UD type:
UD sub-type:
Unclear, revisit later
Texts
Help
Select a text:
Bibliography Select a chapter:
(no revisions)
Show parallels Show headlines
Use dependency labeler
Chapter id: 3237
- Click on a sentence to show its analysis
- Keep the mouse pointer over a lemma to show its meanings.
tasyālayavariṣṭhasya madhye vipulam āyatam / (1.1)
Par.?
dadarśa bhavanaśreṣṭhaṃ hanūmānmārutātmajaḥ // (1.2)
Par.?
ardhayojanavistīrṇam āyataṃ yojanaṃ hi tat / (2.1)
Par.?
bhavanaṃ rākṣasendrasya bahuprāsādasaṃkulam // (2.2)
Par.?
mārgamāṇastu vaidehīṃ sītām āyatalocanām / (3.1)
Par.?
sarvataḥ paricakrāma hanūmān arisūdanaḥ // (3.2)
Par.?
caturviṣāṇair dviradaistriviṣāṇaistathaiva ca / (4.1)
Par.?
parikṣiptam asaṃbādhaṃ rakṣyamāṇam udāyudhaiḥ // (4.2)
Par.?
rākṣasībhiśca patnībhī rāvaṇasya niveśanam / (5.1)
Par.?
āhṛtābhiśca vikramya rājakanyābhir āvṛtam // (5.2)
Par.?
tannakramakarākīrṇaṃ timiṃgilajhaṣākulam / (6.1)
Par.?
vāyuvegasamādhūtaṃ pannagair iva sāgaram // (6.2)
Par.?
yā hi vaiśravaṇe lakṣmīr yā cendre harivāhane / (7.1)
Par.?
sā rāvaṇagṛhe sarvā nityam evānapāyinī // (7.2)
Par.?
yā ca rājñaḥ kuberasya yamasya varuṇasya ca / (8.1)
Par.?
tādṛśī tadviśiṣṭā vā ṛddhī rakṣogṛheṣviha // (8.2)
Par.?
tasya harmyasya madhyasthaṃ veśma cānyat sunirmitam / (9.1)
Par.?
bahuniryūhasaṃkīrṇaṃ dadarśa pavanātmajaḥ // (9.2)
Par.?
brahmaṇo 'rthe kṛtaṃ divyaṃ divi yad viśvakarmaṇā / (10.1)
Par.?
vimānaṃ puṣpakaṃ nāma sarvaratnavibhūṣitam // (10.2)
Par.?
pareṇa tapasā lebhe yat kuberaḥ pitāmahāt / (11.1)
Par.?
kuberam ojasā jitvā lebhe tad rākṣaseśvaraḥ // (11.2)
Par.?
īhāmṛgasamāyuktaiḥ kārtasvarahiraṇmayaiḥ / (12.1)
Par.?
sukṛtair ācitaṃ stambhaiḥ pradīptam iva ca śriyā // (12.2)
Par.?
merumandarasaṃkāśair ullikhadbhir ivāmbaram / (13.1)
Par.?
kūṭāgāraiḥ śubhākāraiḥ sarvataḥ samalaṃkṛtam // (13.2)
Par.?
jvalanārkapratīkāśaṃ sukṛtaṃ viśvakarmaṇā / (14.1)
Par.?
hemasopānasaṃyuktaṃ cārupravaravedikam // (14.2)
Par.?
jālavātāyanair yuktaṃ kāñcanaiḥ sphāṭikair api / (15.1)
Par.?
indranīlamahānīlamaṇipravaravedikam / (15.2)
Par.?
vimānaṃ puṣpakaṃ divyam āruroha mahākapiḥ // (15.3)
Par.?
tatrasthaḥ sa tadā gandhaṃ pānabhakṣyānnasaṃbhavam / (16.1)
Par.?
divyaṃ saṃmūrchitaṃ jighran rūpavantam ivānilam // (16.2)
Par.?
sa gandhastaṃ mahāsattvaṃ bandhur bandhum ivottamam / (17.1)
Par.?
