Texts

Help

Select a text:
Bibliography
Select a chapter:
 (no revisions)
Associated topic(s): avatāras

Show parallels  Show headlines
Use dependency labeler
Chapter id: 16912
  • Click on a sentence to show its analysis
  • Keep the mouse pointer over a lemma to show its meanings.
śrutas te daityasainyasya vistaras tāta vigrahe / (1.1) Par.?
surāṇāṃ sarvasainyasya vistaraṃ vaiṣṇavaṃ śṛṇu // (1.2) Par.?
ādityā vasavo rudrā aśvinau ca mahābalau / (2.1) Par.?
sabalāḥ sānugāś caiva saṃnahyanta yathākramam // (2.2) Par.?
puruhūtas tu purato lokapālaḥ sahasradṛk / (3.1) Par.?
grāmaṇīḥ sarvadevānām āruroha suradvipam // (3.2) Par.?
savye cāsya rathaḥ pārśve pakṣipravaravegavān / (4.1) Par.?
sucārucakracaraṇo hemavajrapariṣkṛtaḥ // (4.2) Par.?
devagandharvayakṣaughair anuyātaḥ sahasraśaḥ / (5.1) Par.?
dīptimadbhiḥ sadasyaiś ca brahmarṣibhir abhiṣṭutaḥ // (5.2) Par.?
vajravisphūrjitoddhūtair vidyudindrāyudhārpitaiḥ / (6.1) Par.?
gupto balāhakagaṇaiḥ parvatair iva kāmagaiḥ // (6.2) Par.?
yam ārūḍhaḥ sa bhagavān paryeti maghavān gajam / (7.1) Par.?
havirdhāneṣu gāyanti viprā makhamukhe sthitāḥ // (7.2) Par.?
svarge śakrānuyāteṣu devatūryānunādiṣu / (8.1) Par.?
indraṃ samupanṛtyanti śataśo hy apsarogaṇāḥ // (8.2) Par.?
ketunā vaṃśarājena bhrājamāno yathā raviḥ / (9.1) Par.?
yukto hayasahasreṇa manomārutaraṃhasā // (9.2) Par.?
sa syandanavaro bhāti yukto mātalinā tadā / (10.1) Par.?
kṛtsnaḥ parivṛto merur bhāskarasyeva tejasā // (10.2) Par.?
yamas tu daṇḍam udyamya kālayuktaṃ ca mudgaram / (11.1) Par.?
tasthau suragaṇānīke daityān nādena bhīṣayan // (11.2) Par.?
caturbhiḥ sāgarair gupto lelihadbhiś ca pannagaiḥ / (12.1) Par.?
śaṅkhamuktāṅgadadharo bibhrat toyamayaṃ vapuḥ // (12.2) Par.?
kālapāśān samāvidhya hayaiḥ śaśikaropamaiḥ / (13.1) Par.?
vāyvīritajalodgāraiḥ kurvaṃl līlāḥ sahasraśaḥ // (13.2) Par.?
pāṇḍuroddhūtavasanaḥ pravālarucirāṅgadaḥ / (14.1) Par.?
maṇiśyāmottamavapur hārabhārārpitodaraḥ // (14.2) Par.?
varuṇaḥ pāśabhṛnmadhye devānīkasya tasthivān / (15.1) Par.?
yuddhavelām abhilaṣan bhinnavela ivārṇavaḥ // (15.2) Par.?
yakṣarākṣasasainyena guhyakānāṃ gaṇair api / (16.1) Par.?
yuktaś ca śaṅkhapadmābhyāṃ nidhīnām adhipaḥ prabhuḥ / (16.2) Par.?
rājarājeśvaraḥ śrīmān gadāpāṇir adṛśyata // (16.3) Par.?
vimānayodhī dhanado vimāne puṣpake sthitaḥ / (17.1) Par.?
sa rājarājaḥ śuśubhe yuddhārthī naravāhanaḥ / (17.2) Par.?
prekṣamāṇaḥ śivasakhaḥ sākṣād iva śivaḥ svayam // (17.3) Par.?
pūrvaṃ pakṣaṃ sahasrākṣaḥ pitṛrājas tu dakṣiṇam / (18.1) Par.?
varuṇaḥ paścimaṃ pakṣam uttaraṃ naravāhanaḥ // (18.2) Par.?
caturṣu yuktāś catvāro lokapālā balotkaṭāḥ / (19.1) Par.?
svāṃ svāṃ diśaṃ rarakṣus te tasya devabalasya ha // (19.2) Par.?
sūryaḥ saptāśvayuktena rathenāmbaragāminā / (20.1) Par.?
śriyā jājvalyamānena dīpyamānaiś ca raśmibhiḥ // (20.2) Par.?
udayāstagacakreṇa meruparyantagāminā / (21.1) Par.?
tridivadvāracitreṇa tapatā lokam avyayam // (21.2) Par.?
sahasraraśmiyuktena bhrājamānena tejasā / (22.1) Par.?
cacāra madhye devānāṃ dvādaśātmā dineśvaraḥ // (22.2) Par.?
somaḥ śvetahayo bhāti syandane śītaraśmivān / (23.1) Par.?
himatoyaprapūrṇābhir bhābhir āplāvayañ jagat // (23.2) Par.?
tam ṛkṣayogānugataṃ śiśirāṃśuṃ dvijeśvaram / (24.1) Par.?
śaśacchāyāṅkitatanuṃ naiśasya tamasaḥ kṣayam // (24.2) Par.?
jyotiṣām īraṇaṃ vyomni rasānāṃ rasanaṃ prabhum / (25.1) Par.?
