Texts

Help

Select a text:
Bibliography
Select a chapter:
 (no revisions)
Associated topic(s): (prophesy about the) kaliyuga, yuga theory

Show parallels  Show headlines
Use dependency labeler
Chapter id: 17490
  • Click on a sentence to show its analysis
  • Keep the mouse pointer over a lemma to show its meanings.
janamejaya uvāca / (1.1) Par.?
eṣaṃ vilulite loke manuṣyāḥ kena pālitāḥ / (1.2) Par.?
nivatsyanti kimācārāḥ kimāhāravihāriṇaḥ // (1.3) Par.?
kiṃkarmāṇaḥ kimīhantaḥ kiṃpramāṇāḥ kimāyuṣaḥ / (2.1) Par.?
kāṃ ca kāṣṭhāṃ samāsādya prapatsyanti kṛtaṃ yugam // (2.2) Par.?
vyāsa uvāca / (3.1) Par.?
ata ūrdhvaṃ cyute dharme guṇahīnāḥ prajās tataḥ / (3.2) Par.?
śīlavyasanam āsādya prāpsyante hrāsam āyuṣaḥ // (3.3) Par.?
āyurhānyā balaglānir balaglānyā vivarṇatā / (4.1) Par.?
vaivarṇyād vyādhisaṃpīḍā nirvedo vyādhipīḍanāt // (4.2) Par.?
nirvedād ātmasaṃbodhaḥ saṃbodhād dharmaśīlatā / (5.1) Par.?
evaṃ gatvā parāṃ kāṣṭhāṃ prapatsyanti kṛtaṃ yugam // (5.2) Par.?
uddeśato dharmaśīlāḥ kecin madhyasthatāṃ gatāḥ / (6.1) Par.?
vimarśaśīlāḥ kecit tu hetuvādakutūhalāḥ // (6.2) Par.?
pratyakṣam anumānaṃ ca pramāṇam iti niścitāḥ / (7.1) Par.?
pramāṇaṃ kiṃ kariṣyati neti paṇḍitamāninaḥ / (7.2) Par.?
apramāṇaṃ kariṣyanti vedoktam apare janāḥ // (7.3) Par.?
nāstikyaparamāś cāpi kecid dharmavilopakāḥ / (8.1) Par.?
bhaviṣyanti narā mūḍhā mandāḥ paṇḍitamāninaḥ // (8.2) Par.?
tadātvamātraśraddheyāḥ śāstrajñānavimūrchitāḥ / (9.1) Par.?
dāmbhikās te bhaviṣyanti vādaśīlaparāyaṇāḥ // (9.2) Par.?
tadā vicalite dharme janāḥ śeṣapuraskṛtāḥ / (10.1) Par.?
śubhāny evācariṣyanti dānasatyasamanvitāḥ // (10.2) Par.?
sarvabhakṣo hy asaṃgupto nirguṇo nirapatrapaḥ / (11.1) Par.?
bhaviṣyati tadā lokas tat kaṣāyasya lakṣaṇam // (11.2) Par.?
viprāṇāṃ śāśvatīṃ vṛttiṃ yadā varṇāvaro janaḥ / (12.1) Par.?
abhipatsyati vṛttyarthaṃ tat kaṣāyasya lakṣaṇam // (12.2) Par.?
kaṣāyopaplave kāle jñānavidyāpraṇāśane / (13.1) Par.?
siddhim alpena kālena yāsyanti nirupaskṛtāḥ // (13.2) Par.?
mahāyuddhaṃ mahānādaṃ mahāvarṣaṃ mahābhayam / (14.1) Par.?
bhaviṣyati yuge kṣīṇe tat kaṣāyasya lakṣaṇam // (14.2) Par.?
viprarūpāṇi rakṣāṃsi rājānaḥ karṇavedinaḥ / (15.1) Par.?
pṛthivīm upabhokṣyanti yugānte pratyupasthite // (15.2) Par.?
niḥsvādhyāyavaṣaṭkārā munayaś cābhimāninaḥ / (16.1) Par.?
kravyādā brahmarūpeṇa sarvabhakṣā vṛthāvratāḥ // (16.2) Par.?
mūrkhāḥ svārthaparā lubdhāḥ kṣudrāḥ kṣudraparicchadāḥ / (17.1) Par.?
vyavahāropavṛttāś ca cyutā dharmāc ca śāśvatāt // (17.2) Par.?
hartāraḥ pararatnānāṃ paradārapradharṣakāḥ / (18.1) Par.?
kāmātmāno durātmānaḥ sopadhāḥ priyasāhasāḥ // (18.2) Par.?
teṣu prabhavamāneṣu tulyaśīleṣu sarvataḥ / (19.1) Par.?
abhāvino bhaviṣyanti munayo bahurūpiṇaḥ // (19.2) Par.?
