Texts

padaṃ samupya pāṇī avanenikte / (1.1) Par.?

tad yat pāṇī avanenikte / (1.2) Par.?

vajro vā ājyam / (1.3) Par.?

retaḥ somaḥ / (1.4) Par.?

ned vajreṇājyena retaḥ somaṃ hinasānīti / (1.5) Par.?

tasmāt pāṇī avanenikte // (1.6) Par.?

athāsyāṃ hiraṇyam badhnīte / (2.1) Par.?

dvayaṃ vā idaṃ na tṛtīyam asti satyaṃ caivānṛtaṃ ca / (2.2) Par.?

satyam eva devā anṛtam manuṣyāḥ / (2.3) Par.?

agniretasaṃ vai hiraṇyam / (2.4) Par.?

satyenāṃśūn upaspṛśāni satyena somam parāhaṇānīti / (2.5) Par.?

tasmād vā asyāṃ hiraṇyam badhnīte // (2.6) Par.?

atha saṃpreṣyati somopanahanam āhara / (3.1) Par.?

somaparyāṇahanam āhara / (3.2) Par.?

uṣṇīṣam āhareti / (3.3) Par.?

sa yad eva śobhanaṃ tat somopanahanaṃ syāt / (3.4) Par.?

vāso hy asyaitad bhavati / (3.5) Par.?

śobhanaṃ hy etasya vāsaḥ / (3.6) Par.?

sa yo hainaṃ śobhanenopacarati śobhate ha / (3.7) Par.?

atha ya āha yad eva kiṃ ceti yaddhaiva kiṃ ca bhavati / (3.8) Par.?

tasmād yad eva śobhanaṃ tat somopanahanaṃ syād yad eva kiṃ ca somaparyāṇahanam // (3.9) Par.?

yady uṣṇīṣaṃ vinded uṣṇīṣaḥ syāt / (4.1) Par.?

yady uṣṇīṣaṃ na vindet somaparyāṇahanasyaiva dvyaṅgulaṃ vā tryaṅgulaṃ vāvakṛnted uṣṇīṣabhājanam / (4.2) Par.?

adhvaryur vā yajamāno vā somopanahanam ādatte ya eva kaś ca somaparyāṇahanam // (4.3) Par.?

athāgreṇa rājānaṃ vicinvanti / (5.1) Par.?

tad udakumbha upanihito bhavati / (5.2) Par.?

tad brāhmaṇa upāste / (5.3) Par.?

tad abhyāyanti prāñcaḥ // (5.4) Par.?

tad āyatsu vācayaty eṣa te gāyatro bhāga iti / (6.1) Par.?

me somāya brūtāt / (6.2) Par.?

eṣa te traiṣṭubho bhāga iti / (6.3) Par.?

me somāya brūtāt / (6.4) Par.?

eṣa te jāgato bhāga iti / (6.5) Par.?

me somāya brūtāt / (6.6) Par.?

chandonāmānāṃ sāmrājyaṃ gaccheti / (6.7) Par.?

me somāya brūtād iti / (6.8) Par.?

ekaṃ vā eṣa krīyamāṇo 'bhikrīyate chandasām eva rājyāya chandasāṃ sāmrājyāya / (6.9) Par.?

ghnanti vā enam etad yad abhiṣuṇvanti / (6.10) Par.?

tam etad āha chandasām eva tvā rājyāya krīṇāmi chandasāṃ sāmrājyāya na vadhāyeti / (6.11) Par.?

athetya prāṅ upaviśati // (6.12) Par.?

so 'bhimṛśaty āsmāko 'sīti / (7.1) Par.?

sva iva hy asyaitad bhavati yad āgataḥ / (7.2) Par.?

tasmād āhāsmāko 'sīti / (7.3) Par.?

śukras te grahya iti / (7.4) Par.?