oṣadhīnāṃ paritrāṇaṃ nidhānam amṛtasya ca // (25.2) Par.?
jagataḥ prathamaṃ bhāgaṃ saumyaṃ śaityamayaṃ rasam / (26.1) Par.?
dadṛśur dānavāḥ somaṃ himapraharaṇaṃ sthitam // (26.2) Par.?
yaḥ prāṇaḥ sarvabhūtānāṃ pañcadhā bhidyate nṛṣu / (27.1) Par.?
saptaskandhagato lokāṃs trīn dadhāra cacāra ca // (27.2) Par.?
yam āhur agner yantāraṃ sarvaprabhavam īśvaram / (28.1) Par.?
saptasvaragatā yasya yonir gīrbhir udīryate // (28.2) Par.?
yaṃ vadanty uttamaṃ bhūtaṃ yaṃ vadanty aśarīriṇam / (29.1) Par.?
yam āhur ākāśagamaṃ śīghragaṃ śabdayoninam // (29.2) Par.?
sa vāyuḥ sarvabhūtāyur uddhataḥ svena tejasā / (30.1) Par.?
pravavau vyathayan daityān pratilomaḥ satoyadaḥ // (30.2) Par.?
maruto devagandharvā vidyādharagaṇaiḥ saha / (31.1) Par.?
cikrīḍur asibhiḥ śubhrair nirmuktair iva pannagaiḥ // (31.2) Par.?
sṛjantaḥ sarpapatayas tīvraṃ roṣamayaṃ viṣam / (32.1) Par.?
śarabhūtāḥ surendrāṇāṃ cerur vyāttamukhā divi // (32.2) Par.?
parvatās tu śilāśṛṅgaiḥ śataśākhaiś ca pādapaiḥ / (33.1) Par.?
upatasthuḥ suragaṇān prahartuṃ dānavaṃ balam // (33.2) Par.?
yaḥ sa devo hṛṣīkeśaḥ padmanābhas trivikramaḥ / (34.1) Par.?
kṛṣṇavartmā yugāntābho viśvasya jagataḥ prabhuḥ // (34.2) Par.?
samudrayonir madhuhā havyabhuk kratusatkṛtaḥ / (35.1) Par.?
bhūmyāpovyomabhūtātmā śyāmaḥ śāntikaro 'rihā // (35.2) Par.?
so 'rkam agnāv ivodyantam udyamyottamatejasam / (36.1) Par.?
arighnam asurānīke cakraṃ cakragadādharaḥ / (36.2) Par.?
saparīveṣam udyantaṃ savitur maṇḍalaṃ yathā // (36.3) Par.?
savyenālambya mahatīṃ sarvāsuravināśinīm / (37.1) Par.?
kareṇa kālīṃ vapuṣā śatrukālapradāṃ gadām // (37.2) Par.?
śeṣair bhujaiḥ pradīptāni bhujagāridhvajaḥ prabhuḥ / (38.1) Par.?
dadhārāyudhajātāni śārṅgādīni mahāyaśāḥ // (38.2) Par.?
sa kaśyapasyātmabhuvaṃ dvijaṃ bhujagabhojanam / (39.1) Par.?
pavanādhikasaṃpātaṃ gaganakṣobhaṇaṃ khagam // (39.2) Par.?
bhujagendreṇa vadane niviṣṭena virājitam / (40.1) Par.?
amṛtārambhanirmuktaṃ mandarādrim ivocchritam // (40.2) Par.?
devāsuravimardeṣu śataśo dṛṣṭavikramam / (41.1) Par.?
mahendreṇāmṛtasyārthe vajreṇa kṛtalakṣaṇam // (41.2) Par.?
śikhinaṃ cūḍinaṃ caiva taptakuṇḍalabhūṣaṇam / (42.1) Par.?
vicitrapatravasanaṃ dhātumantam ivācalam // (42.2) Par.?
sphītakroḍāvalambena śītāṃśusamatejasā / (43.1) Par.?
bhogibhogāvasaktena maṇiratnena bhāsvatā // (43.2) Par.?
pakṣābhyāṃ cārupatrābhyām āvṛtya divi līlayā / (44.1) Par.?
yugānte sendracāpābhyāṃ toyadābhyām ivāmbaram // (44.2) Par.?
nīlalohitapītābhiḥ patākābhir alaṃkṛtam / (45.1) Par.?
ketuveṣapraticchannaṃ mahākāyaniketanam // (45.2) Par.?
aruṇāvarajaṃ śrīmān āruroha raṇe hariḥ / (46.1) Par.?
suparṇaḥ svena vapuṣā suparṇaṃ khecarottamam // (46.2) Par.?
tam anvayur devagaṇā munayaś ca samāhitāḥ / (47.1) Par.?
gīrbhiḥ paramamantrābhis tuṣṭuvuś ca gadādharam // (47.2) Par.?
tad vaiśravaṇasuśliṣṭaṃ vaivasvatapuraḥsaram / (48.1) Par.?
vārirājaparikṣiptaṃ devarājavirājitam // (48.2) Par.?
candraprabhābhir vimalaṃ yuddhāya samavasthitam / (49.1) Par.?
pavanāviddhanirghoṣaṃ saṃpradīptahutāśanam // (49.2) Par.?
viṣṇor jiṣṇoḥ sahiṣṇoś ca bhrājiṣṇos tejasā vṛtam / (50.1) Par.?
balaṃ balavaduddhūtaṃ yuddhāya samavartata // (50.2) Par.?
svasty astu devebhya iti stuvaṃs tatrāṅgirābravīt / (51.1) Par.?
svasty astu daityebhya iti uśanā vākyam abravīt // (51.2) Par.?
Duration=0.34225511550903 secs.