Texts

yatra vai prajāpatiḥ prajāḥ sasṛje sa yatrāgniṃ sasṛje sa idaṃ jātaḥ sarvam eva dagdhuṃ dadhra ity evābilam eva / (1.1) Par.?

tā yās tarhi prajā āsus tā hainaṃ saṃpeṣṭuṃ dadhrire / (1.2) Par.?

so 'titikṣamāṇaḥ puruṣam evābhyeyāya // (1.3) Par.?

sa hovāca na vā aham idaṃ titikṣe / (2.1) Par.?

hanta tvā praviśāni / (2.2) Par.?

tam mā janayitvā bibhṛhi / (2.3) Par.?

sa yathaiva māṃ tvam asmiṃl loke janayitvā bhariṣyasy evam evāhaṃ tvām amuṣmiṃl loke janayitvā bhariṣyāmīti / (2.4) Par.?

tatheti / (2.5) Par.?

taṃ janayitvābibhaḥ // (2.6) Par.?

sa yad agnī ādhatte tad enaṃ janayati / (3.1) Par.?

taṃ janayitvā bibharti / (3.2) Par.?

sa yathā haivaiṣa etam asmiṃl loke janayitvā bibharty evam u haivaiṣa etam amuṣmiṃl loke janayitvā bibharti // (3.3) Par.?

tan na sāmy udvāsayeta / (4.1) Par.?

sāmi hāsmai sa glāyati / (4.2) Par.?

sa yathā haivaiṣa etasmā asmiṃl loke sāmi glāyaty evam u haivaiṣa etasmā amuṣmiṃl loke sāmi glāyati / (4.3) Par.?

tasmān na sāmy udvāsayeta // (4.4) Par.?

sa yatra mriyate yatrainam agnāv abhyādadhati tad eṣo 'gner adhijāyate / (5.1) Par.?

sa eṣa putraḥ san pitā bhavati // (5.2) Par.?

tasmād etad ṛṣiṇābhyanūktaṃ śatam in nu śarado anti devā yatrā naś cakrā jarasaṃ tanūnām putrāso yatra pitaro bhavanti mā no madhyā rīriṣatāyur gantor iti / (6.1) Par.?

putro hy eṣa sant sa punaḥ pitā bhavati / (6.2) Par.?

etan nu tad yasmād agnī ādadhīta // (6.3) Par.?

tad vā eṣa eva mṛtyuḥ ya eṣa tapati / (7.1) Par.?

tad yad eṣa eva mṛtyus tasmād yā etasmād arvācyaḥ prajās tā mriyante / (7.2) Par.?

atha yāḥ parācyas te devāḥ / (7.3) Par.?

tasmād u te 'mṛtāḥ / (7.4) Par.?

tasyemāḥ sarvāḥ prajā raśmibhiḥ prāṇeṣv abhihitāḥ / (7.5) Par.?

tasmād u raśmayaḥ prāṇān abhyavatāyante // (7.6) Par.?

sa yasya kāmayate tasya prāṇam ādāyodeti / (8.1) Par.?

sa mriyate / (8.2) Par.?

sa yo haitaṃ mṛtyum anatimucyāthāmuṃ lokam eti yathā haivāsmiṃl loke na saṃyatam ādriyate yadā yadaiva kāmayate 'tha mārayaty evam u haivāmuṣmiṃl loke punaḥ punar eva pramārayati // (8.3) Par.?

sa yat sāyam astamite dve āhutī juhoti tad etābhyām pūrvābhyāṃ padbhyām etasmin mṛtyau pratitiṣṭhati / (9.1) Par.?

atha yat prātar anudite dve āhutī juhoti tad etābhyām aparābhyāṃ padbhyām etasmin mṛtyau pratitiṣṭhati / (9.2) Par.?

sa enam eṣa udyann evādāyodeti / (9.3) Par.?

tad etaṃ mṛtyum atimucyate / (9.4) Par.?

saiṣāgnihotre mṛtyor atimuktiḥ / (9.5) Par.?

ati ha vai punarmṛtyum mucyate ya evam etām agnihotre mṛtyor atimuktiṃ veda // (9.6) Par.?

yathā vā iṣor anīkam evaṃ yajñānām agnihotram / (10.1) Par.?

yena vā iṣor anīkam eti sarvā vai teneṣur eti / (10.2) Par.?