śukraṃ hy asmād grahaṃ grahīṣyan bhavati / (7.5) Par.?

vicitas tvā vicinvantv iti sarvatvāyaitad āha // (7.6) Par.?

atra haike tṛṇaṃ vā kāṣṭhaṃ vā vittvāpāsyanti / (8.1) Par.?

tad u tathā na kuryāt / (8.2) Par.?

kṣatraṃ vai somaḥ / (8.3) Par.?

viḍ anyā oṣadhayaḥ / (8.4) Par.?

annaṃ vai kṣatriyasya viṭ / (8.5) Par.?

sa yathā grasitam anuhāyācchidya parāsyed evaṃ tat / (8.6) Par.?

tasmād abhy eva mṛśed vicitas tvā vicinvantv iti / (8.7) Par.?

tad ya evāsya vicetāras ta enaṃ vicinvanti // (8.8) Par.?

atha vāso dviguṇaṃ vā caturguṇaṃ vā prāgdaśaṃ vodagdaśaṃ vopastṛṇāti / (9.1) Par.?

tad rājānaṃ mimīte / (9.2) Par.?

sa yad rājānam mimīte tasmān mātrā manuṣyeṣu mātro yo cāpy anyā mātrā // (9.3) Par.?

sāvitryā mimīte / (10.1) Par.?

savitā vai devānām prasavitā / (10.2) Par.?

tatho hāsmā eṣa savitṛprasūta eva krayāya bhavati // (10.3) Par.?

atichandasā mimīte / (11.1) Par.?

eṣā vai sarvāṇi chandāṃsi yad atichandāḥ / (11.2) Par.?

tathā hāsyaiṣa sarvair eva chandobhir mito bhavati / (11.3) Par.?

tasmād atichandasā mimīte // (11.4) Par.?

sa mimīte 'bhi tyaṃ devaṃ savitāram oṇyoḥ kavikratum arcāmi satyasavaṃ ratnadhām abhi priyam matiṃ kavim ūrdhvā yasyāmatirbhā adidyutat savīmani hiraṇyapāṇir amimīta sukratuḥ kṛpā svar iti // (12.1) Par.?

etayā sarvābhir etayā catasṛbhir etayā tisṛbhir etayā dvābhyām etayaikayā / (13.1) Par.?

etayaivaikayaitayā tisṛbhir etayā catasṛbhir etayā sarvābhiḥ / (13.2) Par.?

samasyāñjalinādhyāvapati // (13.3) Par.?

sa vā udācaṃ nyācam mimīte / (14.1) Par.?

sa yad udācaṃ nyācam mimīta imā evaitad aṅgulīr nānājānāḥ karoti / (14.2) Par.?

tasmādimā nānā jāyante / (14.3) Par.?

atha yatsaha sarvābhirmimīte / (14.4) Par.?

saṃśliṣṭā iva haivemā jāyeran / (14.5) Par.?

tasmād vā udācaṃ nyācam mimīte // (14.6) Par.?

yad v evodācaṃ nyācam mimīte imā evaitan nānāvīryāḥ karoti / (15.1) Par.?

tasmād imā nānāvīryāḥ / (15.2) Par.?

tasmād vā udācaṃ nyācam mimīte // (15.3) Par.?

yad v evodācaṃ nyācam mimīte virājam evaitad arvācīṃ ca parācīṃ ca yunakti / (16.1) Par.?

parācy aha devebhyo yajñaṃ vahati / (16.2) Par.?

arvācī manuṣyān avati / (16.3) Par.?

tasmād vā udācaṃ nyācaṃ mimīte // (16.4) Par.?

atha yad daśa kṛtvo mimīte / (17.1) Par.?

daśākṣarā vai virāṭ / (17.2) Par.?

vairājaḥ somaḥ / (17.3) Par.?

tasmād daśa kṛtvo mimīte // (17.4) Par.?

atha somopanahanasya samutpāryāntān uṣṇīṣeṇa vigrathnāti prajābhyas tveti / (18.1) Par.?

prajābhyo hy enaṃ krīṇāti / (18.2) Par.?

sa yad evedaṃ śiraś cāṃsau cāntaropenitam iva tad evāsyaitat karoti // (18.3) Par.?

atha madhye 'ṅgulyākāśaṃ karoti prajās tvānuprāṇantv iti / (19.1) Par.?

tamayatīva vā enam etat samāyacchan / (19.2) Par.?

aprāṇam iva karoti / (19.3) Par.?

tasyaitad ata eva madhyataḥ prāṇam utsṛjati / (19.4) Par.?

taṃ tataḥ prāṇantam prajā anuprāṇanti / (19.5) Par.?

tasmād āha prajās tvānuprāṇantv iti / (19.6) Par.?

taṃ somavikrayiṇe prayacchati / (19.7) Par.?

athātaḥ paṇanasyaiva // (19.8) Par.?