Texts

sūta uvāca / (1.1) Par.?

anyacca tīrthapravaraṃ japyeśvarasamīpataḥ / (1.2) Par.?

nāmnā pañcanadaṃ puṇyaṃ sarvapāpapraṇāśanam // (1.3) Par.?

trirātropoṣitastatra pūjayitvā maheśvaram / (2.1) Par.?

sarvapāpaviśuddhātmā rudraloke mahīyate // (2.2) Par.?

anyacca tīrthapravaraṃ śaṅkarasyāmitaujasaḥ / (3.1) Par.?

mahābhairavamityuktaṃ mahāpātakanāśanam // (3.2) Par.?

tīrthānāṃ ca paraṃ tīrthaṃ vitastā paramā nadī / (4.1) Par.?

sarvapāpaharā puṇyā svayameva girīndrajā // (4.2) Par.?

tīrthaṃ pañcatapaṃ nāma śaṃbhoramitatejasaḥ / (5.1) Par.?

yatra devādidevena cakrārthaṃ pūjito bhavaḥ // (5.2) Par.?

piṇḍadānādikaṃ tatra pretyānantaphalapradam / (6.1) Par.?

mṛtastatrāpi niyamād brahmaloke mahīyate // (6.2) Par.?

kāyāvarohaṇaṃ nāma mahādevālayaṃ śubham / (7.1) Par.?

yatra māheśvarā dharmā munibhiḥ sampravartitāḥ // (7.2) Par.?

śrāddhaṃ dānaṃ tapo homa upavāsastathākṣayaḥ / (8.1) Par.?

parityajati yaḥ prāṇān rudralokaṃ sa gacchati // (8.2) Par.?

anyacca tīrthapravaraṃ kanyātīrthamiti śrutam / (9.1) Par.?

tatra gatvā tyajet prāṇāṃllokān prāpnoti śāśvatān // (9.2) Par.?

jāmadagnyasya tu śubhaṃ rāmasyākliṣṭakarmaṇaḥ / (10.1) Par.?

tatra snātvā tīrthavare gosahasraphalaṃ labhet // (10.2) Par.?

mahākālamiti khyātaṃ tīrthaṃ trailokyaviśrutam / (11.1) Par.?

gatvā prāṇān parityajya gāṇapatyamavāpnuyāt // (11.2) Par.?

guhyād guhyatamaṃ tīrthaṃ nakulīśvaramuttamam / (12.1) Par.?

tatra saṃnihitaḥ śrīmān bhagavān nakulīśvaraḥ // (12.2) Par.?

himavacchikhare ramye gaṅgādvāre suśobhane / (13.1) Par.?

devyā saha mahādevo nityaṃ śiṣyaiśca saṃvṛtaḥ // (13.2) Par.?

tatra snātvā mahādevaṃ pūjayitvā vṛṣadhvajam / (14.1) Par.?

sarvapāpairvimucyeta mṛtastajjñānamāpnuyāt // (14.2) Par.?

anyacca devadevasya sthānaṃ puṇyatamaṃ śubham / (15.1) Par.?

bhīmeśvaramiti khyātaṃ gatvā muñcati pātakam // (15.2) Par.?

tathānyaccaṇḍavegāyāḥ saṃbhedaḥ pāpanāśanaḥ / (16.1) Par.?

tatra snātvā ca pītvā ca mucyate brahmahatyayā // (16.2) Par.?

sarveṣāmapi caiteṣāṃ tīrthānāṃ paramā purī / (17.1) Par.?

nāmnā vārāṇasī divyā koṭikoṭyayutādhikā // (17.2) Par.?

tasyāḥ purastānmāhātmyaṃ bhāṣitaṃ vo mayā tviha / (18.1) Par.?

nānyatra labhyate muktiryogināpyekajanmanā // (18.2) Par.?

ete prādhānyataḥ proktā deśāḥ pāpaharā nṛṇām / (19.1) Par.?

gatvā saṃkṣālayet pāpaṃ janmāntaraśataiḥ kṛtam // (19.2) Par.?

yaḥ svadharmān parityajya tīrthasevāṃ karoti hi / (20.1) Par.?

na tasya phalate tīrtham iha loke paratra ca // (20.2) Par.?

prāyaścittī ca vidhurastathā pāpacaro gṛhī / (21.1) Par.?

prakuryāt tīrthasaṃsevāṃ ye cānye tādṛśā janāḥ // (21.2) Par.?

sahāgnirvā sapatnīko gacchet tīrthāni yatnataḥ / (22.1) Par.?

sarvapāpavinirmukto yathoktāṃ gatimāpnuyāt // (22.2) Par.?

ṛṇāni trīṇyapākṛtya kuryād vā tīrthasevanam / (23.1) Par.?

vidhāya vṛttiṃ putrāṇāṃ bhāryāṃ teṣu nidhāya ca // (23.2) Par.?

prāyaścittaprasaṅgena tīrthamāhātmyamīritam / (24.1) Par.?

yaḥ paṭhecchṛṇuyād vāpi mucyate sarvapātakaiḥ // (24.2) Par.?

iti śrīkūrmapurāṇe ṣaṭsāhasryāṃ saṃhitāyāmuparivibhāge dvicatvāriṃśo 'dhyāyaḥ // (25.1) Par.?