca kapilaḥ śaṅkarastathā / (8.2) Par.?

svarbhānurvṛṣaparvā ca prādhānyena prakīrtitāḥ // (8.3) Par.?

surasāyāḥ sahasraṃ tu sarpāṇāmabhavad dvijāḥ / (9.1) Par.?

anekaśirasāṃ tadvat khecarāṇāṃ mahātmanām // (9.2) Par.?

ariṣṭā janayāmāsa gandharvāṇāṃ sahasrakam / (10.1) Par.?

anantādyā mahānāgāḥ kādraveyāḥ prakīrtitāḥ // (10.2) Par.?

tāmrā ca janayāmāsa ṣaṭ kanyā dvijapuṅgavāḥ / (11.1) Par.?

śukīṃ śyenīṃ ca bhāsīṃ ca sugrīvāṃ gṛdhrikāṃ śucim // (11.2) Par.?

gāstathā janayāmāsa surabhirmahiṣīstathā / (12.1) Par.?

irā vṛkṣalatāvallīstṛṇajātīśca sarvaśaḥ // (12.2) Par.?

khasā vai yakṣarakṣāṃsi munirapsarasastathā / (13.1) Par.?

rakṣogaṇaṃ krodhavaśā janayāmāsa sattamāḥ // (13.2) Par.?

vinatāyāśca putrau dvau prakhyātau garuḍāruṇau / (14.1) Par.?

tayośca garuḍo dhīmān tapastaptvā suduścaram / (14.2) Par.?

prasādācchūlinaḥ prāpto vāhanatvaṃ hareḥ svayam // (14.3) Par.?

ārādhya tapasā rudraṃ mahādevaṃ tathāruṇaḥ / (15.1) Par.?

sārathye kalpitaḥ pūrvaṃ prītenārkasya śaṃbhunā // (15.2) Par.?

ete kaśyapadāyādāḥ kīrtitāḥ sthāṇujaṅgamāḥ / (16.1) Par.?

vaivasvate 'nte hyasmiñchṛṇvatāṃ pāpanāśanāḥ // (16.2) Par.?

saptaviṃśat sutāḥ proktāḥ somapatnyaśca suvratāḥ / (17.1) Par.?

ariṣṭanemipatnīnāmapatyānīha ṣoḍaśa // (17.2) Par.?

bahuputrasya viduṣaścatasro vidyutaḥ smṛtāḥ / (18.1) Par.?

tadvadaṅgirasaḥ putrā ṛṣayo brahmasatkṛtāḥ // (18.2) Par.?

kuśāśvasya tu devarṣerdevapraharaṇāḥ sutāḥ / (19.1) Par.?

ete yugasahasrānte jāyante punareva hi / (19.2) Par.?

manvantareṣu niyataṃ tulyaiḥ kāryaiḥ svanāmabhiḥ // (19.3) Par.?

iti śrīkūrmapurāṇe ṣaṭsāhasryāṃ saṃhitāyāṃ pūrvavibhāge saptadaśo 'dhyāyaḥ // (20.1) Par.?