Texts

Help

Select a text:
Bibliography
Select a chapter:
 (no revisions)
Associated topic(s): Birth, childhood, and youth, Kaṃsa

Show parallels  Show headlines
Use dependency labeler
Chapter id: 17437
  • Click on a sentence to show its analysis
  • Keep the mouse pointer over a lemma to show its meanings.
vaiśaṃpāyana uvāca / (1.1) Par.?
rauhiṇeyo hate tasmiṃś cāṇūre baladarpite / (1.2) Par.?
jagrāha muṣṭikaṃ raṅge kṛṣṇas tosalakaṃ punaḥ // (1.3) Par.?
saṃnipāte tu tau mallau prathame krodhamūrchitau / (2.1) Par.?
sameyātāṃ rāmakṛṣṇau kālasya vaśavartinau // (2.2) Par.?
kṛṣṇas tosalam udyamya giriśṛṅgopamaṃ balī / (3.1) Par.?
bhrāmayitvā śataguṇaṃ niṣpipeṣa mahītale // (3.2) Par.?
tasya kṛṣṇābhipannasya pīḍitasya balīyasā / (4.1) Par.?
mukhād rudhiram atyartham ājagāma mumūrṣataḥ // (4.2) Par.?
saṃkarṣaṇas tu suciraṃ yodhayitvā mahābalaḥ / (5.1) Par.?
andhramallaṃ mahāmallo maṇḍalāni vidarśayan // (5.2) Par.?
muṣṭinaikena tejasvī sāśanistanayitnunā / (6.1) Par.?
śirasy abhyahanad vīro vajreṇeva mahāgirim // (6.2) Par.?
sa niṣpatitamastiṣko visrastanayanānanaḥ / (7.1) Par.?
papātābhimukhas tatra tato nādo mahān abhūt // (7.2) Par.?
andhratosalakau hatvā kṛṣṇasaṃkarṣaṇāv ubhau / (8.1) Par.?
krodhasaṃraktanayanau raṅgamadhye vavalgatuḥ // (8.2) Par.?
samājavāṭo nirmallaḥ so 'bhavad bhīmadarśanaḥ / (9.1) Par.?
andhre tadā mahāmalle muṣṭike ca nipātite // (9.2) Par.?
ye ca saṃprekṣakā gopā nandagopapurogamāḥ / (10.1) Par.?
bhayakṣobhitasarvāṅgāḥ sarve tatrāvatasthire // (10.2) Par.?
harṣajaṃ vāri netrābhyāṃ vartayānā pravepatī / (11.1) Par.?
prasnavotpīḍitā kṛṣṇaṃ devakī samudaikṣata // (11.2) Par.?
kṛṣṇadarśanayuktena bāṣpeṇākulitekṣaṇaḥ / (12.1) Par.?
vasudevo jarāṃ tyaktvā snehena taruṇāyate // (12.2) Par.?
vāramukhyāś ca tāḥ sarvāḥ kṛṣṇasya mukhapaṅkajam / (13.1) Par.?
papur hi netrabhramarair nimeṣāntaragāmibhiḥ // (13.2) Par.?
kaṃsasyāpi mukhe svedo bhrūbhedāntaragocaraḥ / (14.1) Par.?
abhavad roṣaniryāsaḥ kṛṣṇasaṃdarśaneritaḥ // (14.2) Par.?
keśavāyāsadhūmena roṣaniḥśvāsavāyunā / (15.1) Par.?
dīptam antargataṃ tasya hṛdayaṃ mānasāgninā // (15.2) Par.?
tasya prasphuritauṣṭhasya bhinnālīkasya tasya vai / (16.1) Par.?
kaṃsavaktrasya roṣeṇa raktasūryāyate vapuḥ // (16.2) Par.?
krodharaktān mukhāt tasya prasṛtāḥ svedabindavaḥ / (17.1) Par.?
udyatasyeva sūryasya prasṛtāḥ pādapaṅktayaḥ // (17.2) Par.?
so ājñāpayata saṃkruddhaḥ puruṣān vyāyatān bahūn / (18.1) Par.?
gopāv etau samājaughān niṣkrāmyetāṃ vanecarau // (18.2) Par.?
na caitau draṣṭum icchāmi vikṛtau pāpadarśinau / (19.1) Par.?
gopānām api me rājye na kaścit sthātum arhati // (19.2) Par.?
nandagopaś ca durmedhāḥ pāpeṣv abhirato mama / (20.1) Par.?
āyasair nigaḍākārair lohapāśair nigṛhyatām // (20.2) Par.?
vasudevaś ca durvṛtto nityaṃ chadmacaro mama / (21.1) Par.?
avṛddhārheṇa daṇḍena kṣipram adyaiva vadhyatām // (21.2) Par.?
ye ceme prākṛtā gopā dāmodaraparāyaṇāḥ / (22.1) Par.?
eṣāṃ hriyantāṃ gāvaś ca yac cāsti vasu kiṃcana // (22.2) Par.?
