Texts

tāṃ tu śūrpaṇakhāṃ rāmaḥ kāmapāśāvapāśitām / (1.1) Par.?

svacchayā ślakṣṇayā vācā smitapūrvam athābravīt // (1.2) Par.?

kṛtadāro 'smi bhavati bhāryeyaṃ dayitā mama / (2.1) Par.?

tvadvidhānāṃ tu nārīṇāṃ suduḥkhā sasapatnatā // (2.2) Par.?

anujas tv eṣa me bhrātā śīlavān priyadarśanaḥ / (3.1) Par.?

śrīmān akṛtadāraś ca lakṣmaṇo nāma vīryavān // (3.2) Par.?

apūrvī bhāryayā cārthī taruṇaḥ priyadarśanaḥ / (4.1) Par.?

anurūpaś ca te bhartā rūpasyāsya bhaviṣyati // (4.2) Par.?

enaṃ bhaja viśālākṣi bhartāraṃ bhrātaraṃ mama / (5.1) Par.?

asapatnā varārohe merum arkaprabhā yathā // (5.2) Par.?

iti rāmeṇa sā proktā rākṣasī kāmamohitā / (6.1) Par.?

visṛjya rāmaṃ sahasā tato lakṣmaṇam abravīt // (6.2) Par.?

asya rūpasya te yuktā bhāryāhaṃ varavarṇinī / (7.1) Par.?

mayā saha sukhaṃ sarvān daṇḍakān vicariṣyasi // (7.2) Par.?

evam uktas tu saumitrī rākṣasyā vākyakovidaḥ / (8.1) Par.?

tataḥ śūrpaṇakhīṃ smitvā lakṣmaṇo yuktam abravīt // (8.2) Par.?

kathaṃ dāsasya me dāsī bhāryā bhavitum icchasi / (9.1) Par.?

so 'ham āryeṇa paravān bhrātrā kamalavarṇini // (9.2) Par.?

samṛddhārthasya siddhārthā muditāmalavarṇinī / (10.1) Par.?

āryasya tvaṃ viśālākṣi bhāryā bhava yavīyasī // (10.2) Par.?

etāṃ virūpām asatīṃ karālāṃ nirṇatodarīm / (11.1) Par.?

bhāryāṃ vṛddhāṃ parityajya tvām evaiṣa bhajiṣyati // (11.2) Par.?

ko hi rūpam idaṃ śreṣṭhaṃ saṃtyajya varavarṇini / (12.1) Par.?

mānuṣeṣu varārohe kuryād bhāvaṃ vicakṣaṇaḥ // (12.2) Par.?

iti sā lakṣmaṇenoktā karālā nirṇatodarī / (13.1) Par.?

manyate tad vacaḥ satyaṃ parihāsāvicakṣaṇā // (13.2) Par.?

sā rāmaṃ parṇaśālāyām upaviṣṭaṃ paraṃtapam / (14.1) Par.?

sītayā saha durdharṣam abravīt kāmamohitā // (14.2) Par.?

imāṃ virūpām asatīṃ karālāṃ nirṇatodarīm / (15.1) Par.?

vṛddhāṃ bhāryām avaṣṭabhya na māṃ tvaṃ bahu manyase // (15.2) Par.?

adyemāṃ bhakṣayiṣyāmi paśyatas tava mānuṣīm / (16.1) Par.?

tvayā saha cariṣyāmi niḥsapatnā yathāsukham // (16.2) Par.?

ity uktvā mṛgaśāvākṣīm alātasadṛśekṣaṇā / (17.1) Par.?

abhyadhāvat susaṃkruddhā maholkā rohiṇīm iva // (17.2) Par.?

tāṃ mṛtyupāśapratimām āpatantīṃ mahābalaḥ / (18.1) Par.?

nigṛhya rāmaḥ kupitas tato lakṣmaṇam abravīt // (18.2) Par.?

krūrair anāryaiḥ saumitre parihāsaḥ kathaṃcana / (19.1) Par.?

na kāryaḥ paśya vaidehīṃ kathaṃcit saumya jīvatīm // (19.2) Par.?

imāṃ virūpām asatīm atimattāṃ mahodarīm / (20.1) Par.?

rākṣasīṃ puruṣavyāghra virūpayitum arhasi // (20.2) Par.?

ity ukto lakṣmaṇas tasyāḥ kruddho rāmasya paśyataḥ / (21.1) Par.?

uddhṛtya khaḍgaṃ cicheda karṇanāsaṃ mahābalaḥ // (21.2) Par.?

nikṛttakarṇanāsā tu visvaraṃ sā vinadya ca / (22.1) Par.?

yathāgataṃ pradudrāva ghorā śūrpaṇakhā vanam // (22.2) Par.?

sā virūpā mahāghorā rākṣasī śoṇitokṣitā / (23.1) Par.?

nanāda vividhān nādān yathā prāvṛṣi toyadaḥ // (23.2) Par.?

sā vikṣarantī rudhiraṃ bahudhā ghoradarśanā / (24.1) Par.?

pragṛhya bāhū garjantī praviveśa mahāvanam // (24.2) Par.?

tatas tu sā rākṣasasaṃghasaṃvṛtaṃ kharaṃ janasthānagataṃ virūpitā / (25.1) Par.?

upetya taṃ bhrātaram ugratejasaṃ papāta bhūmau gaganād yathāśaniḥ // (25.2) Par.?

tataḥ sabhāryaṃ bhayamohamūrchitā salakṣmaṇaṃ rāghavam āgataṃ vanam / (26.1) Par.?

virūpaṇaṃ cātmani śoṇitokṣitā śaśaṃsa sarvaṃ bhaginī kharasya sā // (26.2) Par.?