Texts

vanaṃ gate dharmapare rāme ramayatāṃ vare / (1.1) Par.?

kausalyā rudatī svārtā bhartāram idam abravīt // (1.2) Par.?

yadyapi triṣu lokeṣu prathitaṃ te mahad yaśaḥ / (2.1) Par.?

sānukrośo vadānyaś ca priyavādī ca rāghavaḥ // (2.2) Par.?

kathaṃ naravaraśreṣṭha putrau tau saha sītayā / (3.1) Par.?

duḥkhitau sukhasaṃvṛddhau vane duḥkhaṃ sahiṣyataḥ // (3.2) Par.?

sā nūnaṃ taruṇī śyāmā sukumārī sukhocitā / (4.1) Par.?

katham uṣṇaṃ ca śītaṃ ca maithilī prasahiṣyate // (4.2) Par.?

bhuktvāśanaṃ viśālākṣī sūpadaṃśānvitaṃ śubham / (5.1) Par.?

vanyaṃ naivāram āhāraṃ kathaṃ sītopabhokṣyate // (5.2) Par.?

gītavāditranirghoṣaṃ śrutvā śubham aninditā / (6.1) Par.?

kathaṃ kravyādasiṃhānāṃ śabdaṃ śroṣyaty aśobhanam // (6.2) Par.?

mahendradhvajasaṃkāśaḥ kva nu śete mahābhujaḥ / (7.1) Par.?

bhujaṃ parighasaṃkāśam upadhāya mahābalaḥ // (7.2) Par.?

padmavarṇaṃ sukeśāntaṃ padmaniḥśvāsam uttamam / (8.1) Par.?

kadā drakṣyāmi rāmasya vadanaṃ puṣkarekṣaṇam // (8.2) Par.?

vajrasāramayaṃ nūnaṃ hṛdayaṃ me na saṃśayaḥ / (9.1) Par.?

apaśyantyā na taṃ yad vai phalatīdaṃ sahasradhā // (9.2) Par.?

yadi pañcadaśe varṣe rāghavaḥ punar eṣyati / (10.1) Par.?

jahyād rājyaṃ ca kośaṃ ca bharatenopabhokṣyate // (10.2) Par.?

evaṃ kanīyasā bhrātrā bhuktaṃ rājyaṃ viśāṃ pate / (11.1) Par.?

bhrātā jyeṣṭho variṣṭhaś ca kimarthaṃ nāvamaṃsyate // (11.2) Par.?

na pareṇāhṛtaṃ bhakṣyaṃ vyāghraḥ khāditum icchati / (12.1) Par.?

evam eva naravyāghraḥ paralīḍhaṃ na maṃsyate // (12.2) Par.?

havir ājyaṃ puroḍāśāḥ kuśā yūpāś ca khādirāḥ / (13.1) Par.?

naitāni yātayāmāni kurvanti punar adhvare // (13.2) Par.?

tathā hy āttam idaṃ rājyaṃ hṛtasārāṃ surām iva / (14.1) Par.?

nābhimantum alaṃ rāmo naṣṭasomam ivādhvaram // (14.2) Par.?

naivaṃvidham asatkāraṃ rāghavo marṣayiṣyati / (15.1) Par.?

balavān iva śārdūlo vāladher abhimarśanam // (15.2) Par.?

sa tādṛśaḥ siṃhabalo vṛṣabhākṣo nararṣabhaḥ / (16.1) Par.?

svayam eva hataḥ pitrā jalajenātmajo yathā // (16.2) Par.?

dvijāticarito dharmaḥ śāstradṛṣṭaḥ sanātanaḥ / (17.1) Par.?

yadi te dharmanirate tvayā putre vivāsite // (17.2) Par.?

gatir ekā patir nāryā dvitīyā gatir ātmajaḥ / (18.1) Par.?

tṛtīyā jñātayo rājaṃś caturthī neha vidyate // (18.2) Par.?

tatra tvaṃ caiva me nāsti rāmaś ca vanam āśritaḥ / (19.1) Par.?

na vanaṃ gantum icchāmi sarvathā hi hatā tvayā // (19.2) Par.?

hataṃ tvayā rājyam idaṃ sarāṣṭraṃ hatas tathātmā saha mantribhiś ca / (20.1) Par.?

hatā saputrāsmi hatāś ca paurāḥ sutaś ca bhāryā ca tava prahṛṣṭau // (20.2) Par.?

imāṃ giraṃ dāruṇaśabdasaṃśritāṃ niśamya rājāpi mumoha duḥkhitaḥ / (21.1) Par.?

tataḥ sa śokaṃ praviveśa pārthivaḥ svaduṣkṛtaṃ cāpi punas tadāsmarat // (21.2) Par.?