Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 3264

Click on a sentence to show its analysis
Keep the mouse pointer over a lemma to show its meanings.

sītāyā vacanaṃ śrutvā paruṣaṃ rākṣasādhipaḥ / (1.1) Par.?

pratyuvāca tataḥ sītāṃ vipriyaṃ priyadarśanām // (1.2) Par.?

yathā yathā sāntvayitā vaśyaḥ strīṇāṃ tathā tathā / (2.1) Par.?

yathā yathā priyaṃ vaktā paribhūtastathā tathā // (2.2) Par.?

saṃniyacchati me krodhaṃ tvayi kāmaḥ samutthitaḥ / (3.1) Par.?

dravato mārgam āsādya hayān iva susārathiḥ // (3.2) Par.?

vāmaḥ kāmo manuṣyāṇāṃ yasmin kila nibadhyate / (4.1) Par.?

jane tasmiṃstvanukrośaḥ snehaśca kila jāyate // (4.2) Par.?

etasmāt kāraṇānna tvāṃ ghātayāmi varānane / (5.1) Par.?

vadhārhām avamānārhāṃ mithyāpravrajite ratām // (5.2) Par.?

paruṣāṇi hi vākyāni yāni yāni bravīṣi mām / (6.1) Par.?

teṣu teṣu vadho yuktastava maithili dāruṇaḥ // (6.2) Par.?

evam uktvā tu vaidehīṃ rāvaṇo rākṣasādhipaḥ / (7.1) Par.?

krodhasaṃrambhasaṃyuktaḥ sītām uttaram abravīt // (7.2) Par.?

dvau māsau rakṣitavyau me yo 'vadhiste mayā kṛtaḥ / (8.1) Par.?

tataḥ śayanam āroha mama tvaṃ varavarṇini // (8.2) Par.?

dvābhyām ūrdhvaṃ tu māsābhyāṃ bhartāraṃ mām anicchatīm / (9.1) Par.?

mama tvāṃ prātarāśārtham ārabhante mahānase // (9.2) Par.?

tāṃ tarjyamānāṃ samprekṣya rākṣasendreṇa jānakīm / (10.1) Par.?

devagandharvakanyāstā viṣedur vipulekṣaṇāḥ // (10.2) Par.?

oṣṭhaprakārair aparā netravaktraistathāparāḥ / (11.1) Par.?

sītām āśvāsayāmāsustarjitāṃ tena rakṣasā // (11.2) Par.?

tābhir āśvāsitā sītā rāvaṇaṃ rākṣasādhipam / (12.1) Par.?

uvācātmahitaṃ vākyaṃ vṛttaśauṇḍīryagarvitam // (12.2) Par.?

nūnaṃ na te janaḥ kaścid asti niḥśreyase sthitaḥ / (13.1) Par.?

nivārayati yo na tvāṃ karmaṇo 'smād vigarhitāt // (13.2) Par.?

māṃ hi dharmātmanaḥ patnīṃ śacīm iva śacīpateḥ / (14.1) Par.?

tvadanyastriṣu lokeṣu prārthayenmanasāpi kaḥ // (14.2) Par.?

rākṣasādhama rāmasya bhāryām amitatejasaḥ / (15.1) Par.?

uktavān asi yat pāpaṃ kva gatastasya mokṣyase // (15.2) Par.?

yathā dṛptaśca mātaṅgaḥ śaśaśca sahitau vane / (16.1) Par.?

tathā dviradavad rāmastvaṃ nīca śaśavat smṛtaḥ // (16.2) Par.?

sa tvam ikṣvākunāthaṃ vai kṣipann iha na lajjase / (17.1) Par.?

cakṣuṣo viṣayaṃ tasya na tāvad upagacchasi // (17.2) Par.?

ime te nayane krūre virūpe kṛṣṇapiṅgale / (18.1) Par.?

kṣitau na patite kasmānmām anāryanirīkṣitaḥ // (18.2) Par.?

tasya dharmātmanaḥ patnīṃ snuṣāṃ daśarathasya ca / (19.1) Par.?

kathaṃ vyāharato māṃ te na jihvā pāpa śīryate // (19.2) Par.?

asaṃdeśāt tu rāmasya tapasaścānupālanāt / (20.1) Par.?

na tvāṃ kurmi daśagrīva bhasma bhasmārhatejasā // (20.2) Par.?

nāpahartum ahaṃ śakyā tasya rāmasya dhīmataḥ / (21.1) Par.?

vidhistava vadhārthāya vihito nātra saṃśayaḥ // (21.2) Par.?

