Texts

athāto jaṅgamaviṣavijñānīyaṃ kalpaṃ vyākhyāsyāmaḥ // (1.1) Par.?

yathovāca bhagavān dhanvantariḥ // (2.1) Par.?

jaṅgamasya viṣasyoktānyadhiṣṭhānāni ṣoḍaśa / (3.1) Par.?

samāsena mayā yāni vistarasteṣu vakṣyate // (3.2) Par.?

tatra dṛṣṭiniḥśvāsadaṃṣṭrānakhamūtrapurīṣaśukralālārtavamukhasaṃdaṃśaviśardhitatuṇḍāsthipittaśūkaśavānīti // (4.1) Par.?

tatra dṛṣṭiniḥśvāsaviṣā divyāḥ sarpāḥ bhaumāstu daṃṣṭrāviṣāḥ mārjāraśvavānaramakaramaṇḍūkapākamatsyagodhāśambūkapracalākagṛhagodhikācatuṣpādakīṭās tathānye daṃṣṭrānakhaviṣāḥ cipiṭapicciṭakakaṣāyavāsikasarṣapakatoṭakavarcaḥkīṭakauṇḍinyakāḥ śakṛnmūtraviṣāḥ mūṣikāḥ śukraviṣāḥ lūtā lālāmūtrapurīṣamukhasaṃdaṃśanakhaśukrārtavaviṣāḥ vṛścikaviśvambharavaraṭīrājīvamatsyocciṭiṅgāḥ samudravṛścikāścālaviṣāḥ citraśiraḥsarāvakurdiśatadārukārimedakasārikāmukhā mukhasaṃdaṃśaviśardhitamūtrapurīṣaviṣāḥ makṣikākaṇabhajalāyukā mukhasaṃdaṃśaviṣāḥ viṣahatāsthi sarpakaṇṭakavaraṭīmatsyāsthi cetyasthiviṣāṇi śakulīmatsyaraktarājivaraṭīmatsyāśca pittaviṣāḥ sūkṣmatuṇḍocciṭiṅgavaraṭīśatapadīśūkavalabhikāśṛṅgibhramarāḥ śūkatuṇḍaviṣāḥ kīṭasarpadehā gatāsavaḥ śavaviṣāḥ śeṣāstvanuktā mukhasaṃdaṃśaviṣeṣveva gaṇayitavyāḥ // (5.1) Par.?

bhavanti cātra / (6.1) Par.?

rājño 'rideśe ripavastṛṇāmbumārgānnadhūmaśvasanān viṣeṇa / (6.2) Par.?

saṃdūṣayantyebhir atipraduṣṭān vijñāya liṅgair abhiśodhayettān // (6.3) Par.?

duṣṭaṃ jalaṃ picchilamugragandhi phenānvitaṃ rājibhir āvṛtaṃ ca / (7.1) Par.?

maṇḍūkamatsyaṃ mriyate vihaṅgā mattāśca sānūpacarā bhramanti // (7.2) Par.?

majjanti ye cātra narāśvanāgāste chardimohajvaradāhaśophān / (8.1) Par.?

ṛcchanti teṣāmapahṛtya doṣān duṣṭaṃ jalaṃ śodhayituṃ yateta // (8.2) Par.?

dhavāśvakarṇāsanapāribhadrān sapāṭalān siddhakamokṣakau ca / (9.1) Par.?

dagdhvā sarājadrumasomavalkāṃstadbhasma śītaṃ vitaret saraḥsu // (9.2) Par.?

bhasmāñjaliṃ cāpi ghaṭe nidhāya viśodhayedīpsitamevamambhaḥ / (10.1) Par.?

kṣitipradeśaṃ viṣadūṣitaṃ tu śilātalaṃ tīrthamatheriṇaṃ vā // (10.2) Par.?

spṛśanti gātreṇa tu yena yena govājināgoṣṭrakharā narā vā / (11.1) Par.?

tacchūnatāṃ yātyatha dahyate ca viśīryate romanakhaṃ tathaiva // (11.2) Par.?

