Texts

agnaye mathyamānāyānubrūhīty āhādhvaryuḥ // (1) Par.?

abhi tvā devā savitar iti sāvitrīm anvāha // (2) Par.?

tad āhur yad agnaye mathyamānāyānu vācāhātha kasmāt sāvitrīm anvāheti // (3) Par.?

savitā vai prasavānām īśe / (4.1) Par.?

savitṛprasūtā evainaṃ tan manthanti / (4.2) Par.?

tasmāt sāvitrīm anvāha // (4.3) Par.?

mahī dyauḥ pṛthivī ca na iti dyāvāpṛthivīyām anvāha // (5) Par.?

tad āhur yad agnaye mathyamānāyānu vācāhātha kasmād dyāvāpṛthivīyām anvāheti / (6.1) Par.?

dyāvāpṛthivībhyāṃ vā etaṃ jātaṃ devāḥ paryagṛhṇan / (6.2) Par.?

tābhyām evādyāpi parigṛhītaḥ / (6.3) Par.?

tasmād dyāvāpṛthivīyām anvāha // (6.4) Par.?

tvām agne puṣkarād adhīti tṛcam āgneyaṃ gāyatram anvāhāgnau mathyamāne / (7.1) Par.?

svayaivainaṃ tad devatayā svena chandasā samardhayati // (7.2) Par.?

atharvā nir amanthateti rūpasamṛddham / (8.1) Par.?

etad vai yajñasya samṛddhaṃ yad rūpasamṛddhaṃ yat karma kriyamāṇam ṛg abhivadati // (8.2) Par.?

sa yadi na jāyeta yadi ciraṃ jāyeta rākṣoghnyo gāyatryo 'nūcyāḥ // (9) Par.?

agne haṃsi ny atriṇam ity etāḥ // (10) Par.?

rakṣasām apahatyai // (11) Par.?

rakṣāṃsi vā enaṃ tarhy ālabhante yarhi na jāyate yarhi ciraṃ jāyate // (12) Par.?

sa yady ekasyām evānūktāyāṃ jāyeta yadi dvayor atho ta bruvantu jantava iti jātāya jātavatīm abhirūpām anubrūyāt // (13) Par.?

yad yajñe 'bhirūpaṃ tat samṛddham // (14) Par.?

ā yaṃ haste na khādinam iti // (15) Par.?

hastābhyāṃ hy enam manthanti // (16) Par.?

śiśuṃ jātam iti / (17.1) Par.?

śiśur iva vā eṣa prathamajāto yad agniḥ // (17.2) Par.?

na bibhrati viśām agniṃ svadhvaram iti // (18) Par.?

yad vai devānāṃ neti tad eṣām om iti // (19) Par.?

pra devaṃ devavītaye bharatā vasuvittamam iti prahriyamāṇāyābhirūpā // (20) Par.?

yad yajñe'bhirūpaṃ tat samṛddham // (21) Par.?

ā sve yonau ni ṣīdatv iti // (22) Par.?

eṣa ha vā asya svo yonir yad agnir agneḥ // (23) Par.?

ā jātaṃ jātavedasīti // (24) Par.?

jāta itaro jātavedā itaraḥ // (25) Par.?

priyaṃ śiśītātithim iti / (26.1) Par.?

eṣa ha vā asya priyo 'tithir yad agnir agneḥ // (26.2) Par.?

syona ā gṛhapatim iti / (27.1) Par.?

śāntyām evainaṃ tad dadhāti // (27.2) Par.?

agnināgniḥ sam idhyate kavir gṛhapatir yuvā havyavāḍ juhvāsya ity abhirūpā // (28) Par.?

yad yajñe 'bhirūpaṃ tat samṛddham // (29) Par.?

tvaṃ hy agne agninā vipro vipreṇa san sateti // (30) Par.?

vipra itaro vipra itaraḥ / (31.1) Par.?

sann itaraḥ sann itaraḥ // (31.2) Par.?

sakhā sakhyā samidhyasa iti / (32.1) Par.?

eṣa ha vā asya svaḥ sakhā yad agnir agneḥ // (32.2) Par.?

tam marjayanta sukratum puroyāvānam ājiṣu sveṣu kṣayeṣu vājinam iti // (33) Par.?

eṣa ha vā asya svaḥ kṣayo yad agnir agneḥ // (34) Par.?

yajñena yajñam ayajanta devā ity uttamayā paridadhāti // (35) Par.?

yajñena vai tad devā yajñam ayajanta yad agnināgnim ayajanta / (36.1) Par.?

te svargaṃ lokam āyan // (36.2) Par.?

tāni dharmāṇi prathamāny āsan te ha nākam mahimānaḥ sacanta yatra pūrve sādhyāḥ santi devā iti // (37) Par.?

chandāṃsi vai sādhyā devāḥ / (38.1) Par.?

te 'gre 'gnināgnim ayajanta / (38.2) Par.?

te svargaṃ lokam āyan // (38.3) Par.?

ādityāś caivehāsann aṅgirasaś ca / (39.1) Par.?

te 'gre 'gnināgnim ayajanta / (39.2) Par.?

te svargaṃ lokam āyan // (39.3) Par.?

saiṣā svargyāhutir yad agnyāhutiḥ / (40.1) Par.?

yadi ha vā apy abrāhmaṇokto yadi duruktokto yajate 'tha haiṣāhutir gacchaty eva devān na pāpmanā saṃsṛjyate // (40.2) Par.?

gacchaty asyāhutir devān nāsyāhutiḥ pāpmanā saṃsṛjyate ya evaṃ veda // (41) Par.?

tā etās trayodaśānvāha rūpasamṛddhāḥ // (42) Par.?

etad vai yajñasya samṛddhaṃ yad rūpasamṛddhaṃ yat karma kriyamāṇam ṛg abhivadati // (43) Par.?

tāsāṃ triḥ prathamām anvāha trir uttamām / (44.1) Par.?

tāḥ saptadaśa sampadyante / (44.2) Par.?

saptadaśo vai prajāpatiḥ / (44.3) Par.?

dvādaśa māsāḥ / (44.4) Par.?

pañcartavaḥ / (44.5) Par.?

tāvān saṃvatsaraḥ / (44.6) Par.?

saṃvatsaraḥ prajāpatiḥ // (44.7) Par.?

prajāpatyāyatanābhir evābhī rādhnoti ya evaṃ veda // (45) Par.?

triḥ prathamāṃ trir uttamām anvāha / (46.1) Par.?

yajñasyaiva tad barsau nahyati sthemne balāyāvisraṃsāya // (46.2) Par.?