Texts

mārkaṇḍeya uvāca / (1.1) Par.?

tato gacchenmahīpāla candrahāsamataḥ param / (1.2) Par.?

yatra siddhiṃ parāṃ prāptaḥ somarājaḥ surottamaḥ // (1.3) Par.?

yudhiṣṭhira uvāca / (2.1) Par.?

kathaṃ siddhiṃ parāṃ prāptaḥ somanātho jagatpatiḥ / (2.2) Par.?

tatsarvaṃ śrotumicchāmi kathayasva mamānagha // (2.3) Par.?

śrīmārkaṇḍeya uvāca / (3.1) Par.?

purā śapto munīndreṇa dakṣeṇa kila bhārata / (3.2) Par.?

asevanāddhi dārāṇāṃ kṣayarogī bhaviṣyasi // (3.3) Par.?

udvāhitānāṃ patnīnāṃ ye na kurvanti sevanam / (4.1) Par.?

yā niṣṭhā jāyate nṛṇāṃ tāṃ śṛṇuṣva narādhipa // (4.2) Par.?

ṛtāvṛtau hi nārīṇāṃ sevanājjāyate sutaḥ / (5.1) Par.?

sutātsvargaśca mokṣaśca ityevaṃ śrutibhāṣitam // (5.2) Par.?

tatkālocitadharmeṇa veṣṭito raurave patet / (6.1) Par.?

tasyāstadrudhiraṃ pāpaḥ pibate kālamīpsitam // (6.2) Par.?

tato 'vatīrṇaḥ kālena yāṃ yāṃ yoniṃ prayāsyati / (7.1) Par.?

tasyāṃ tasyāṃ sa duṣṭātmā durbhago jāyate sadā // (7.2) Par.?

nārīṇāṃ tu sadā kāmo 'bhyadhikāḥ parivartate / (8.1) Par.?

viśeṣeṇa ṛtau kāle pīḍyate kāmasāyakaiḥ // (8.2) Par.?

paribhūtā hitā bhartrā dhyāyante 'nyaṃ patiṃ striyaḥ / (9.1) Par.?

tataḥ putraḥ samutpanno hyaṭate kulamuttamam // (9.2) Par.?

svargasthāstena pitaraḥ pūrvajāste pitāmahāḥ / (10.1) Par.?

patanti jātamātreṇa kulaṭastena cocyate // (10.2) Par.?

tena karmavipākena kṣayarogyabhavacchaśī / (11.1) Par.?

tyaktvā lokaṃ surendrāṇāṃ martyalokamupāgataḥ // (11.2) Par.?

tatastīrthānyanekāni puṇyānyāyatanāni ca / (12.1) Par.?

bhramanvai narmadāṃ prāptaḥ sarvapāpapraṇāśanīm // (12.2) Par.?

upavāsaṃ ca dānāni vratāni niyamāṃs tathā / (13.1) Par.?

cacāra dvādaśābdāni tato muktaḥ sa kilbiṣaiḥ // (13.2) Par.?

snāpayitvā mahādevaṃ sarvapātakanāśanam / (14.1) Par.?

jagāma prabhayā pūrṇaḥ sa ca lokamanuttamam // (14.2) Par.?

yenaiva sthāpito devaḥ pūjyate varṣasaṃkhyayā / (15.1) Par.?

tāvadvarṣasahasrāṇi rudraloke sa pūjyate // (15.2) Par.?

tena devānvidhānoktānsthāpayanti narā bhuvi / (16.1) Par.?

akṣayaṃ cāvyayaṃ yasmātkālaṃ bhuñjanti mānavāḥ // (16.2) Par.?

somatīrthe naraḥ snātvā pūjayeddevamīśvaram / (17.1) Par.?

sa bhrājate naro loke somavat priyadarśanaḥ // (17.2) Par.?

candrahāse tu yo gatvā grahaṇe candrasūryayoḥ / (18.1) Par.?

snānaṃ samācared bhaktyā mucyate sarvakilbiṣaiḥ // (18.2) Par.?

tatra snānaṃ ca dānaṃ ca candrahāse śubhāśubham / (19.1) Par.?

kṛtaṃ nṛpavaraśreṣṭha sarvaṃ bhavati cākṣayam // (19.2) Par.?

te dhanyāste mahātmānas teṣāṃ janma sujīvitam / (20.1) Par.?

candrahāse tu ye snātvā paśyanti grahaṇaṃ narāḥ // (20.2) Par.?

vācikaṃ mānasaṃ pāpaṃ karmajaṃ yatpurākṛtam / (21.1) Par.?

snānamātreṇa rājendra tatra tīrthe praṇaśyati // (21.2) Par.?

bahavastaṃ na jānanti mahāmohasamanvitāḥ / (22.1) Par.?

dehasthamiva sarveṣāṃ paramānandarūpiṇam // (22.2) Par.?

paścime sāgare gatvā somatīrthe tu yatphalam / (23.1) Par.?

tatsamagram avāpnoti candrahāse na saṃśayaḥ // (23.2) Par.?

saṃkrāntau ca vyatīpāte ayane viṣuve tathā / (24.1) Par.?

candrahāse naraḥ snātvā sarvapāpaiḥ pramucyate // (24.2) Par.?

te mūḍhāste durācārāsteṣāṃ janma nirarthakam / (25.1) Par.?

candrahāsaṃ na jānanti ye revāyāṃ vyavasthitam // (25.2) Par.?

candrahāse tu yaḥ kaścitsaṃnyāsaṃ kurute dvijaḥ / (26.1) Par.?

anivartikā gatistasya somalokānna saṃśayaḥ // (26.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe somatīrthamāhātmyavarṇanaṃ nāmaikaviṃśatyuttaraśatatamo 'dhyāyaḥ // (27.1) Par.?