Texts

athāgniṃ parisamuhya paryukṣya paristīrya pariṣicya sarvataḥ pākād agram uddhṛtya juhuyāt // (1.1) Par.?

vāsudevāya saṃkarṣaṇāya pradyumnāyāniruddhāya puruṣāya satyāyācyutāya vāsudevāya // (2.1) Par.?

athāgnaye somāya mitrāya varuṇāya indrāya indrāgnibhyāṃ viśvebhyo devebhyaḥ prajāpataye anumatyai dhanvantaraye vāstoṣpataye agnaye sviṣṭakṛte ca // (3.1) Par.?

tato 'nnaśeṣeṇa balim upaharet // (4.1) Par.?

bhakṣopabhakṣābhyām // (5.1) Par.?

abhitaḥ pūrveṇāgnim // (6.1) Par.?

ambā nāmāsīti dulā nāmāsīti nitatnī nāmāsīti cupuṇīkā nāmāsīti sarvāsām // (7.1) Par.?

nandini subhage sumaṅgali bhadraṃkarīti svaśriṣv abhipradakṣiṇam // (8.1) Par.?

sthūṇāyāṃ dhruvāyāṃ śriyai hiraṇyakeśyai vanaspatibhyaśca // (9.1) Par.?

dharmādharmayor dvāre mṛtyave ca // (10.1) Par.?

udadhāne varuṇāya // (11.1) Par.?

viṣṇava ityulūkhale // (12.1) Par.?

marudbhya iti dṛṣadi // (13.1) Par.?

upari śaraṇe vaiśravaṇāya rājñe bhūtebhyaśca // (14.1) Par.?

indrāyendrapuruṣebhyaśceti pūrvārdhe // (15.1) Par.?

yamāya yamapuruṣebhya iti dakṣiṇārdhe // (16.1) Par.?

varuṇāya varuṇapuruṣebhya iti paścārdhe // (17.1) Par.?

somāya somapuruṣebhya ityuttarārdhe // (18.1) Par.?

brahmaṇe brahmapuruṣebhya iti madhye // (19.1) Par.?

ūrdhvam ākāśāya // (20.1) Par.?

sthaṇḍile divācarebhyo bhūtebhya iti divā // (21.1) Par.?

naktaṃcarebhya iti naktam // (22.1) Par.?

tato dakṣiṇāgreṣu darbheṣu pitre pitāmahāya prapitāmahāya mātre pitāmahyai prapitāmahyai nāmagotrābhyāṃ ca piṇḍanirvāpaṇaṃ kuryāt // (23.1) Par.?

piṇḍānāṃ cānulepanapuṣpadhūpanaivedyādi dadyāt // (24.1) Par.?

udakakalaśam upanidhāya svastyayanaṃ vācayet // (25.1) Par.?

śvakākaśvapacānāṃ bhuvi nirvapet // (26.1) Par.?

bhikṣāṃ ca dadyāt // (27.1) Par.?

atithipūjane ca paraṃ yatnam ātiṣṭheta // (28.1) Par.?

sāyam atithiṃ prāptaṃ prayatnenārcayet // (29.1) Par.?

anāśitam atithiṃ gṛhe na vāsayet // (30.1) Par.?

yathā varṇānāṃ brāhmaṇaḥ prabhur yathā strīṇāṃ bhartā tathā gṛhasthasyātithiḥ // (31.1) Par.?

tatpūjayā svargam āpnoti // (32.1) Par.?

atithir yasya bhagnāśo gṛhāt pratinivartate / (33.1) Par.?

tasmāt sukṛtam ādāya duṣkṛtaṃ tu prayacchati // (33.2) Par.?

ekarātraṃ hi nivasann atithir brāhmaṇaḥ smṛtaḥ / (34.1) Par.?

anityaṃ hi sthito yasmāt tasmād atithir ucyate // (34.2) Par.?

naikagrāmīṇam atithiṃ vipraṃ sāṃgatikaṃ tathā / (35.1) Par.?

upasthitaṃ gṛhe vindyād bhāryā yatrāgnayo 'pi vā // (35.2) Par.?

yadi tv atithidharmeṇa kṣatriyo gṛham āgataḥ / (36.1) Par.?

bhuktavatsu ca vipreṣu kāmaṃ tam api bhojayet // (36.2) Par.?

vaiśyaśūdrāv api prāptau kuṭumbe 'tithidharmiṇau / (37.1) Par.?

bhojayet saha bhṛtyais tāv ānṛśaṃsyaṃ prayojayan // (37.2) Par.?

itarān api sakhyādīn saṃprītyā gṛham āgatān / (38.1) Par.?

prakṛtānnaṃ yathāśakti bhojayet saha bhāryayā // (38.2) Par.?

svavāsinīṃ kumārīṃ ca rogiṇīṃ gurviṇīṃ tathā / (39.1) Par.?

atithibhyo 'gra evaitān bhojayed avicārayan // (39.2) Par.?

adattvā yas tu etebhyaḥ pūrvaṃ bhuṅkte 'vicakṣaṇaḥ / (40.1) Par.?

bhuñjāno na sa jānāti śvagṛdhrair jagdhim ātmanaḥ // (40.2) Par.?

bhuktavatsu ca vipreṣu sveṣu bhṛtyeṣu caiva hi / (41.1) Par.?

bhuñjīyātāṃ tataḥ paścād avaśiṣṭaṃ tu daṃpatī // (41.2) Par.?

devān pitṝn manuṣyāṃśca bhṛtyān gṛhyāśca devatāḥ / (42.1) Par.?

pūjayitvā tataḥ paścād gṛhasthaḥ śeṣabhug bhavet // (42.2) Par.?

aghaṃ sa kevalaṃ bhuṅkte yaḥ pacatyātmakāraṇāt / (43.1) Par.?

yajñaśiṣṭāśanaṃ hyetat satām annaṃ vidhīyate // (43.2) Par.?

svādhyāyenāgnihotreṇa yajñena tapasā tathā / (44.1) Par.?

na cāpnoti gṛhī lokān yathā tv atithipūjanāt // (44.2) Par.?

sāyaṃ prātas tv atithaye pradadyād āsanodake / (45.1) Par.?

annaṃ caiva yathāśaktyā satkṛtya vidhipūrvakam // (45.2) Par.?

pratiśrayaṃ tathā śayyāṃ pādābhyaṅgaṃ sadīpakam / (46.1) Par.?

pratyekadānenāpnoti gopradānasamaṃ phalam // (46.2) Par.?