ita ehītyuvāceva tatra yatra sa rāvaṇaḥ // (17.2)
Par.?
tatastāṃ prasthitaḥ śālāṃ dadarśa mahatīṃ śubhām / (18.1)
Par.?
rāvaṇasya manaḥkāntāṃ kāntām iva varastriyam // (18.2)
Par.?
maṇisopānavikṛtāṃ hemajālavirājitām / (19.1)
Par.?
sphāṭikair āvṛtatalāṃ dantāntaritarūpikām // (19.2)
Par.?
muktābhiśca pravālaiśca rūpyacāmīkarair api / (20.1)
Par.?
vibhūṣitāṃ maṇistambhaiḥ subahustambhabhūṣitām // (20.2)
Par.?
samair ṛjubhir atyuccaiḥ samantāt suvibhūṣitaiḥ / (21.1)
Par.?
stambhaiḥ pakṣair ivātyuccair divaṃ samprasthitām iva // (21.2)
Par.?
mahatyā kuthayāstīrṇāṃ pṛthivīlakṣaṇāṅkayā / (22.1)
Par.?
pṛthivīm iva vistīrṇāṃ sarāṣṭragṛhamālinīm // (22.2)
Par.?
nāditāṃ mattavihagair divyagandhādhivāsitām / (23.1)
Par.?
parārdhyāstaraṇopetāṃ rakṣo'dhipaniṣevitām // (23.2)
Par.?
dhūmrām agarudhūpena vimalāṃ haṃsapāṇḍurām / (24.1)
Par.?
citrāṃ puṣpopahāreṇa kalmāṣīm iva suprabhām // (24.2)
Par.?
manaḥsaṃhlādajananīṃ varṇasyāpi prasādinīm / (25.1)
Par.?
tāṃ śokanāśinīṃ divyāṃ śriyaḥ saṃjananīm iva // (25.2)
Par.?
indriyāṇīndriyārthaistu pañca pañcabhir uttamaiḥ / (26.1)
Par.?
tarpayāmāsa māteva tadā rāvaṇapālitā // (26.2)
Par.?
svargo 'yaṃ devaloko 'yam indrasyeyaṃ purī bhavet / (27.1)
Par.?
siddhir veyaṃ parā hi syād ityamanyata mārutiḥ // (27.2)
Par.?
pradhyāyata ivāpaśyat pradīpāṃstatra kāñcanān / (28.1)
Par.?
dhūrtān iva mahādhūrtair devanena parājitān // (28.2)
Par.?
dīpānāṃ ca prakāśena tejasā rāvaṇasya ca / (29.1)
Par.?
arcirbhir bhūṣaṇānāṃ ca pradīptetyabhyamanyata // (29.2)
Par.?
tato 'paśyat kuthāsīnaṃ nānāvarṇāmbarasrajam / (30.1)
Par.?
sahasraṃ varanārīṇāṃ nānāveṣavibhūṣitam // (30.2)
Par.?
parivṛtte 'rdharātre tu pānanidrāvaśaṃ gatam / (31.1)
Par.?
krīḍitvoparataṃ rātrau suṣvāpa balavat tadā // (31.2)
Par.?
tat prasuptaṃ viruruce niḥśabdāntarabhūṣaṇam / (32.1)
Par.?
niḥśabdahaṃsabhramaraṃ yathā padmavanaṃ mahat // (32.2)
Par.?
tāsāṃ saṃvṛtadantāni mīlitākṣāṇi mārutiḥ / (33.1)
Par.?
apaśyat padmagandhīni vadanāni suyoṣitām // (33.2)
Par.?
prabuddhānīva padmāni tāsāṃ bhūtvā kṣapākṣaye / (34.1)
Par.?
punaḥsaṃvṛtapatrāṇi rātrāviva babhustadā // (34.2)
Par.?
imāni mukhapadmāni niyataṃ mattaṣaṭpadāḥ / (35.1)
Par.?
ambujānīva phullāni prārthayanti punaḥ punaḥ // (35.2)
Par.?
iti vāmanyata śrīmān upapattyā mahākapiḥ / (36.1)
Par.?
mene hi guṇatastāni samāni salilodbhavaiḥ // (36.2)
Par.?
sā tasya śuśubhe śālā tābhiḥ strībhir virājitā / (37.1)
Par.?