evam ājñāpayānaṃ tu kaṃsaṃ paruṣabhāṣiṇam / (23.1) Par.?
dadarśāyastanayanaḥ kṛṣṇaḥ satyaparākramaḥ // (23.2) Par.?
kṣipte pitari cukrodha nandagope ca keśavaḥ / (24.1) Par.?
jñātīnāṃ ca vyathāṃ dṛṣṭvā visaṃjñāṃ caiva devakīm // (24.2) Par.?
sa siṃha iva vegena kesarī jātavikramaḥ / (25.1) Par.?
ārurukṣur mahābāhuḥ kaṃsanāśārtham acyutaḥ // (25.2) Par.?
raṅgamadhyād utpapāta kṛṣṇaḥ kaṃsāsanāntikam / (26.1) Par.?
asajjan vāyunā kṣipto yathā vidyud ghanād ghanam // (26.2) Par.?
dadṛśur na hi taṃ sarve raṅgamadhyād avaplutam / (27.1) Par.?
kevalaṃ kaṃsapārśvasthaṃ dadṛśuḥ puravāsinaḥ // (27.2) Par.?
so 'pi kaṃsas tathāyastaḥ parītaḥ kāladharmaṇā / (28.1) Par.?
ākāśād iva govindaṃ mene tatrāgataṃ vibhum // (28.2) Par.?
sa kṛṣṇenāyataṃ kṛtvā bāhuṃ parighasaṃnibham / (29.1) Par.?
mūrdhajeṣu parāmṛṣṭaḥ kaṃso vai raṅgasaṃsadi // (29.2) Par.?
mukuṭaś cāpatat tasya kāñcano vajrabhūṣitaḥ / (30.1) Par.?
śirasas tasya kṛṣṇena parāmṛṣṭasya pāṇinā // (30.2) Par.?
sa hastagrastakeśaś ca kaṃso niryatnatāṃ gataḥ / (31.1) Par.?
tathaiva ca visaṃmūḍho vihvalaḥ samapadyata // (31.2) Par.?
nigṛhītaś ca keśeṣu mandāsur iva niḥśvasan / (32.1) Par.?
na śaśāka mukhaṃ draṣṭuṃ kaṃsaḥ kṛṣṇasya vai tadā // (32.2) Par.?
vikuṇḍalābhyāṃ karṇābhyāṃ chinnahāreṇa vakṣasā / (33.1) Par.?
pralambābhyāṃ ca bāhubhyāṃ gātrair visṛtabhūṣaṇaiḥ // (33.2) Par.?
bhraṃśitenottarīyeṇa sahasā calitāsanaḥ / (34.1) Par.?
veṣṭamānaḥ samākṣiptaḥ kaṃsaḥ kṛṣṇena tejasā // (34.2) Par.?
cakarṣa ca mahāraṅge mañcān niṣkramya keśavaḥ / (35.1) Par.?
keśeṣu balavad gṛhya kaṃsaṃ kleśārhatāṃ gatam // (35.2) Par.?
kṛṣyamāṇaḥ sa kṛṣṇena bhojarājo mahādyutiḥ / (36.1) Par.?
parikhāṃ dehakṛṣṭāṃ cakāra ha // (36.2) Par.?
samājavāṭe samājavāṭe vikrīḍya vikṛṣya ca gatāyuṣam / (37.1) Par.?
kṛṣṇo visarjayāmāsa kaṃsadeham adūrataḥ // (37.2) Par.?
dharaṇyāṃ mṛditaḥ śete tasya dehaḥ sukhocitaḥ / (38.1) Par.?
krameṇa viparītena pāṃsubhiḥ paruṣīkṛtaḥ // (38.2) Par.?
tasya tad vadanaṃ śyāvaṃ suptākṣaṃ mukuṭaṃ vinā / (39.1) Par.?
na vibhāti viparyastaṃ vipalāśaṃ yathāmbujam // (39.2) Par.?
asaṃgrāme hataḥ kaṃsaḥ sa bāṇair aparikṣataḥ / (40.1) Par.?
kaṇṭhagrāhān nirastāsur vīramārgān nirākṛtaḥ // (40.2) Par.?
tasya dehe prakāśante sahasā keśavārpitāḥ / (41.1) Par.?
māṃsacchedaghanāḥ sarve nakhāgrā jīvitacchidaḥ // (41.2) Par.?
taṃ hatvā puṇḍarīkākṣaḥ praharṣād dviguṇaprabhaḥ / (42.1) Par.?
vavande vasudevasya pādau nihatakaṇṭakaḥ // (42.2) Par.?
mātuś ca śirasā pādau nipīḍya yadunandanaḥ / (43.1) Par.?
sāsiñcat prasnavotpīḍaiḥ kṛṣṇam ānandaniḥsṛtaiḥ // (43.2) Par.?
yādavāṃś caiva tān sarvān yathāsthānaṃ yathāvayaḥ / (44.1) Par.?
papraccha kuśalaṃ kṛṣṇo dīpyamānaḥ svatejasā // (44.2) Par.?
baladevo 'pi dharmātmā kaṃsabhrātaram ūrjitam / (45.1) Par.?
bāhubhyām eva tarasā sunāmānam apothayat // (45.2) Par.?
tau jitārī jitakrodhau ciraṃ viproṣitau vraje / (46.1) Par.?
svapitur bhavanaṃ vīrau jagmatur hṛṣṭamānasau // (46.2) Par.?
Duration=0.37119817733765 secs.