Texts

somo vā amutrāsīt // (1.1) Par.?

te devā gāyatrīṃ prāhiṇvann amuṃ somam āhareti // (2.1) Par.?

sā vitataṃ yajñam avāpaśyat // (3.1) Par.?

saikṣata yad yajñasyāntareṣyāmy ātmānam antareṣyāmīti // (4.1) Par.?

tasyai vā etaṃ somo jīvagrahaṃ prābravīt // (5.1) Par.?

svajā asi / (6.1) Par.?

svabhūr asīti // (6.2) Par.?

somasya vā eṣa jīvagrahaḥ // (7.1) Par.?

somasya vā etaj jīvagrahaṃ gṛhṇīte // (8.1) Par.?

nādhvaryuḥ san nārtim ārchati ya evaṃ veda // (9.1) Par.?

varuṇo vā eṣa etarhi varuṇadevatyo yarhy upanaddho varuṇa enaṃ bhūtvā praviśet // (10.1) Par.?

yad āha mitro nā ehi sumitradhā iti mitram evainam akaḥ // (11.1) Par.?

śamayaty eva // (12.1) Par.?

indrasyorum āviśa dakṣiṇam iti // (13.1) Par.?

aindro vai yajñaḥ // (14.1) Par.?

indraḥ somasya yoniḥ // (15.1) Par.?

sva evainaṃ yonau dadhāti // (16.1) Par.?

indro vā etam agrā āgatam ūrū nyagṛhṇīta // (17.1) Par.?

tāṃ vā etad anukṛtim ūrā āsādayate // (18.1) Par.?

aporṇute // (19.1) Par.?

yathā śreyasy āyaty aporṇuta evaṃ tat // (20.1) Par.?

urv antarikṣaṃ vīhīti // (21.1) Par.?

antarikṣadevatyo vā eṣa etarhi // (22.1) Par.?

pracyuta ito 'prāpto 'mutra // (23.1) Par.?

adityāḥ sadā āsīdeti // (24.1) Par.?

ādityo vai yajñaḥ // (25.1) Par.?

aditiḥ somasya yoniḥ // (26.1) Par.?

sva evainaṃ yonau dadhāti // (27.1) Par.?

varuṇaṃ vā enam etat santaṃ mitram akaḥ // (28.1) Par.?

tad enaṃ svayā devatayā vyardhayati // (29.1) Par.?

yad āhāstabhnād dyām ṛṣabho antarikṣam amimīta varimāṇaṃ pṛthivyāḥ / (30.1) Par.?

āsīdad viśvā bhuvanāni samrāḍ viśvet tāni varuṇasya vratānīti / (30.2) Par.?

varuṇam evainam akaḥ // (30.3) Par.?

svayaivainaṃ devatayā samardhayati // (31.1) Par.?

vaneṣu vy antarikṣaṃ tatāneti // (32.1) Par.?

vāsasā paryāṇahyati // (33.1) Par.?

sarvadevatyaṃ vai vāsaḥ // (34.1) Par.?

sarvābhir vā etad devatābhir yajñaṃ krītaṃ pariśrayati // (35.1) Par.?

dhūr asi dhvara dhvarantam ity āha rakṣasāṃ dhvarāyai rakṣasām antarityai // (36.1) Par.?

vāruṇam asi / (37.1) Par.?

varuṇas tvottabhnātv iti // (37.2) Par.?

vāruṇaṃ hy eṣa etarhi varuṇadevatyam // (38.1) Par.?

anasāccha yanti // (39.1) Par.?

mahimānam evāsyāccha yanti // (40.1) Par.?

anasā vahanti // (41.1) Par.?

tasmād anovāhyam oṣadhayaḥ phalaṃ pacyante // (42.1) Par.?

śīrṣāhāryam oṣadhayaḥ phalaṃ pacyeran yat somaṃ krītaṃ śīrṣṇā hareyuḥ // (43.1) Par.?

tasmād girā oṣadhayaḥ śīrṣāhāryaṃ phalaṃ pacyante // (44.1) Par.?

