Texts

Help

Select a text:
Bibliography
Select a chapter:
 (no revisions)
Associated topic(s): Buddhism, Mahāyāna

Show parallels  Show headlines
Use dependency labeler
Chapter id: 3676
  • Click on a sentence to show its analysis
  • Keep the mouse pointer over a lemma to show its meanings.
yadi śūnyam idaṃ sarvam udayo nāsti na vyayaḥ / (1.1) Par.?
caturṇām āryasatyānām abhāvas te prasajyate // (1.2) Par.?
parijñā ca prahāṇaṃ ca bhāvanā sākṣikarma ca / (2.1) Par.?
caturṇām āryasatyānām abhāvān nopapadyate // (2.2) Par.?
tadabhāvān na vidyante catvāry āryaphalāni ca / (3.1) Par.?
phalābhāve phalasthā no na santi pratipannakāḥ // (3.2) Par.?
saṃgho nāsti na cet santi te 'ṣṭau puruṣapudgalāḥ / (4.1) Par.?
abhāvāc cāryasatyānāṃ saddharmo 'pi na vidyate // (4.2) Par.?
dharme cāsati saṃghe ca kathaṃ buddho bhaviṣyati / (5.1) Par.?
evaṃ trīṇy api ratnāni bruvāṇaḥ pratibādhase // (5.2) Par.?
śūnyatāṃ phalasadbhāvam adharmaṃ dharmam eva ca / (6.1) Par.?
sarvasaṃvyavahārāṃś ca laukikān pratibādhase // (6.2) Par.?
atra brūmaḥ śūnyatāyāṃ na tvaṃ vetsi prayojanam / (7.1) Par.?
śūnyatāṃ śūnyatārthaṃ ca tata evaṃ vihanyase // (7.2) Par.?
dve satye samupāśritya buddhānāṃ dharmadeśanā / (8.1) Par.?
lokasaṃvṛtisatyaṃ ca satyaṃ ca paramārthataḥ // (8.2) Par.?
ye 'nayor na vijānanti vibhāgaṃ satyayor dvayoḥ / (9.1) Par.?
te tattvaṃ na vijānanti gambhīraṃ buddhaśāsane // (9.2) Par.?
vyavahāram anāśritya paramārtho na deśyate / (10.1) Par.?
paramārtham anāgamya nirvāṇaṃ nādhigamyate // (10.2) Par.?
vināśayati durdṛṣṭā śūnyatā mandamedhasam / (11.1) Par.?
sarpo yathā durgṛhīto vidyā vā duṣprasādhitā // (11.2) Par.?
ataś ca pratyudāvṛttaṃ cittaṃ deśayituṃ muneḥ / (12.1) Par.?
dharmaṃ matvāsya dharmasya mandair duravagāhatām // (12.2) Par.?
śūnyatāyām adhilayaṃ yaṃ punaḥ kurute bhavān / (13.1) Par.?
doṣaprasaṅgo nāsmākaṃ sa śūnye nopapadyate // (13.2) Par.?
sarvaṃ ca yujyate tasya śūnyatā yasya yujyate / (14.1) Par.?
sarvaṃ na yujyate tasya śūnyaṃ yasya na yujyate // (14.2) Par.?
sa tvaṃ doṣān ātmanīyān asmāsu paripātayan / (15.1) Par.?
aśvam evābhirūḍhaḥ sann aśvam evāsi vismṛtaḥ // (15.2) Par.?
svabhāvād yadi bhāvānāṃ sadbhāvam anupaśyasi / (16.1) Par.?
ahetupratyayān bhāvāṃs tvam evaṃ sati paśyasi // (16.2) Par.?
kāryaṃ ca kāraṇaṃ caiva kartāraṃ karaṇaṃ kriyām / (17.1) Par.?
utpādaṃ ca nirodhaṃ ca phalaṃ ca pratibādhase // (17.2) Par.?
yaḥ pratītyasamutpādaḥ śūnyatāṃ tāṃ pracakṣmahe / (18.1) Par.?
sā prajñaptir upādāya pratipat saiva madhyamā // (18.2) Par.?
apratītya samutpanno dharmaḥ kaścin na vidyate / (19.1) Par.?
yasmāt tasmād aśūnyo hi dharmaḥ kaścin na vidyate // (19.2) Par.?