śāradīva prasannā dyaustārābhir abhiśobhitā // (37.2)
Par.?
sa ca tābhiḥ parivṛtaḥ śuśubhe rākṣasādhipaḥ / (38.1)
Par.?
yathā hyuḍupatiḥ śrīmāṃstārābhir abhisaṃvṛtaḥ // (38.2)
Par.?
yāścyavante 'mbarāt tārāḥ puṇyaśeṣasamāvṛtāḥ / (39.1)
Par.?
imāstāḥ saṃgatāḥ kṛtsnā iti mene haristadā // (39.2)
Par.?
tārāṇām iva suvyaktaṃ mahatīnāṃ śubhārciṣām / (40.1)
Par.?
prabhāvarṇaprasādāśca virejustatra yoṣitām // (40.2)
Par.?
vyāvṛttagurupīnasrakprakīrṇavarabhūṣaṇāḥ / (41.1)
Par.?
pānavyāyāmakāleṣu nidrāpahṛtacetasaḥ // (41.2)
Par.?
vyāvṛttatilakāḥ kāścit kāścid udbhrāntanūpurāḥ / (42.1)
Par.?
pārśve galitahārāśca kāścit paramayoṣitaḥ // (42.2)
Par.?
muktāhāravṛtāścānyāḥ kāścit prasrastavāsasaḥ / (43.1)
Par.?
vyāviddharaśanādāmāḥ kiśorya iva vāhitāḥ // (43.2)
Par.?
sukuṇḍaladharāścānyā vicchinnamṛditasrajaḥ / (44.1)
Par.?
gajendramṛditāḥ phullā latā iva mahāvane // (44.2)
Par.?
candrāṃśukiraṇābhāśca hārāḥ kāsāṃcid utkaṭāḥ / (45.1)
Par.?
haṃsā iva babhuḥ suptāḥ stanamadhyeṣu yoṣitām // (45.2)
Par.?
aparāsāṃ ca vaidūryāḥ kādambā iva pakṣiṇaḥ / (46.1)
Par.?
hemasūtrāṇi cānyāsāṃ cakravākā ivābhavan // (46.2)
Par.?
haṃsakāraṇḍavākīrṇāścakravākopaśobhitāḥ / (47.1)
Par.?
āpagā iva tā rejur jaghanaiḥ pulinair iva // (47.2)
Par.?
kiṅkiṇījālasaṃkāśāstā hemavipulāmbujāḥ / (48.1)
Par.?
bhāvagrāhā yaśastīrāḥ suptā nadya ivābabhuḥ // (48.2)
Par.?
mṛduṣvaṅgeṣu kāsāṃcit kucāgreṣu ca saṃsthitāḥ / (49.1)
Par.?
babhūvur bhūṣaṇānīva śubhā bhūṣaṇarājayaḥ // (49.2)
Par.?
aṃśukāntāśca kāsāṃcin mukhamārutakampitāḥ / (50.1)
Par.?
uparyupari vaktrāṇāṃ vyādhūyante punaḥ punaḥ // (50.2)
Par.?
tāḥ patākā ivoddhūtāḥ patnīnāṃ ruciraprabhāḥ / (51.1)
Par.?
nānāvarṇasuvarṇānāṃ vaktramūleṣu rejire // (51.2)
Par.?
vavalguścātra kāsāṃcit kuṇḍalāni śubhārciṣām / (52.1)
Par.?
mukhamārutasaṃsargānmandaṃ mandaṃ suyoṣitām // (52.2)
Par.?
