Texts

imam mahe vidathyāya śūṣaṃ śaśvat kṛtva īḍyāya pra jabhruḥ / (1.1) Par.?

śṛṇotu no damyebhir anīkaiḥ śṛṇotv agnir divyair ajasraḥ // (1.2) Par.?

mahi mahe dive arcā pṛthivyai kāmo ma icchañcarati prajānan / (2.1) Par.?

yayor ha stome vidatheṣu devāḥ saparyavo mādayante sacāyoḥ // (2.2) Par.?

yuvor ṛtaṃ rodasī satyam astu mahe ṣu ṇaḥ suvitāya pra bhūtam / (3.1) Par.?

idaṃ dive namo agne pṛthivyai saparyāmi prayasā yāmi ratnam // (3.2) Par.?

uto hi vām pūrvyā āvividra ṛtāvarī rodasī satyavācaḥ / (4.1) Par.?

naraś cid vāṃ samithe śūrasātau vavandire pṛthivi vevidānāḥ // (4.2) Par.?

ko addhā veda ka iha pra vocad devāṁ acchā pathyā kā sam eti / (5.1) Par.?

dadṛśra eṣām avamā sadāṃsi pareṣu yā guhyeṣu vrateṣu // (5.2) Par.?

kavir nṛcakṣā abhi ṣīm acaṣṭa ṛtasya yonā vighṛte madantī / (6.1) Par.?

nānā cakrāte sadanaṃ yathā veḥ samānena kratunā saṃvidāne // (6.2) Par.?

samānyā viyute dūreante dhruve pade tasthatur jāgarūke / (7.1) Par.?

uta svasārā yuvatī bhavantī ād u bruvāte mithunāni nāma // (7.2) Par.?

viśved ete janimā saṃ vivikto maho devān bibhratī na vyathete / (8.1) Par.?

ejad dhruvam patyate viśvam ekaṃ carat patatri viṣuṇaṃ vi jātam // (8.2) Par.?

sanā purāṇam adhy emy ārān mahaḥ pitur janitur jāmi tan naḥ / (9.1) Par.?

devāso yatra panitāra evair urau pathi vyute tasthur antaḥ // (9.2) Par.?

imaṃ stomaṃ rodasī pra bravīmy ṛdūdarāḥ śṛṇavann agnijihvāḥ / (10.1) Par.?

mitraḥ samrājo varuṇo yuvāna ādityāsaḥ kavayaḥ paprathānāḥ // (10.2) Par.?

hiraṇyapāṇiḥ savitā sujihvas trir ā divo vidathe patyamānaḥ / (11.1) Par.?

deveṣu ca savitaḥ ślokam aśrer ād asmabhyam ā suva sarvatātim // (11.2) Par.?

sukṛt supāṇiḥ svavāṁ ṛtāvā devas tvaṣṭāvase tāni no dhāt / (12.1) Par.?

pūṣaṇvanta ṛbhavo mādayadhvam ūrdhvagrāvāṇo adhvaram ataṣṭa // (12.2) Par.?

vidyudrathā maruta ṛṣṭimanto divo maryā ṛtajātā ayāsaḥ / (13.1) Par.?

sarasvatī śṛṇavan yajñiyāso dhātā rayiṃ sahavīraṃ turāsaḥ // (13.2) Par.?

viṣṇuṃ stomāsaḥ purudasmam arkā bhagasyeva kāriṇo yāmani gman / (14.1) Par.?

urukramaḥ kakuho yasya pūrvīr na mardhanti yuvatayo janitrīḥ // (14.2) Par.?

indro viśvair vīryaiḥ patyamāna ubhe ā paprau rodasī mahitvā / (15.1) Par.?

purandaro vṛtrahā dhṛṣṇuṣeṇaḥ saṃgṛbhyā na ā bharā bhūri paśvaḥ // (15.2) Par.?

nāsatyā me pitarā bandhupṛcchā sajātyam aśvinoś cāru nāma / (16.1) Par.?

yuvaṃ hi stho rayidau no rayīṇāṃ dātraṃ rakṣethe akavair adabdhā // (16.2) Par.?

mahat tad vaḥ kavayaś cāru nāma yaddha devā bhavatha viśva indre / (17.1) Par.?

sakha ṛbhubhiḥ puruhūta priyebhir imāṃ dhiyaṃ sātaye takṣatā naḥ // (17.2) Par.?

aryamā ṇo aditir yajñiyāso 'dabdhāni varuṇasya vratāni / (18.1) Par.?

yuyota no anapatyāni gantoḥ prajāvān naḥ paśumāṁ astu gātuḥ // (18.2) Par.?

devānāṃ dūtaḥ purudha prasūto 'nāgān no vocatu sarvatātā / (19.1) Par.?

śṛṇotu naḥ pṛthivī dyaur utāpaḥ sūryo nakṣatrair urv antarikṣam // (19.2) Par.?

śṛṇvantu no vṛṣaṇaḥ parvatāso dhruvakṣemāsa iﾱayā madantaḥ / (20.1) Par.?

ādityair no aditiḥ śṛṇotu yacchantu no marutaḥ śarma bhadram // (20.2) Par.?

sadā sugaḥ pitumāṁ astu panthā madhvā devā oṣadhīḥ sam pipṛkta / (21.1) Par.?

bhago me agne sakhye na mṛdhyā ud rāyo aśyāṃ sadanam purukṣoḥ // (21.2) Par.?

svadasva havyā sam iṣo didīhy asmadryak sam mimīhi śravāṃsi / (22.1) Par.?

viśvāṁ agne pṛtsu tāñ jeṣi śatrūn ahā viśvā sumanā dīdihī naḥ // (22.2) Par.?