Texts

prarūḍhaśālīkṣucayāvṛtakṣitiṃ kvacitsthitakrauñcaninādarājitam / (1.1) Par.?

prakāmakāmaṃ pramadājanapriyaṃ varoru kālaṃ śiśirāhvayaṃ śṛṇu // (1.2) Par.?

niruddhavātāyanamandirodaraṃ hutāśano bhānumato gabhastayaḥ / (2.1) Par.?

gurūṇi vāsāṃsyabalāḥ sayauvanāḥ prayānti kāle 'tra janasya sevyatām // (2.2) Par.?

na candanaṃ candramarīciśītalaṃ na harmyapṛṣṭhaṃ śaradindunirmalam / (3.1) Par.?

na vāyavaḥ sāndratuṣāraśītalā janasya cittaṃ ramayanti sāmpratam // (3.2) Par.?

tuṣārasaṃghātanipātaśītalāḥ śaśāṅkabhābhiḥ śiśirīkṛtāḥ punaḥ / (4.1) Par.?

vipāṇḍutārāgaṇacārubhūṣaṇā janasya sevyā na bhavanti rātrayaḥ // (4.2) Par.?

gṛhītatāmbūlavilepanasrajaḥ puṣpāsavāmoditavaktrapaṅkajāḥ / (5.1) Par.?

prakāmakālāgurudhūpavāsitaṃ viśanti śayyāgṛhamutsukāḥ striyaḥ // (5.2) Par.?

kṛtāparādhānbahuśo 'bhitarjitān savepathūn sādhvasaluptacetasaḥ / (6.1) Par.?

nirīkṣya bhartṝn suratābhilāṣiṇaḥ striyo'parādhānsamadā visasmaruḥ // (6.2) Par.?

prakāmakāmair yuvabhiḥ sunirdayaṃ niśāsu dīrghāsvabhirāmitāściram / (7.1) Par.?

bhramanti mandaṃ śramakheditoravaḥ kṣapāvasāne navayauvanāḥ striyaḥ // (7.2) Par.?

manojñakūrpāsakapīḍitastanāḥ sarāgakauśeyakabhūṣitoravaḥ / (8.1) Par.?

niveśitāntaḥ kusumaiḥ śiroruhairvibhūṣayantīva himāgamaṃ striyaḥ // (8.2) Par.?

payodharaiḥ kuṅkumarāgapiñjaraiḥ sukhopasevyairnavayauvanoṣmabhiḥ / (9.1) Par.?

vilāsinībhiḥ paripīḍitorasaḥ svapanti śītaṃ paribhūya kāminaḥ // (9.2) Par.?

sugandhiniḥśvāsavikampitotpalaṃ manoharaṃ kāmaratiprabodhakam / (10.1) Par.?

niśāsu hṛṣṭā saha kāmibhiḥ striyaḥ pibanti madyaṃ madanīyamuttamam // (10.2) Par.?

apagatamadarāgā yoṣidekā prabhāte kṛtanibiḍakucāgrā patyurāliṅganena / (11.1) Par.?

priyatamaparibhuktaṃ vīkṣamāṇā svadehaṃ vrajati śayanavāsādvāsamanyaṃ hasantī // (11.2) Par.?

agurusurabhidhūpāmoditaṃ keśapāśaṃ galitakusumamālaṃ kuñcitāgraṃ vahantī / (12.1) Par.?

tyajati gurunitambā nimnanābhiḥ sumadhyā uṣasi śayanamanyā kāminī cāruśobhām // (12.2) Par.?

kanakakamalakāntaiś cārutāmrādharoṣṭhaiḥ śravaṇataṭaniṣaktaiḥ pāṭalopāntanetraiḥ / (13.1) Par.?

uṣasi vadanabimbairaṃsasaṃsaktakeśaiḥ śriya iva gṛhamadhye saṃsthitā yoṣito 'dya // (13.2) Par.?

pṛthujaghanabharārtāḥ kiṃcidānamramadhyāḥ stanabharaparikhedānmandamandaṃ vrajantyaḥ / (14.1) Par.?

suratasamayaveṣaṃ naiśamāśu prahāya dadhati divasayogyaṃ veśamanyāstaruṇyaḥ // (14.2) Par.?

nakhapadacitabhāgān vīkṣamāṇāḥ stanāntān adharakisalayāgraṃ dantabhinnaṃ spṛśantyaḥ / (15.1) Par.?

abhimatarataveṣaṃ nandayantyastaruṇyaḥ saviturudayakāle bhūṣayantyānanāni // (15.2) Par.?

pracuraguḍavikāraḥ svāduśālīkṣuramyaḥ prabalasuratakelirjātakandarpadarpaḥ / (16.1) Par.?

priyajanarahitānāṃ citasaṃtāpahetuḥ śiśirasamaya eṣa śreyase vo 'stu nityam // (16.2) Par.?