Texts

maitreya uvāca / (1.1) Par.?

iti bruvāṇaṃ nṛpatiṃ gāyakā municoditāḥ / (1.2) Par.?

tuṣṭuvustuṣṭamanasastadvāgamṛtasevayā // (1.3) Par.?

nālaṃ vayaṃ te mahimānuvarṇane yo devavaryo 'vatatāra māyayā / (2.1) Par.?

venāṅgajātasya ca pauruṣāṇi te vācaspatīnāmapi babhramurdhiyaḥ // (2.2) Par.?

athāpyudāraśravasaḥ pṛthorhareḥ kalāvatārasya kathāmṛtādṛtāḥ / (3.1) Par.?

yathopadeśaṃ munibhiḥ pracoditāḥ ślāghyāni karmāṇi vayaṃ vitanmahi // (3.2) Par.?

eṣa dharmabhṛtāṃ śreṣṭho lokaṃ dharme 'nuvartayan / (4.1) Par.?

goptā ca dharmasetūnāṃ śāstā tatparipanthinām // (4.2) Par.?

eṣa vai lokapālānāṃ bibhartyekastanau tanūḥ / (5.1) Par.?

kāle kāle yathābhāgaṃ lokayorubhayorhitam // (5.2) Par.?

vasu kāla upādatte kāle cāyaṃ vimuñcati / (6.1) Par.?

samaḥ sarveṣu bhūteṣu pratapansūryavadvibhuḥ // (6.2) Par.?

titikṣatyakramaṃ vainya uparyākramatāmapi / (7.1) Par.?

bhūtānāṃ karuṇaḥ śaśvadārtānāṃ kṣitivṛttimān // (7.2) Par.?

deve 'varṣatyasau devo naradevavapurhariḥ / (8.1) Par.?

kṛcchraprāṇāḥ prajā hyeṣa rakṣiṣyatyañjasendravat // (8.2) Par.?

āpyāyayatyasau lokaṃ vadanāmṛtamūrtinā / (9.1) Par.?

sānurāgāvalokena viśadasmitacāruṇā // (9.2) Par.?

avyaktavartmaiṣa nigūḍhakāryo gambhīravedhā upaguptavittaḥ / (10.1) Par.?

anantamāhātmyaguṇaikadhāmā pṛthuḥ pracetā iva saṃvṛtātmā // (10.2) Par.?

durāsado durviṣaha āsanno 'pi vidūravat / (11.1) Par.?

naivābhibhavituṃ śakyo venāraṇyutthito 'nalaḥ // (11.2) Par.?

antarbahiśca bhūtānāṃ paśyankarmāṇi cāraṇaiḥ / (12.1) Par.?

udāsīna ivādhyakṣo vāyurātmeva dehinām // (12.2) Par.?

nādaṇḍyaṃ daṇḍayatyeṣa sutamātmadviṣāmapi / (13.1) Par.?

daṇḍayatyātmajamapi daṇḍyaṃ dharmapathe sthitaḥ // (13.2) Par.?

asyāpratihataṃ cakraṃ pṛthorāmānasācalāt / (14.1) Par.?

vartate bhagavānarko yāvattapati gogaṇaiḥ // (14.2) Par.?

rañjayiṣyati yallokamayamātmaviceṣṭitaiḥ / (15.1) Par.?

athāmumāhū rājānaṃ manorañjanakaiḥ prajāḥ // (15.2) Par.?

dṛḍhavrataḥ satyasaṃdho brahmaṇyo vṛddhasevakaḥ / (16.1) Par.?

śaraṇyaḥ sarvabhūtānāṃ mānado dīnavatsalaḥ // (16.2) Par.?

mātṛbhaktiḥ parastrīṣu patnyāmardha ivātmanaḥ / (17.1) Par.?

prajāsu pitṛvatsnigdhaḥ kiṅkaro brahmavādinām // (17.2) Par.?

dehināmātmavatpreṣṭhaḥ suhṛdāṃ nandivardhanaḥ / (18.1) Par.?

muktasaṅgaprasaṅgo 'yaṃ daṇḍapāṇirasādhuṣu // (18.2) Par.?

ayaṃ tu sākṣādbhagavāṃstryadhīśaḥ kūṭastha ātmā kalayāvatīrṇaḥ / (19.1) Par.?

yasminavidyāracitaṃ nirarthakaṃ paśyanti nānātvamapi pratītam // (19.2) Par.?

ayaṃ bhuvo maṇḍalam odayādrer goptaikavīro naradevanāthaḥ / (20.1) Par.?

āsthāya jaitraṃ rathamāttacāpaḥ paryasyate dakṣiṇato yathārkaḥ // (20.2) Par.?

asmai nṛpālāḥ kila tatra tatra baliṃ hariṣyanti salokapālāḥ / (21.1) Par.?

maṃsyanta eṣāṃ striya ādirājaṃ cakrāyudhaṃ tadyaśa uddharantyaḥ // (21.2) Par.?

ayaṃ mahīṃ gāṃ duduhe 'dhirājaḥ prajāpatirvṛttikaraḥ prajānām / (22.1) Par.?

yo līlayādrīnsvaśarāsakoṭyā bhindansamāṃ gāmakarodyathendraḥ // (22.2) Par.?

visphūrjayannājagavaṃ dhanuḥ svayaṃ yadācarat kṣmām aviṣahyam ājau / (23.1) Par.?

tadā nililyurdiśi diśyasanto lāṅgūlamudyamya yathā mṛgendraḥ // (23.2) Par.?

eṣo 'śvamedhāñśatamājahāra sarasvatī prādurabhāvi yatra / (24.1) Par.?

ahārṣīdyasya hayaṃ purandaraḥ śatakratuścarame vartamāne // (24.2) Par.?

eṣa svasadmopavane sametya sanatkumāraṃ bhagavantamekam / (25.1) Par.?

ārādhya bhaktyālabhatāmalaṃ tajjñānaṃ yato brahma paraṃ vidanti // (25.2) Par.?

tatra tatra girastāstā iti viśrutavikramaḥ / (26.1) Par.?

śroṣyatyātmāśritā gāthāḥ pṛthuḥ pṛthuparākramaḥ // (26.2) Par.?

diśo vijityāpratiruddhacakraḥ svatejasotpāṭitalokaśalyaḥ / (27.1) Par.?

surāsurendrairupagīyamāna mahānubhāvo bhavitā patirbhuvaḥ // (27.2) Par.?