śarkarāsavagandhaḥ sa prakṛtyā surabhiḥ sukhaḥ / (53.1)
Par.?
tāsāṃ vadananiḥśvāsaḥ siṣeve rāvaṇaṃ tadā // (53.2)
Par.?
rāvaṇānanaśaṅkāśca kāścid rāvaṇayoṣitaḥ / (54.1)
Par.?
mukhāni sma sapatnīnām upājighran punaḥ punaḥ // (54.2)
Par.?
atyarthaṃ saktamanaso rāvaṇe tā varastriyaḥ / (55.1)
Par.?
asvatantrāḥ sapatnīnāṃ priyam evācaraṃstadā // (55.2)
Par.?
bāhūn upanidhāyānyāḥ pārihāryavibhūṣitāḥ / (56.1)
Par.?
aṃśukāni ca ramyāṇi pramadāstatra śiśyire // (56.2)
Par.?
anyā vakṣasi cānyasyāstasyāḥ kācit punar bhujam / (57.1)
Par.?
aparā tvaṅkam anyasyāstasyāścāpyaparā bhujau // (57.2)
Par.?
ūrupārśvakaṭīpṛṣṭham anyonyasya samāśritāḥ / (58.1)
Par.?
parasparaniviṣṭāṅgyo madasnehavaśānugāḥ // (58.2)
Par.?
anyonyasyāṅgasaṃsparśāt prīyamāṇāḥ sumadhyamāḥ / (59.1)
Par.?
ekīkṛtabhujāḥ sarvāḥ suṣupustatra yoṣitaḥ // (59.2)
Par.?
anyonyabhujasūtreṇa strīmālā grathitā hi sā / (60.1)
Par.?
māleva grathitā sūtre śuśubhe mattaṣaṭpadā // (60.2)
Par.?
latānāṃ mādhave māsi phullānāṃ vāyusevanāt / (61.1)
Par.?
anyonyamālāgrathitaṃ saṃsaktakusumoccayam // (61.2)
Par.?
vyativeṣṭitasuskandham anyonyabhramarākulam / (62.1)
Par.?
āsīd vanam ivoddhūtaṃ strīvanaṃ rāvaṇasya tat // (62.2)
Par.?
uciteṣvapi suvyaktaṃ na tāsāṃ yoṣitāṃ tadā / (63.1)
Par.?
vivekaḥ śakya ādhātuṃ bhūṣaṇāṅgāmbarasrajām // (63.2)
Par.?
rāvaṇe sukhasaṃviṣṭe tāḥ striyo vividhaprabhāḥ / (64.1)
Par.?
jvalantaḥ kāñcanā dīpāḥ prekṣantānimiṣā iva // (64.2)
Par.?
rājarṣipitṛdaityānāṃ gandharvāṇāṃ ca yoṣitaḥ / (65.1)
Par.?
rakṣasāṃ cābhavan kanyāstasya kāmavaśaṃ gatāḥ // (65.2)
Par.?
na tatra kācit pramadā prasahya vīryopapannena guṇena labdhā / (66.1)
Par.?
na cānyakāmāpi na cānyapūrvā vinā varārhāṃ janakātmajāṃ tu // (66.2) Par.?
na cākulīnā na ca hīnarūpā nādakṣiṇā nānupacārayuktā / (67.1)
Par.?
bhāryābhavat tasya na hīnasattvā na cāpi kāntasya na kāmanīyā // (67.2)
Par.?
babhūva buddhistu harīśvarasya yadīdṛśī rāghavadharmapatnī / (68.1)
Par.?
imā yathā rākṣasarājabhāryāḥ sujātam asyeti hi sādhubuddheḥ // (68.2)
Par.?
punaśca so 'cintayad ārtarūpo dhruvaṃ viśiṣṭā guṇato hi sītā / (69.1)
Par.?
athāyam asyāṃ kṛtavānmahātmā laṅkeśvaraḥ kaṣṭam anāryakarma // (69.2)
Par.?
Duration=0.20718908309937 secs.