yady aśūnyam idaṃ sarvam udayo nāsti na vyayaḥ / (20.1) Par.?
caturṇām āryasatyānām abhāvas te prasajyate // (20.2) Par.?
apratītya samutpannaṃ kuto duḥkhaṃ bhaviṣyati / (21.1) Par.?
anityam uktaṃ duḥkhaṃ hi tat svābhāvye na vidyate // (21.2) Par.?
svabhāvato vidyamānaṃ kiṃ punaḥ samudeṣyate / (22.1) Par.?
tasmāt samudayo nāsti śūnyatāṃ pratibādhataḥ // (22.2) Par.?
na nirodhaḥ svabhāvena sato duḥkhasya vidyate / (23.1) Par.?
svabhāvaparyavasthānān nirodhaṃ pratibādhase // (23.2) Par.?
svābhāvye sati mārgasya bhāvanā nopapadyate / (24.1) Par.?
athāsau bhāvyate mārgaḥ svābhāvyaṃ te na vidyate // (24.2) Par.?
yadā duḥkhaṃ samudayo nirodhaś ca na vidyate / (25.1) Par.?
mārgo duḥkhanirodhatvāt katamaḥ prāpayiṣyati // (25.2) Par.?
svabhāvenāparijñānaṃ yadi tasya punaḥ katham / (26.1) Par.?
parijñānaṃ nanu kila svabhāvaḥ samavasthitaḥ // (26.2) Par.?
prahāṇasākṣātkaraṇe bhāvanā caivam eva te / (27.1) Par.?
parijñāvan na yujyante catvāry api phalāni ca // (27.2) Par.?
svabhāvenānadhigataṃ yat phalaṃ tat punaḥ katham / (28.1) Par.?
śakyaṃ samadhigantuṃ syāt svabhāvaṃ parigṛhṇataḥ // (28.2) Par.?
phalābhāve phalasthā no na santi pratipannakāḥ / (29.1) Par.?
saṃgho nāsti na cet santi te 'ṣṭau puruṣapudgalāḥ // (29.2) Par.?
abhāvāc cāryasatyānāṃ saddharmo 'pi na vidyate / (30.1) Par.?
dharme cāsati saṃghe ca kathaṃ buddho bhaviṣyati // (30.2) Par.?
apratītyāpi bodhiṃ ca tava buddhaḥ prasajyate / (31.1) Par.?
apratītyāpi buddhaṃ ca tava bodhiḥ prasajyate // (31.2) Par.?
yaś cābuddhaḥ svabhāvena sa bodhāya ghaṭann api / (32.1) Par.?
na bodhisattvacaryāyāṃ bodhiṃ te 'dhigamiṣyati // (32.2) Par.?
na ca dharmam adharmaṃ vā kaścij jātu kariṣyati / (33.1) Par.?
kim aśūnyasya kartavyaṃ svabhāvaḥ kriyate na hi // (33.2) Par.?
vinā dharmam adharmaṃ ca phalaṃ hi tava vidyate / (34.1) Par.?
dharmādharmanimittaṃ ca phalaṃ tava na vidyate // (34.2) Par.?
dharmādharmanimittaṃ vā yadi te vidyate phalam / (35.1) Par.?
dharmādharmasamutpannam aśūnyaṃ te kathaṃ phalam // (35.2) Par.?
sarvasaṃvyavahārāṃś ca laukikān pratibādhase / (36.1) Par.?
yat pratītyasamutpādaśūnyatāṃ pratibādhase // (36.2) Par.?
na kartavyaṃ bhavet kiṃcid anārabdhā bhavet kriyā / (37.1) Par.?
kārakaḥ syād akurvāṇaḥ śūnyatāṃ pratibādhataḥ // (37.2) Par.?
ajātam aniruddhaṃ ca kūṭasthaṃ ca bhaviṣyati / (38.1) Par.?
vicitrābhir avasthābhiḥ svabhāve rahitaṃ jagat // (38.2) Par.?
asaṃprāptasya ca prāptir duḥkhaparyantakarma ca / (39.1) Par.?
sarvakleśaprahāṇaṃ ca yady aśūnyaṃ na vidyate // (39.2) Par.?
yaḥ pratītyasamutpādaṃ paśyatīdaṃ sa paśyati / (40.1) Par.?
duḥkhaṃ samudayaṃ caiva nirodhaṃ mārgam eva ca // (40.2) Par.?
Duration=0.3118588924408 secs.