Texts

tām evaṃ bruvatīṃ tārāṃ tārādhipanibhānanām / (1.1) Par.?

vālī nirbhartsayāmāsa vacanaṃ cedam abravīt // (1.2) Par.?

garjato 'sya ca saṃrambhaṃ bhrātuḥ śatror viśeṣataḥ / (2.1) Par.?

marṣayiṣyāmy ahaṃ kena kāraṇena varānane // (2.2) Par.?

adharṣitānāṃ śūrāṇāṃ samareṣv anivartinām / (3.1) Par.?

dharṣaṇāmarṣaṇaṃ bhīru maraṇād atiricyate // (3.2) Par.?

soḍhuṃ na ca samartho 'haṃ yuddhakāmasya saṃyuge / (4.1) Par.?

sugrīvasya ca saṃrambhaṃ hīnagrīvasya garjataḥ // (4.2) Par.?

na ca kāryo viṣādas te rāghavaṃ prati matkṛte / (5.1) Par.?

dharmajñaś ca kṛtajñaś ca kathaṃ pāpaṃ kariṣyati // (5.2) Par.?

nivartasva saha strībhiḥ kathaṃ bhūyo 'nugacchasi / (6.1) Par.?

sauhṛdaṃ darśitaṃ tāre mayi bhaktiḥ kṛtā tvayā // (6.2) Par.?

pratiyotsyāmy ahaṃ gatvā sugrīvaṃ jahi sambhramam / (7.1) Par.?

darpaṃ cāsya vineṣyāmi na ca prāṇair vimokṣyate // (7.2) Par.?

śāpitāsi mama prāṇair nivartasva jayena ca / (8.1) Par.?

ahaṃ jitvā nivartiṣye tam alaṃ bhrātaraṃ raṇe // (8.2) Par.?

taṃ tu tārā pariṣvajya vālinaṃ priyavādinī / (9.1) Par.?

cakāra rudatī mandaṃ dakṣiṇā sā pradakṣiṇam // (9.2) Par.?

tataḥ svastyayanaṃ kṛtvā mantravad vijayaiṣiṇī / (10.1) Par.?

antaḥpuraṃ saha strībhiḥ praviṣṭā śokamohitā // (10.2) Par.?

praviṣṭāyāṃ tu tārāyāṃ saha strībhiḥ svam ālayam / (11.1) Par.?

nagarān niryayau kruddho mahāsarpa iva śvasan // (11.2) Par.?

sa niḥśvasya mahāvego vālī paramaroṣaṇaḥ / (12.1) Par.?

sarvataś cārayan dṛṣṭiṃ śatrudarśanakāṅkṣayā // (12.2) Par.?

sa dadarśa tataḥ śrīmān sugrīvaṃ hemapiṅgalam / (13.1) Par.?

susaṃvītam avaṣṭabdhaṃ dīpyamānam ivānalam // (13.2) Par.?

sa taṃ dṛṣṭvā mahāvīryaṃ sugrīvaṃ paryavasthitam / (14.1) Par.?

gāḍhaṃ paridadhe vāso vālī paramaroṣaṇaḥ // (14.2) Par.?

sa vālī gāḍhasaṃvīto muṣṭim udyamya vīryavān / (15.1) Par.?

sugrīvam evābhimukho yayau yoddhuṃ kṛtakṣaṇaḥ // (15.2) Par.?

śliṣṭamuṣṭiṃ samudyamya saṃrabdhataram āgataḥ / (16.1) Par.?

sugrīvo 'pi samuddiśya vālinaṃ hemamālinam // (16.2) Par.?

taṃ vālī krodhatāmrākṣaḥ sugrīvaṃ raṇapaṇḍitam / (17.1) Par.?

āpatantaṃ mahāvegam idaṃ vacanam abravīt // (17.2) Par.?

eṣa muṣṭir mayā baddho gāḍhaḥ sunihitāṅguliḥ / (18.1) Par.?

mayā vegavimuktas te prāṇān ādāya yāsyati // (18.2) Par.?

evam uktas tu sugrīvaḥ kruddho vālinam abravīt / (19.1) Par.?

tavaiva ca haran prāṇān muṣṭiḥ patatu mūrdhani // (19.2) Par.?

tāḍitas tena saṃkruddhaḥ samabhikramya vegataḥ / (20.1) Par.?

abhavac choṇitodgārī sotpīḍa iva parvataḥ // (20.2) Par.?

sugrīveṇa tu niḥsaṅgaṃ sālam utpāṭya tejasā / (21.1) Par.?

gātreṣv abhihato vālī vajreṇeva mahāgiriḥ // (21.2) Par.?

sa tu vālī pracaritaḥ sālatāḍanavihvalaḥ / (22.1) Par.?

gurubhārasamākrāntā sāgare naur ivābhavat // (22.2) Par.?

tau bhīmabalavikrāntau suparṇasamaveginau / (23.1) Par.?

pravṛddhau ghoravapuṣau candrasūryāv ivāmbare // (23.2) Par.?

vālinā bhagnadarpas tu sugrīvo mandavikramaḥ / (24.1) Par.?

vālinaṃ prati sāmarṣo darśayāmāsa lāghavam // (24.2) Par.?

tato dhanuṣi saṃdhāya śaram āśīviṣopamam / (25.1) Par.?

rāghaveṇa mahābāṇo vālivakṣasi pātitaḥ // (25.2) Par.?

tatastena mahātejā vīryotsiktaḥ kapīśvaraḥ / (26.1) Par.?

vegenābhihato vālī nipapāta mahītale // (26.2) Par.?

athokṣitaḥ śoṇitatoyavisravaiḥ supuṣpitāśoka ivāniloddhataḥ / (27.1) Par.?

vicetano vāsavasūnur āhave prabhraṃśitendradhvajavat kṣitiṃ gataḥ // (27.2) Par.?