Texts

īśvara uvāca / (1.1) Par.?

viśokasaptamīṃ tadvadvakṣyāmi munipuṃgava / (1.2) Par.?

yāmupoṣya naraḥ śokaṃ na kadācidihāśnute // (1.3) Par.?

māghe kṛṣṇatilaiḥ snātvā ṣaṣṭhyāṃ vai śuklapakṣataḥ / (2.1) Par.?

kṛtāhāraḥ kṛsarayā dantadhāvanapūrvakam / (2.2) Par.?

upavāsavrataṃ kṛtvā brahmacārī bhavenniśi // (2.3) Par.?

tataḥ prabhāta utthāya kṛtasnānajapaḥ śuciḥ / (3.1) Par.?

kṛtvā tu kāñcanaṃ padmamarkāyeti ca pūjayet / (3.2) Par.?

karavīreṇa raktena raktavastrayugena ca // (3.3) Par.?

yathā viśokaṃ bhuvanaṃ tvayaivāditya sarvadā / (4.1) Par.?

tathā viśokatā me'stu tvadbhaktiḥ pratijanma ca // (4.2) Par.?

evaṃ sampūjya ṣaṣṭhyāṃ tu bhaktyā sampūjayeddvijān / (5.1) Par.?

suptvā saṃprāśya gomūtramutthāya kṛtanaityakaḥ // (5.2) Par.?

sampūjya viprānannena guḍapātrasamanvitam / (6.1) Par.?

tadvastrayugmaṃ padmaṃ ca brāhmaṇāya nivedayet // (6.2) Par.?

atailalavaṇaṃ bhuktvā saptamyāṃ maunasaṃyutaḥ / (7.1) Par.?

tataḥ purāṇaśravaṇaṃ kartavyaṃ bhūtimicchatā // (7.2) Par.?

anena vidhinā sarvamubhayorapi pakṣayoḥ / (8.1) Par.?

kṛtvā yāvatpunarmāghaśuklapakṣasya saptamī // (8.2) Par.?

vratānte kalaśaṃ dadyātsuvarṇakamalānvitam / (9.1) Par.?

śayyāṃ sopaskarāṃ dadyātkapilāṃ ca payasvinīm // (9.2) Par.?

anena vidhinā yastu vittaśāṭhyavivarjitaḥ / (10.1) Par.?

viśokasaptamīṃ kuryātsa yāti paramāṃ gatim // (10.2) Par.?

yāvajjanmasahasrāṇāṃ sāgraṃ koṭiśataṃ bhavet / (11.1) Par.?

tāvanna śokamabhyeti rogadaurgatyavarjitaḥ // (11.2) Par.?

yaṃ yaṃ prārthayate kāmaṃ taṃ tamāpnoti puṣkalam / (12.1) Par.?

niṣkāmaḥ kurute yastu sa paraṃ brahma gacchati // (12.2) Par.?

yaḥ paṭhecchṛṇuyādvāpi viśokākhyāṃ ca saptamīm / (13.1) Par.?

so'pīndralokamāpnoti na duḥkhī jāyate kvacit // (13.2) Par.?