Texts

sūta uvāca / (1.1) Par.?

ata ūrdhvaṃ pravakṣyāmi yatīnāmiha niścitam / (1.2) Par.?

prāyaścittaṃ śivaproktaṃ yatīnāṃ pāpaśodhanam // (1.3) Par.?

pāpaṃ hi trividhaṃ jñeyaṃ vāṅmanaḥkāyasaṃbhavam / (2.1) Par.?

satataṃ hi divā rātrau yenedaṃ veṣṭyate jagat // (2.2) Par.?

tatkarmaṇā vināpyeṣa tiṣṭhatīti parā śrutiḥ / (3.1) Par.?

kṣaṇamevaṃ prayojyaṃ tu āyuṣyaṃ tu vidhāraṇam // (3.2) Par.?

bhavedyogo 'pramattasya yogo hi paramaṃ balam / (4.1) Par.?

na hi yogātparaṃ kiṃcin narāṇāṃ dṛśyate śubham // (4.2) Par.?

tasmād yogaṃ praśaṃsanti dharmayuktā manīṣiṇaḥ / (5.1) Par.?

avidyāṃ vidyayā jitvā prāpyaiśvaryamanuttamam // (5.2) Par.?

dṛṣṭvā parāvaraṃ dhīrāḥ paraṃ gacchanti tatpadam / (6.1) Par.?

vratāni yāni bhikṣūṇāṃ tathaivopavratāni ca // (6.2) Par.?

ekaikātikrame teṣāṃ prāyaścittaṃ vidhīyate / (7.1) Par.?

upetya tu striyaṃ kāmātprāyaścittaṃ vinirdiśet // (7.2) Par.?

prāṇāyāmasamāyuktaṃ caretsāṃtapanaṃ vratam / (8.1) Par.?

tataścarati nirdeśātkṛcchraṃ cānte samāhitaḥ // (8.2) Par.?

punar āśramam āgatya caredbhikṣuratandritaḥ / (9.1) Par.?

na dharmayuktamanṛtaṃ hinastīti manīṣiṇaḥ // (9.2) Par.?

tathāpi na ca kartavyaṃ prasaṃgo hyeṣa dāruṇaḥ / (10.1) Par.?

ahorātropavāsaś ca prāṇāyāmaśataṃ tathā // (10.2) Par.?

asadvādo na kartavyo yatinā dharmalipsunā / (11.1) Par.?

paramāpadgatenāpi na kāryaṃ steyamapyuta // (11.2) Par.?

steyādabhyadhikaḥ kaścinnāstyadharma iti śrutiḥ / (12.1) Par.?

hiṃsā hyeṣā parā sṛṣṭā stainyaṃ vai kathitaṃ tathā // (12.2) Par.?

yadetaddraviṇaṃ nāma prāṇā hyete bahiścarāḥ / (13.1) Par.?

sa tasya harate prāṇānyo yasya harate dhanam // (13.2) Par.?

evaṃ kṛtvā suduṣṭātmā bhinnavṛtto vratāccyutaḥ / (14.1) Par.?

bhūyo nirvedamāpannaścareccāndrāyaṇaṃ vratam // (14.2) Par.?

vidhinā śāstradṛṣṭena saṃvatsaramiti śrutiḥ / (15.1) Par.?

tataḥ saṃvatsarasyānte bhūyaḥ prakṣīṇakalmaṣaḥ / (15.2) Par.?

punarnirvedamāpannaścaredbhikṣuratandritaḥ // (15.3) Par.?

ahiṃsā sarvabhūtānāṃ karmaṇā manasā girā / (16.1) Par.?

akāmādapi hiṃseta yadi bhikṣuḥ paśūn kṛmīn // (16.2) Par.?

kṛcchrātikṛcchraṃ kurvīta cāndrāyaṇamathāpi vā / (17.1) Par.?

skandedindriyadaurbalyāt striyaṃ dṛṣṭvā yatiryadi // (17.2) Par.?

tena dhārayitavyā vai prāṇāyāmāstu ṣoḍaśa / (18.1) Par.?

divā skannasya viprasya prāyaścittaṃ vidhīyate // (18.2) Par.?

trirātramupavāsāś ca prāṇāyāmaśataṃ tathā / (19.1) Par.?

rātrau skannaḥ śuciḥ snātvā dvādaśaiva tu dhāraṇā // (19.2) Par.?

prāṇāyāmena śuddhātmā virajā jāyate dvijāḥ / (20.1) Par.?

ekānnaṃ madhumāṃsaṃ vā aśṛtānnaṃ tathaiva ca // (20.2) Par.?

abhojyāni yatīnāṃ tu pratyakṣalavaṇāni ca / (21.1) Par.?

ekaikātikramātteṣāṃ prāyaścittaṃ vidhīyate // (21.2) Par.?

prājāpatyena kṛcchreṇa tataḥ pāpātpramucyate / (22.1) Par.?

vyatikramāś ca ye kecid vāṅmanaḥkāyasaṃbhavāḥ // (22.2) Par.?

sadbhiḥ saha viniścitya yadbrūyustatsamācaret // (23.1) Par.?

careddhi śuddhaḥ samaloṣṭakāñcanaḥ samastabhūteṣu ca satsamāhitaḥ / (24.1) Par.?

sthānaṃ dhruvaṃ śāśvatamavyayaṃ tu paraṃ hi gatvā na punarhi jāyate // (24.2) Par.?

iti śrīliṅgamahāpurāṇe pūrvabhāge yatiprāyaścittaṃ nāma navatitamo 'dhyāyaḥ // (25.1) Par.?