Texts

brāhmaṇa uvāca / (1.1) Par.?

saṃkalpadaṃśamaśakaṃ śokaharṣahimātapam / (1.2) Par.?

mohāndhakāratimiraṃ lobhavyālasarīsṛpam // (1.3) Par.?

viṣayaikātyayādhvānaṃ kāmakrodhavirodhakam / (2.1) Par.?

tad atītya mahādurgaṃ praviṣṭo 'smi mahad vanam // (2.2) Par.?

brāhmaṇyuvāca / (3.1) Par.?

kva tad vanaṃ mahāprājña ke vṛkṣāḥ saritaśca kāḥ / (3.2) Par.?

girayaḥ parvatāścaiva kiyatyadhvani tad vanam // (3.3) Par.?

brāhmaṇa uvāca / (4.1) Par.?

na tad asti pṛthagbhāve kiṃcid anyat tataḥ samam / (4.2) Par.?

na tad astyapṛthagbhāve kiṃcid dūrataraṃ tataḥ // (4.3) Par.?

tasmāddhrasvataraṃ nāsti na tato 'sti bṛhattaram / (5.1) Par.?

nāsti tasmād duḥkhataraṃ nāstyanyat tatsamaṃ sukham // (5.2) Par.?

na tat praviśya śocanti na prahṛṣyanti ca dvijāḥ / (6.1) Par.?

na ca bibhyati keṣāṃcit tebhyo bibhyati kecana // (6.2) Par.?

tasmin vane sapta mahādrumāśca phalāni saptātithayaśca sapta / (7.1) Par.?

saptāśramāḥ sapta samādhayaśca dīkṣāśca saptaitad araṇyarūpam // (7.2) Par.?

pañcavarṇāni divyāni puṣpāṇi ca phalāni ca / (8.1) Par.?

sṛjantaḥ pādapāstatra vyāpya tiṣṭhanti tad vanam // (8.2) Par.?

suvarṇāni dvivarṇāni puṣpāṇi ca phalāni ca / (9.1) Par.?

sṛjantaḥ pādapāstatra vyāpya tiṣṭhanti tad vanam // (9.2) Par.?

caturvarṇāni divyāni puṣpāṇi ca phalāni ca / (10.1) Par.?

sṛjantaḥ pādapāstatra vyāpya tiṣṭhanti tad vanam // (10.2) Par.?

śaṃkarāṇi trivarṇāni puṣpāṇi ca phalāni ca / (11.1) Par.?

sṛjantaḥ pādapāstatra vyāpya tiṣṭhanti tad vanam // (11.2) Par.?

surabhīṇyekavarṇāni puṣpāṇi ca phalāni ca / (12.1) Par.?

sṛjantaḥ pādapāstatra vyāpya tiṣṭhanti tad vanam // (12.2) Par.?

bahūnyavyaktavarṇāni puṣpāṇi ca phalāni ca / (13.1) Par.?

visṛjantau mahāvṛkṣau tad vanaṃ vyāpya tiṣṭhataḥ // (13.2) Par.?

eko hyagniḥ sumanā brāhmaṇo 'tra pañcendriyāṇi samidhaścātra santi / (14.1) Par.?

tebhyo mokṣāḥ sapta bhavanti dīkṣā guṇāḥ phalānyatithayaḥ phalāśāḥ // (14.2) Par.?

ātithyaṃ pratigṛhṇanti tatra sapta maharṣayaḥ / (15.1) Par.?

arciteṣu pralīneṣu teṣvanyad rocate vanam // (15.2) Par.?

pratijñāvṛkṣam aphalaṃ śānticchāyāsamanvitam / (16.1) Par.?

jñānāśrayaṃ tṛptitoyam antaḥkṣetrajñabhāskaram // (16.2) Par.?

ye 'dhigacchanti tat santasteṣāṃ nāsti bhayaṃ punaḥ / (17.1) Par.?

ūrdhvaṃ cāvāk ca tiryak ca tasya nānto 'dhigamyate // (17.2) Par.?

sapta striyastatra vasanti sadyo 'vāṅmukhā bhānumatyo janitryaḥ / (18.1) Par.?

ūrdhvaṃ rasānāṃ dadate prajābhyaḥ sarvān yathā sarvam anityatāṃ ca // (18.2) Par.?

tatraiva pratitiṣṭhanti punastatrodayanti ca / (19.1) Par.?

sapta saptarṣayaḥ siddhā vasiṣṭhapramukhāḥ saha // (19.2) Par.?

yaśo varco bhagaścaiva vijayaḥ siddhitejasī / (20.1) Par.?

evam evānuvartante sapta jyotīṃṣi bhāskaram // (20.2) Par.?

girayaḥ parvatāścaiva santi tatra samāsataḥ / (21.1) Par.?

nadyaśca sarito vāri vahantyo brahmasaṃbhavam // (21.2) Par.?

nadīnāṃ saṃgamastatra vaitānaḥ samupahvare / (22.1) Par.?

svātmatṛptā yato yānti sākṣād dāntāḥ pitāmaham // (22.2) Par.?

kṛśāśāḥ suvratāśāśca tapasā dagdhakilbiṣāḥ / (23.1) Par.?

ātmanyātmānam āveśya brahmāṇaṃ samupāsate // (23.2) Par.?

ṛcam apyatra śaṃsanti vidyāraṇyavido janāḥ / (24.1) Par.?

tad araṇyam abhipretya yathādhīram ajāyata // (24.2) Par.?

etad etādṛśaṃ divyam araṇyaṃ brāhmaṇā viduḥ / (25.1) Par.?

viditvā cānvatiṣṭhanta kṣetrajñenānudarśitam // (25.2) Par.?