śīrṣṇā hi somaṃ krītaṃ haranti // (45.1) Par.?

pracyavasva bhuvanaspatā iti // (46.1) Par.?

bhūtānāṃ hy eṣa patiḥ // (47.1) Par.?

viśvāny abhi dhāmānīti // (48.1) Par.?

viśvāni hy eṣa dhāmāny abhi pracyavate // (49.1) Par.?

mā tvā paripariṇo mā paripanthino mā tvā vṛkā aghāyavo vidann iti // (50.1) Par.?

yatra vā enam ada āhriyamāṇaṃ sāmi gandharvo viśvāvasur āmuṣṇāt tādṛśebhyo vāvāsmā etad rakṣobhyo bhīṣā svastim akaḥ // (51.1) Par.?

varuṇo vā eṣa krīto yajamānasya gṛham ohyate // (52.1) Par.?

sa īśvaro 'śānto yajamānaṃ hiṃsitoḥ // (53.1) Par.?

yad āha namo mitrasya varuṇasya cakṣasā iti śamayaty eva // (54.1) Par.?

śānta evohyate yajamānasyāhiṃsāyai // (55.1) Par.?

sarvābhyo vā eṣa devatābhyā ohyate // (56.1) Par.?

yad ekolmukena pratitiṣṭhet pitṛdevatyo 'sya yajñaḥ syāt // (57.1) Par.?

agnir mahat samādheyaḥ // (58.1) Par.?

agnir vai sarvā devatāḥ // (59.1) Par.?

sarvābhir vā etad devatābhir yajñam āyantaṃ pratitiṣṭhati // (60.1) Par.?

agnīṣomau vā etau sambhavataḥ // (61.1) Par.?

yajamānaṃ vā etā abhisaṃbhavetāṃ yajamānasya vā paśūn // (62.1) Par.?

tad ya eṣa paśur dhāryate tam eva bhāgadheyam abhisaṃbhavataḥ // (63.1) Par.?

devatā vā etaṃ paśuṃ dhāryamāṇaṃ nābhiprācyavanta // (64.1) Par.?

asmin yajña āśaṃsamānād yo 'yam itaras tam agnīṣomā upaprācyavetām // (65.1) Par.?

tasmād eṣo 'gnīṣomīyaḥ // (66.1) Par.?

agnīṣomābhyāṃ vā eṣa medhāyātmānam ālabhate yo dīkṣate // (67.1) Par.?

sa vā etenaiva paśunātmānaṃ niṣkrīṇīte // (68.1) Par.?

sthūlaḥ pīvā syād ātmano niṣkrītyai // (69.1) Par.?

tasmād agnīṣomīyasya paśor nāśitavyam // (70.1) Par.?

puruṣo hy etenātmānaṃ niṣkrīṇīte // (71.1) Par.?

tasmād agnīṣomīye saṃsthite yajamānasya gṛhe 'śitavyam // (72.1) Par.?

tarhi niṣkrīto 'nṛṇaḥ // (73.1) Par.?

vārtraghnaṃ vā etat // (74.1) Par.?

somo vai vṛtraḥ // (75.1) Par.?

pūrvedyur vā indro vṛtram ahan // (76.1) Par.?

pūrvedyur vāvainam etat sṛtvāthāparedyur abhiṣuṇoti // (77.1) Par.?

varuṇapāśābhyāṃ vā eṣo 'bhidhīyate yo dīkṣate // (78.1) Par.?

ahorātre varuṇapāśau // (79.1) Par.?

yad divā saṃsthāpayed anunmukto varuṇapāśābhyāṃ syāt // (80.1) Par.?

naktaṃ saṃsthāpyaḥ // (81.1) Par.?

varuṇapāśābhyām evonmucyata ātmano 'hiṃsāyai // (82.1) Par.?