śūreṇa dhanadabhrātā balaiḥ samuditena ca / (22.1) Par.?

apohya rāmaṃ kasmāddhi dāracauryaṃ tvayā kṛtam // (22.2) Par.?

sītāyā vacanaṃ śrutvā rāvaṇo rākṣasādhipaḥ / (23.1) Par.?

vivṛtya nayane krūre jānakīm anvavaikṣata // (23.2) Par.?

nīlajīmūtasaṃkāśo mahābhujaśirodharaḥ / (24.1) Par.?

siṃhasattvagatiḥ śrīmān dīptajihvogralocanaḥ // (24.2) Par.?

calāgramakuṭaḥ prāṃśuścitramālyānulepanaḥ / (25.1) Par.?

raktamālyāmbaradharastaptāṅgadavibhūṣaṇaḥ // (25.2) Par.?

śroṇīsūtreṇa mahatā mecakena susaṃvṛtaḥ / (26.1) Par.?

amṛtotpādanaddhena bhujaṃgeneva mandaraḥ // (26.2) Par.?

taruṇādityavarṇābhyāṃ kuṇḍalābhyāṃ vibhūṣitaḥ / (27.1) Par.?

raktapallavapuṣpābhyām aśokābhyām ivācalaḥ // (27.2) Par.?

avekṣamāṇo vaidehīṃ kopasaṃraktalocanaḥ / (28.1) Par.?

uvāca rāvaṇaḥ sītāṃ bhujaṃga iva niḥśvasan // (28.2) Par.?

anayenābhisaṃpannam arthahīnam anuvrate / (29.1) Par.?

nāśayāmyaham adya tvāṃ sūryaḥ saṃdhyām ivaujasā // (29.2) Par.?

ityuktvā maithilīṃ rājā rāvaṇaḥ śatrurāvaṇaḥ / (30.1) Par.?

saṃdideśa tataḥ sarvā rākṣasīr ghoradarśanāḥ // (30.2) Par.?

ekākṣīm ekakarṇāṃ ca karṇaprāvaraṇāṃ tathā / (31.1) Par.?

gokarṇīṃ hastikarṇīṃ ca lambakarṇīm akarṇikām // (31.2) Par.?

hastipadyaśvapadyau ca gopadīṃ pādacūlikām / (32.1) Par.?

ekākṣīm ekapādīṃ ca pṛthupādīm apādikām // (32.2) Par.?

atimātraśirogrīvām atimātrakucodarīm / (33.1) Par.?

atimātrāsyanetrāṃ ca dīrghajihvām ajihvikām / (33.2) Par.?

anāsikāṃ siṃhamukhīṃ gomukhīṃ sūkarīmukhīm // (33.3) Par.?

yathā madvaśagā sītā kṣipraṃ bhavati jānakī / (34.1) Par.?

tathā kuruta rākṣasyaḥ sarvāḥ kṣipraṃ sametya ca // (34.2) Par.?

pratilomānulomaiśca sāmadānādibhedanaiḥ / (35.1) Par.?

āvartayata vaidehīṃ daṇḍasyodyamanena ca // (35.2) Par.?

iti pratisamādiśya rākṣasendraḥ punaḥ punaḥ / (36.1) Par.?

kāmamanyuparītātmā jānakīṃ paryatarjayat // (36.2) Par.?

upagamya tataḥ kṣipraṃ rākṣasī dhānyamālinī / (37.1) Par.?

pariṣvajya daśagrīvam idaṃ vacanam abravīt // (37.2) Par.?

mayā krīḍa mahārājasītayā kiṃ tavānayā / (38.1) Par.?

akāmāṃ kāmayānasya śarīram upatapyate / (38.2) Par.?

icchantīṃ kāmayānasya prītir bhavati śobhanā // (38.3) Par.?

evam uktastu rākṣasyā samutkṣiptastato balī / (39.1) Par.?

jvaladbhāskaravarṇābhaṃ praviveśa niveśanam // (39.2) Par.?

devagandharvakanyāśca nāgakanyāśca tāstataḥ / (40.1) Par.?

parivārya daśagrīvaṃ viviśustad gṛhottamam // (40.2) Par.?

sa maithilīṃ dharmaparām avasthitāṃ pravepamānāṃ paribhartsya rāvaṇaḥ / (41.1) Par.?

vihāya sītāṃ madanena mohitaḥ svam eva veśma praviveśa bhāsvaram // (41.2) Par.?

Duration=0.15153503417969 secs.