eteno hāsya sarve yajñakratava etam mṛtyum atimuktāḥ // (10.3) Par.?

ahorātre ha vā amuṣmiṃl loke pariplavamāne puruṣasya sukṛtaṃ kṣiṇutaḥ / (11.1) Par.?

arvācīnaṃ vā ato 'horātre / (11.2) Par.?

tatho hāsyāhorātre sukṛtaṃ na kṣiṇutaḥ // (11.3) Par.?

sa yathā rathopasthe tiṣṭhann upariṣṭād rathacakre palyaṅyamāne upāvekṣetaivaṃ parastād arvācīno 'horātre upāvekṣate / (12.1) Par.?

na ha vā asyāhorātre sukṛtaṃ kṣiṇuto ya evam etām ahorātrayor atimuktiṃ veda // (12.2) Par.?

pūrveṇāhavanīyaṃ parītyāntareṇa gārhapatyaṃ caiti / (13.1) Par.?

na vai devā manuṣyaṃ viduḥ / (13.2) Par.?

ta enam etad antareṇātiyantaṃ vidur ayaṃ vai na idaṃ juhotīti / (13.3) Par.?

agnir vai pāpmano 'pahantā / (13.4) Par.?

tāv asyāhavanīyaś ca gārhapatyaś cāntareṇātiyataḥ pāpmānam apahataḥ / (13.5) Par.?

so 'pahatapāpmā jyotir eva śriyā yaśasā bhavati // (13.6) Par.?

uttarato vā agnihotrasya dvāram / (14.1) Par.?

sa yathā dvārā prapadyetaivaṃ tat / (14.2) Par.?

atha yo dakṣiṇata etyāste yathā bahirdhā cared evaṃ tat // (14.3) Par.?

naur ha vā eṣā svargyā yad agnihotram / (15.1) Par.?

tasyā etasyai nāvaḥ svargyāyā āhavanīyaś caiva gārhapatyaś ca naumaṇḍe / (15.2) Par.?

athaiṣa eva nāvājo yat kṣīrahotā // (15.3) Par.?

sa yat prāṅ upodaiti tad enāṃ prācīm abhyajati svargaṃ lokam abhi / (16.1) Par.?

tayā svargaṃ lokaṃ samaśnute / (16.2) Par.?

tasyā uttarata ārohaṇam / (16.3) Par.?

sainaṃ svargaṃ lokaṃ samāpayati / (16.4) Par.?

atha yo dakṣiṇata etyāste yathā pratīrṇāyām āgacchet sa vihīyeta sa tata eva bahirdhā syād evaṃ tat // (16.5) Par.?

atha yām etāṃ samidham abhyādadhāti seṣṭakā / (17.1) Par.?

yena mantreṇa juhoti tad yajur yenaitām iṣṭakām upadadhāti / (17.2) Par.?

yadā vā iṣṭakopadhīyate 'thāhutir hūyate / (17.3) Par.?

tad asyopahitāsv eveṣṭakāsv etā āhutayo hūyante yā etā agnihotrāhutayaḥ // (17.4) Par.?

prajāpatir vā agniḥ / (18.1) Par.?

saṃvatsaro vai prajāpatiḥ / (18.2) Par.?

saṃvatsare saṃvatsare ha vā asyāgnihotraṃ cityenāgninā saṃtiṣṭhate / (18.3) Par.?

saṃvatsare saṃvatsare cityam agnim āpnoti ya evaṃ vidvān agnihotraṃ juhoti / (18.4) Par.?

etad u hāsyāgnihotraṃ cityenāgninā saṃtiṣṭhate cityam agnim āpnoti // (18.5) Par.?

sapta ca vai śatāny aśītīnām ṛco viṃśatiś ca / (19.1) Par.?

sa yat sāyaṃ prātar agnihotraṃ juhoti te dve āhutī / (19.2) Par.?

tā asya saṃvatsara āhutayaḥ sampadyante // (19.3) Par.?

sapta caiva śatāni viṃśatiś ca / (20.1) Par.?

saṃvatsare saṃvatsare ha vā asyāgnihotraṃ mahatokthena sampadyate / (20.2) Par.?

saṃvatsare saṃvatsare mahad uktham āpnoti ya evaṃ vidvān agnihotraṃ juhoti / (20.3) Par.?

etad u hāsyāgnihotraṃ mahatokthena sampadyate / (20.4) Par.?

mahad uktham āpnoti // (20.5) Par.?