tatrāpyanantāṃ saha sarvagandhaiḥ piṣṭvā surābhir viniyojya mārgam / (12.1) Par.?

siñcet payobhiḥ sumṛdanvitaistaṃ viḍaṅgapāṭhākaṭabhījalair vā // (12.2) Par.?

tṛṇeṣu bhakteṣu ca dūṣiteṣu sīdanti mūrchanti vamanti cānye / (13.1) Par.?

viḍbhedamṛcchantyathavā mriyante teṣāṃ cikitsāṃ praṇayedyathoktām // (13.2) Par.?

viṣāpahair vāpyagadair vilipya vādyāni citrāṇyapi vādayeta / (14.1) Par.?

tāraḥ sutāraḥ sasurendragopaḥ sarvaiśca tulyaḥ kuruvindabhāgaḥ // (14.2) Par.?

pittena yuktaḥ kapilānvayena vādyapralepo vihitaḥ praśastaḥ / (15.1) Par.?

vādyasya śabdena hi yānti nāśaṃ viṣāṇi ghorāṇyapi yāni santi // (15.2) Par.?

dhūme 'nile vā viṣasamprayukte khagāḥ śramārtāḥ prapatanti bhūmau / (16.1) Par.?

kāsapratiśyāyaśirorujaśca bhavanti tīvrā nayanāmayāśca // (16.2) Par.?

lākṣāharidrātiviṣābhayābdahareṇukailādalavakrakuṣṭham / (17.1) Par.?

priyaṅgukāṃ cāpyanale nidhāya dhūmānilau cāpi viśodhayeta // (17.2) Par.?

prajāmimāmātmayonerbrahmaṇaḥ sṛjataḥ kila / (18.1) Par.?

akarodasuro vighnaṃ kaiṭabho nāma darpitaḥ // (18.2) Par.?

tasya kruddhasya vai vaktrādbrahmaṇastejaso nidheḥ / (19.1) Par.?

krodho vigrahavān bhūtvā nipapātātidāruṇaḥ // (19.2) Par.?

sa taṃ dadāha garjantamantakābhaṃ mahābalam / (20.1) Par.?

tato 'suraṃ ghātayitvā tattejo 'vardhatādbhutam // (20.2) Par.?

tato viṣādo devānāmabhavattaṃ nirīkṣya vai / (21.1) Par.?

viṣādajananatvācca viṣamityabhidhīyate // (21.2) Par.?

tataḥ sṛṣṭvā prajāḥ śeṣaṃ tadā taṃ krodhamīśvaraḥ / (22.1) Par.?

vinyastavān sa bhūteṣu sthāvareṣu careṣu ca // (22.2) Par.?

yathāvyaktarasaṃ toyamantarīkṣānmahīgatam / (23.1) Par.?

teṣu teṣu pradeśeṣu rasaṃ taṃ taṃ niyacchati // (23.2) Par.?

evam eva viṣaṃ yadyaddravyaṃ vyāpyāvatiṣṭhate / (24.1) Par.?

svabhāvādeva taṃ tasya rasaṃ samanuvartate // (24.2) Par.?

viṣe yasmādguṇāḥ sarve tīkṣṇāḥ prāyeṇa santi hi / (25.1) Par.?

viṣaṃ sarvamato jñeyaṃ sarvadoṣaprakopaṇam // (25.2) Par.?

te tu vṛttiṃ prakupitā jahati svāṃ viṣārditāḥ / (26.1) Par.?

nopayāti viṣaṃ pākamataḥ prāṇān ruṇaddhi ca // (26.2) Par.?

śleṣmaṇāvṛtamārgatvāducchvāso 'sya nirudhyate / (27.1) Par.?

visaṃjñaḥ sati jīve 'pi tasmāt tiṣṭhati mānavaḥ // (27.2) Par.?

