Texts

yājñavalkya uvāca / (1.1) Par.?

ete pradhānasya guṇāstrayaḥ puruṣasattama / (1.2) Par.?

kṛtsnasya caiva jagatastiṣṭhantyanapagāḥ sadā // (1.3) Par.?

śatadhā sahasradhā caiva tathā śatasahasradhā / (2.1) Par.?

koṭiśaśca karotyeṣa pratyagātmānam ātmanā // (2.2) Par.?

sāttvikasyottamaṃ sthānaṃ rājasasyeha madhyamam / (3.1) Par.?

tāmasasyādhamaṃ sthānaṃ prāhur adhyātmacintakāḥ // (3.2) Par.?

kevaleneha puṇyena gatim ūrdhvām avāpnuyāt / (4.1) Par.?

puṇyapāpena mānuṣyam adharmeṇāpyadhogatim // (4.2) Par.?

dvaṃdvam eṣāṃ trayāṇāṃ tu saṃnipātaṃ ca tattvataḥ / (5.1) Par.?

sattvasya rajasaścaiva tamasaśca śṛṇuṣva me // (5.2) Par.?

sattvasya tu rajo dṛṣṭaṃ rajasaśca tamastathā / (6.1) Par.?

tamasaśca tathā sattvaṃ sattvasyāvyaktam eva ca // (6.2) Par.?

avyaktasattvasaṃyukto devalokam avāpnuyāt / (7.1) Par.?

rajaḥsattvasamāyukto manuṣyeṣūpapadyate // (7.2) Par.?

rajastamobhyāṃ saṃyuktastiryagyoniṣu jāyate / (8.1) Par.?

rajastāmasasattvaiśca yukto mānuṣyam āpnuyāt // (8.2) Par.?

puṇyapāpaviyuktānāṃ sthānam āhur manīṣiṇām / (9.1) Par.?

śāśvataṃ cāvyayaṃ caiva akṣaraṃ cābhayaṃ ca yat // (9.2) Par.?

jñānināṃ saṃbhavaṃ śreṣṭhaṃ sthānam avraṇam acyutam / (10.1) Par.?

atīndriyam abījaṃ ca janmamṛtyutamonudam // (10.2) Par.?

avyaktasthaṃ paraṃ yat tat pṛṣṭaste 'haṃ narādhipa / (11.1) Par.?

sa eṣa prakṛtiṣṭho hi tasthur ityabhidhīyate // (11.2) Par.?

acetanaścaiṣa mataḥ prakṛtisthaśca pārthiva / (12.1) Par.?

etenādhiṣṭhitaścaiva sṛjate saṃharatyapi // (12.2) Par.?

janaka uvāca / (13.1) Par.?

anādinidhanāv etāvubhāveva mahāmune / (13.2) Par.?

amūrtimantāv acalāv aprakampyau ca nirvraṇau // (13.3) Par.?

agrāhyāv ṛṣiśārdūla katham eko hy acetanaḥ / (14.1) Par.?

cetanāvāṃstathā caikaḥ kṣetrajña iti bhāṣitaḥ // (14.2) Par.?

tvaṃ hi viprendra kārtsnyena mokṣadharmam upāsase / (15.1) Par.?

sākalyaṃ mokṣadharmasya śrotum icchāmi tattvataḥ // (15.2) Par.?

astitvaṃ kevalatvaṃ ca vinābhāvaṃ tathaiva ca / (16.1) Par.?

tathaivotkramaṇasthānaṃ dehino 'pi viyujyataḥ // (16.2) Par.?

kālena yaddhi prāpnoti sthānaṃ tad brūhi me dvija / (17.1) Par.?

sāṃkhyajñānaṃ ca tattvena pṛthag yogaṃ tathaiva ca // (17.2) Par.?

ariṣṭāni ca tattvena vaktum arhasi sattama / (18.1) Par.?

viditaṃ sarvam etat te pāṇāvāmalakaṃ yathā // (18.2) Par.?