Texts

mārkaṇḍeya uvāca / (1.1) Par.?

manmatheśaṃ tato gacchet sarvadevanamaskṛtam / (1.2) Par.?

snānamātrānnaro rājanyamalokaṃ na paśyati // (1.3) Par.?

anapatyā yā ca nārī snāyād vai pāṇḍunandana / (2.1) Par.?

putraṃ sā labhate pārtha satyasaṅghaṃ dṛḍhavratam // (2.2) Par.?

tatra snātvā naro rājañchuciḥ prayatamānasaḥ / (3.1) Par.?

upoṣya rajanīmekāṃ gosahasraphalaṃ labhet // (3.2) Par.?

kāmikaṃ tīrtharājaṃ tu tādṛśaṃ na bhaviṣyati / (4.1) Par.?

trirātraṃ kurute rājansa golakṣaphalaṃ labhet // (4.2) Par.?

tatra nṛtyaṃ prakartavyaṃ tuṣyate parameśvaraḥ / (5.1) Par.?

gītavāditranirghoṣai rātrau jāgaraṇena ca // (5.2) Par.?

eraṇḍyāṃ ca mahādevo dṛṣṭo me manmatheśvaraḥ / (6.1) Par.?

kiṃ samartho yamo ruṣṭo bhadro bhadrāṇi paśyati // (6.2) Par.?

kāmena sthāpitaḥ śambhuretasmāt kāmado nṛpa / (7.1) Par.?

sopānaḥ svargamārgasya pṛthivyāṃ manmatheśvaraḥ // (7.2) Par.?

viśeṣaścātra sandhyāyāṃ śrāddhadāne ca bhārata / (8.1) Par.?

annadānena rājendra kīrtitaṃ phalamuttamam // (8.2) Par.?

etatte sarvamākhyātaṃ tava bhaktyā tu bhārata / (9.1) Par.?

pṛthivyāṃ sāgarāntāyāṃ prakhyāto manmatheśvaraḥ // (9.2) Par.?

godānaṃ pāṇḍavaśreṣṭha trayodaśyāṃ prakārayet / (10.1) Par.?

caitre māsi site pakṣe tatra gatvā jitendriyaḥ // (10.2) Par.?

rātrau jāgaraṇaṃ kṛtvā devasyāgre nṛpottama / (11.1) Par.?

dīpaṃ bhaktyā ghṛtenaiva devasyāgre nivedayet // (11.2) Par.?

stryatha vā puruṣo vāpi samametatphalaṃ smṛtam // (12.1) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe manmatheśvaratīrthamāhātmyavarṇanaṃ nāma dvyadhikaśatatamo 'dhyāyaḥ // (13.1) Par.?