Texts

atha tasyāprameyasya muner vacanam uttamam / (1.1) Par.?

śrutvā puruṣaśārdūlaḥ pratyuvāca śubhāṃ giram // (1.2) Par.?

alpavīryā yadā yakṣāḥ śrūyante munipuṃgava / (2.1) Par.?

kathaṃ nāgasahasrasya dhārayaty abalā balam // (2.2) Par.?

viśvāmitro 'bravīd vākyaṃ śṛṇu yena balottarā / (3.1) Par.?

varadānakṛtaṃ vīryaṃ dhārayaty abalā balam // (3.2) Par.?

pūrvam āsīn mahāyakṣaḥ suketur nāma vīryavān / (4.1) Par.?

anapatyaḥ śubhācāraḥ sa ca tepe mahat tapaḥ // (4.2) Par.?

pitāmahas tu suprītas tasya yakṣapates tadā / (5.1) Par.?

kanyāratnaṃ dadau rāma tāṭakāṃ nāma nāmataḥ // (5.2) Par.?

dadau nāgasahasrasya balaṃ cāsyāḥ pitāmahaḥ / (6.1) Par.?

na tv eva putraṃ yakṣāya dadau brahmā mahāyaśāḥ // (6.2) Par.?

tāṃ tu jātāṃ vivardhantīṃ rūpayauvanaśālinīm / (7.1) Par.?

jambhaputrāya sundāya dadau bhāryāṃ yaśasvinīm // (7.2) Par.?

kasyacit tv atha kālasya yakṣī putraṃ vyajāyata / (8.1) Par.?

mārīcaṃ nāma durdharṣaṃ yaḥ śāpād rākṣaso 'bhavat // (8.2) Par.?

sunde tu nihate rāma agastyam ṛṣisattamam / (9.1) Par.?

tāṭakā saha putreṇa pradharṣayitum icchati // (9.2) Par.?

rākṣasatvaṃ bhajasveti mārīcaṃ vyājahāra saḥ / (10.1) Par.?

agastyaḥ paramakruddhas tāṭakām api śaptavān // (10.2) Par.?

puruṣādī mahāyakṣī virūpā vikṛtānanā / (11.1) Par.?

idaṃ rūpam apahāya dāruṇaṃ rūpam astu te // (11.2) Par.?

saiṣā śāpakṛtāmarṣā tāṭakā krodhamūrchitā / (12.1) Par.?

deśam utsādayaty enam agastyacaritaṃ śubham // (12.2) Par.?

enāṃ rāghava durvṛttāṃ yakṣīṃ paramadāruṇām / (13.1) Par.?

gobrāhmaṇahitārthāya jahi duṣṭaparākramām // (13.2) Par.?

na hy enāṃ śāpasaṃsṛṣṭāṃ kaścid utsahate pumān / (14.1) Par.?

nihantuṃ triṣu lokeṣu tvām ṛte raghunandana // (14.2) Par.?

na hi te strīvadhakṛte ghṛṇā kāryā narottama / (15.1) Par.?

cāturvarṇyahitārthāya kartavyaṃ rājasūnunā // (15.2) Par.?

rājyabhāraniyuktānām eṣa dharmaḥ sanātanaḥ / (16.1) Par.?

adharmyāṃ jahi kākutstha dharmo hy asyā na vidyate // (16.2) Par.?

śrūyate hi purā śakro virocanasutāṃ nṛpa / (17.1) Par.?

pṛthivīṃ hantum icchantīṃ mantharām abhyasūdayat // (17.2) Par.?

viṣṇunā ca purā rāma bhṛgupatnī dṛḍhavratā / (18.1) Par.?

anindraṃ lokam icchantī kāvyamātā niṣūditā // (18.2) Par.?

etaiś cānyaiś ca bahubhī rājaputramahātmabhiḥ / (19.1) Par.?

adharmaniratā nāryo hatāḥ puruṣasattamaiḥ // (19.2) Par.?