śukravat sarvasarpāṇāṃ viṣaṃ sarvaśarīragam / (28.1) Par.?

kruddhānāmeti cāṅgebhyaḥ śukraṃ nirmanthanādiva // (28.2) Par.?

teṣāṃ baḍiśavaddaṃṣṭrāstāsu sajati cāgatam / (29.1) Par.?

anudvṛttā viṣaṃ tasmānna muñcanti ca bhoginaḥ // (29.2) Par.?

yasmādatyarthamuṣṇaṃ ca tīkṣṇaṃ ca paṭhitaṃ viṣam / (30.1) Par.?

ataḥ sarvaviṣeṣūktaḥ pariṣekastu śītalaḥ // (30.2) Par.?

mandaṃ kīṭeṣu nātyuṣṇaṃ bahuvātakaphaṃ viṣam / (31.1) Par.?

ataḥ kīṭaviṣe cāpi svedo na pratiṣidhyate // (31.2) Par.?

kīṭair daṣṭānugraviṣaiḥ sarpavat samupācaret / (32.1) Par.?

svabhāvādeva tiṣṭhettu prahārādaṃśayor viṣam // (32.2) Par.?

vyāpya sāvayavaṃ dehaṃ digdhaviddhāhidaṣṭayoḥ / (33.1) Par.?

laulyādviṣānvitaṃ māṃsaṃ yaḥ khādenmṛtamātrayoḥ // (33.2) Par.?

yathāviṣaṃ sa rogeṇa kliśyate mriyate 'pi vā / (34.1) Par.?

ataścāpyanayor māṃsamabhakṣyaṃ mṛtamātrayoḥ // (34.2) Par.?

muhūrtāttadupādeyaṃ prahārād aṃśavarjitam / (35.1) Par.?

savātaṃ gṛhadhūmābhaṃ purīṣaṃ yo 'tisāryate // (35.2) Par.?

ādhmāto 'tyarthamuṣṇāsro vivarṇaḥ sādapīḍitaḥ / (36.1) Par.?

udvamatyatha phenaṃ ca viṣapītaṃ tamādiśet // (36.2) Par.?

na cāsya hṛdayaṃ vahnirviṣajuṣṭaṃ dahatyapi / (37.1) Par.?

taddhi sthānaṃ cetanāyāḥ svabhāvād vyāpya tiṣṭhati // (37.2) Par.?

aśvatthadevāyatanaśmaśānavalmīkasandhyāsu catuṣpatheṣu / (38.1) Par.?

yāmye sapitrye parivarjanīyā ṛkṣe narā marmasu ye ca daṣṭāḥ // (38.2) Par.?

darvīkarāṇāṃ viṣamāśughāti sarvāṇi coṣṇe dviguṇībhavanti / (39.1) Par.?

ajīrṇapittātapapīḍiteṣu bālapramehiṣvatha garbhiṇīṣu // (39.2) Par.?

vṛddhāturakṣīṇabubhukṣiteṣu rūkṣeṣu bhīruṣvatha durdineṣu / (40.1) Par.?

śastrakṣate yasya na raktameti rājyo latābhiśca na sambhavanti // (40.2) Par.?

śītābhir adbhiśca na romaharṣo viṣābhibhūtaṃ parivarjayettam / (41.1) Par.?

jihvā sitā yasya ca keśaśāto nāsāvabhaṅgaśca sakaṇṭhabhaṅgaḥ // (41.2) Par.?

kṛṣṇaḥ saraktaḥ śvayathuśca daṃśe hanvoḥ sthiratvaṃ ca sa varjanīyaḥ / (42.1) Par.?

vartirghanā yasya nireti vaktrādraktaṃ sravedūrdhvamadhaśca yasya // (42.2) Par.?

daṃṣṭrānipātāḥ sakalāśca yasya taṃ cāpi vaidyaḥ parivarjayettu / (43.1) Par.?

unmattamatyartham upadrutaṃ vā hīnasvaraṃ vāpyathavā vivarṇam // (43.2) Par.?

sāriṣṭam atyartham aveginaṃ ca jahyānnaraṃ tatra na karma kuryāt // (44.1) Par.?