Texts

īśvara uvāca / (1.1) Par.?

vakṣye samāhitā yūyaṃ śṛṇudhvaṃ brahmavādinaḥ / (1.2) Par.?

māhātmyaṃ devadevasya yenedaṃ sampravartate // (1.3) Par.?

nāhaṃ tapobhirvividhairna dānena na cejyayā / (2.1) Par.?

śakyo hi puruṣairjñātumṛte bhaktimanuttamām // (2.2) Par.?

ahaṃ hi sarvabhāvānāmantastiṣṭhāmi sarvagaḥ / (3.1) Par.?

māṃ sarvasākṣiṇaṃ loko na jānāti munīśvarāḥ // (3.2) Par.?

yasyāntarā sarvamidaṃ yo hi sarvāntaraḥ paraḥ / (4.1) Par.?

so 'haṃdhātā vidhātā ca kālo 'gnirviśvatomukhaḥ // (4.2) Par.?

na māṃ paśyanti munayaḥ sarve 'pi tridivaukasaḥ / (5.1) Par.?

brahmā ca manavaḥ śakro ye cānye prathitaujasaḥ // (5.2) Par.?

gṛṇanti satataṃ vedā māmekaṃ parameśvaram / (6.1) Par.?

yajanti vividhairagniṃ brāhmaṇā vaidikairmakhaiḥ // (6.2) Par.?

sarve lokā namasyanti brahmā lokapitāmahaḥ / (7.1) Par.?

dhyāyanti yogino devaṃ bhūtādhipatimīśvaram // (7.2) Par.?

ahaṃ hi sarvahaviṣāṃ bhoktā caiva phalapradaḥ / (8.1) Par.?

sarvadevatanurbhūtvā sarvātmā sarvasaṃsthitaḥ // (8.2) Par.?

māṃ paśyantīha vidvāṃso dhārmikā vedavādinaḥ / (9.1) Par.?

teṣāṃ saṃnihito nityaṃ ye bhaktyā māmupāsate // (9.2) Par.?

brāhmaṇāḥ kṣatriyā vaiśyā dhārmikā māmupāsate / (10.1) Par.?

teṣāṃ dadāmi tat sthānamānandaṃ paramaṃ padam // (10.2) Par.?

anye 'pi ye vikarmasthāḥ śūdrādyā nīcajātayaḥ / (11.1) Par.?

bhaktimantaḥ pramucyante kālena mayi saṃgatāḥ // (11.2) Par.?

na madbhaktā vinaśyanti madbhaktā vītakalmaṣāḥ / (12.1) Par.?

ādāvetat pratijñātaṃ na me bhaktaḥ praṇaśyati // (12.2) Par.?

yo vai nindati taṃ mūḍho devadevaṃ sa nindati / (13.1) Par.?

yo hi taṃ pūjayed bhaktyā sa pūjayati māṃ sadā // (13.2) Par.?

patraṃ puṣpaṃ phalaṃ toyaṃ madārādhanakāraṇāt / (14.1) Par.?

yo me dadāti niyataḥ sa me bhaktaḥ priyo mataḥ // (14.2) Par.?

ahaṃ hi jagatāmādau brahmāṇaṃ parameṣṭhinam / (15.1) Par.?

vidhāya dattavān vedānaśeṣānātmaniḥsṛtān // (15.2) Par.?

ahameva hi sarveṣāṃ yogināṃ gururavyayaḥ / (16.1) Par.?

dhārmikāṇāṃ ca goptāhaṃ nihantā vedavidviṣām // (16.2) Par.?

ahaṃ vai sarvasaṃsārānmocako yogināmiha / (17.1) Par.?

saṃsāraheturevāhaṃ sarvasaṃsāravarjitaḥ // (17.2) Par.?

ahameva hi saṃhartā sraṣṭāhaṃ paripālakaḥ / (18.1) Par.?

māyāvī māmīkā śaktirmāyā lokavimohinī // (18.2) Par.?

mamaiva ca parā śaktiryā sā vidyate gīyate / (19.1) Par.?

nāśayāmi tayā māyāṃ yogināṃ hṛdi saṃsthitaḥ // (19.2) Par.?

ahaṃ hi sarvaśaktīnāṃ pravartakanivartakaḥ / (20.1) Par.?

ādhārabhūtaḥ sarvāsāṃ nidhānamamṛtasya ca // (20.2) Par.?

ekā sarvāntarā śaktiḥ karoti vividhaṃ jagat / (21.1) Par.?

āsthāya brahmaṇo rūpaṃ manmayī madadhiṣṭhitā // (21.2) Par.?

anyā ca śaktirvipulā saṃsthāpayati me jagat / (22.1) Par.?

bhūtvā nārāyaṇo 'nanto jagannātho jaganmayaḥ // (22.2) Par.?

tṛtīyā mahatī śaktirnihanti sakalaṃ jagat / (23.1) Par.?

tāmasī me samākhyātā kālākhyā rudrarūpiṇī // (23.2) Par.?

dhyānena māṃ prapaśyanti kecijjñānena cāpare / (24.1) Par.?

apare bhaktiyogena karmayogena cāpare // (24.2) Par.?

sarveṣāmeva bhaktānāmiṣṭaḥ priyataro mama / (25.1) Par.?

yo hi jñānena māṃ nityamārādhayati nānyathā // (25.2) Par.?

anye ca ye trayo bhaktā madārādhanakāṅkṣiṇaḥ / (26.1) Par.?

te 'pi māṃ prāpnuvantyeva nāvartante ca vai punaḥ // (26.2) Par.?

mayā tatamidaṃ kṛtsnaṃ pradhānapuruṣātmakam / (27.1) Par.?

mayyeva saṃsthitaṃ viśvaṃ mayā saṃpreryate jagat // (27.2) Par.?

nāhaṃ prerayitā viprāḥ paramaṃ yogamāśritaḥ / (28.1) Par.?

prerayāmi jagatkṛtsnametadyo veda so 'mṛtaḥ // (28.2) Par.?

paśyāmyaśeṣamevedaṃ vartamānaṃ svabhāvataḥ / (29.1) Par.?

karoti kālo bhagavān mahāyogeśvaraḥ svayam // (29.2) Par.?

yogaḥ samprocyate yogī māyā śāstreṣu sūribhiḥ / (30.1) Par.?

yogeśvaro 'sau bhagavān mahādevo mahān prabhuḥ // (30.2) Par.?

mahattvaṃ sarvatattvānāṃ paratvāt parameṣṭhinaḥ / (31.1) Par.?

procyate bhagavān brahmā mahān brahmayo 'malaḥ // (31.2) Par.?

yo māmevaṃ vijānāti mahāyogeśvareśvaram / (32.1) Par.?

so 'vikalpena yogena yujyate nātra saṃśayaḥ // (32.2) Par.?

so 'haṃ prerayitā devaḥ paramānandamāśritaḥ / (33.1) Par.?

nṛtyāmi yogī satataṃ yastad veda sa vedavit // (33.2) Par.?

iti guhyatamaṃ jñānaṃ sarvavedeṣu niṣṭhitam / (34.1) Par.?

prasannacetase deyaṃ dhārmikāyāhitāgnaye // (34.2) Par.?

iti śrīkūrmapurāṇe ṣaṭsāhasryāṃ saṃhitāyāmuparivibhāge īśvaragītāsu caturtho 'dhyāyaḥ // (35.1) Par.?