utpannā ye kṛtayuge pradhānapuruṣāśrayāḥ / (20.1) Par.?
kathāyogena tān sarvān pūjayiṣyanti mānavāḥ // (20.2) Par.?
sasyacorā bhaviṣyanti tathā cailāpahāriṇaḥ / (21.1) Par.?
bhakṣyabhojyaharāś caiva bhāṇḍānāṃ caiva hāriṇaḥ // (21.2) Par.?
corāś corasya hartāro hantā hartur bhaviṣyati / (22.1) Par.?
corāś corakṣaye cāpi kṛte kṣemaṃ bhaviṣyati // (22.2) Par.?
niḥsāre kṣubhite loke niṣkriye vyantare sthite / (23.1) Par.?
narāḥ śrayiṣyanti vanaṃ karabhāraprapīḍitāḥ // (23.2) Par.?
yajñakarmaṇy uparate rakṣāṃsi śvāpadāni ca / (24.1) Par.?
koṭimūṣakasarpāś ca dharṣayiṣyanti mānavān // (24.2) Par.?
kṣemaṃ subhikṣam ārogyaṃ sāmagryam atha bandhubhiḥ / (25.1) Par.?
uddeśena naraśreṣṭha bhaviṣyanti yugakṣaye // (25.2) Par.?
svayaṃpālāḥ svayaṃcorā yugasaṃbhārasaṃbhṛtāḥ / (26.1) Par.?
maṇḍalaiḥ prabhaviṣyanti deśe deśe pṛthak pṛthak // (26.2) Par.?
svadeśebhyaḥ paribhraṣṭā niḥsārāḥ saha bandhubhiḥ / (27.1) Par.?
narās tadā bhaviṣyanti sarve kālapratīkṣiṇaḥ // (27.2) Par.?
tadā skandhe samādāya kumārān pradrutā bhayāt / (28.1) Par.?
kauśikīṃ saṃśrayiṣyanti narāḥ kṣudbhayapīḍitāḥ // (28.2) Par.?
aṅgān vaṅgān kaliṅgāṃś ca kāśmīrān atha mekalān / (29.1) Par.?
ṛṣikāntagiridroṇīḥ saṃśrayiṣyanti mānavāḥ // (29.2) Par.?
kṛtsnaṃ ca himavatpārśvaṃ kūlaṃ ca lavaṇāmbhasaḥ / (30.1) Par.?
araṇyāni ca vatsyanti narā mlecchagaṇaiḥ saha // (30.2) Par.?
naiva śūnyā na cāśūnyā bhaviṣyati vasuṃdharā / (31.1) Par.?
goptāraś cāpy agoptāraḥ prabhaviṣyanti śāsinaḥ // (31.2) Par.?
mṛgair matsyair vihaṃgaiś ca śvāpadaiḥ sarvakīṭakaiḥ / (32.1) Par.?
madhuśākaphalair mūlair vartayiṣyanti mānavāḥ // (32.2) Par.?
cīraṃ parṇaṃ ca vividhaṃ valkalāny ajināni ca / (33.1) Par.?
svayaṃ kṛtvā nivatsyanti yathā munijanās tathā // (33.2) Par.?
bījānām ākṛtiṃ nimneṣv īhante kāṣṭhaśaṅkubhiḥ / (34.1) Par.?
ajaiḍakaṃ kharoṣṭraṃ ca pālayiṣyanti yatnataḥ // (34.2) Par.?
nadīsrotāṃsi rotsyanti toyārthaṃ kūlam āśritāḥ / (35.1) Par.?
pakvānnavyavahāreṇa vipaṇantaḥ parasparam // (35.2) Par.?
tanūruhair yathājātaiḥ samalāntarasaṃvṛtaiḥ / (36.1) Par.?
bahvapatyāḥ prajāhīnāḥ krūrā lakṣaṇavarjitāḥ // (36.2) Par.?
evaṃ bhaviṣyanti tadā manuṣyāḥ kālakāritāḥ / (37.1) Par.?
hīnāddhīnaṃ tadā dharmaṃ prajā samanuvartsyati // (37.2) Par.?
āyus tatra ca martyānāṃ paraṃ triṃśad bhaviṣyati / (38.1) Par.?
durbalā viṣayaglānā rajasā samabhiplutāḥ // (38.2) Par.?
bhaviṣyati tadā teṣāṃ rogair indriyasaṃkṣayaḥ / (39.1) Par.?
āyuḥprakṣayasaṃrodhāddhiṃsā coparamiṣyati // (39.2) Par.?
śuśrūṣavo bhaviṣyanti sādhūnāṃ darśane ratāḥ / (40.1) Par.?
satyaṃ cāpi prapatsyanti vyavahārāpaśaṅkayā // (40.2) Par.?
bhaviṣyanti ca kāmānām alābhād dharmaśīlinaḥ / (41.1) Par.?
kariṣyanti ca saṃkocaṃ svapakṣakṣayapīḍitāḥ // (41.2) Par.?
evaṃ śuśrūṣavo dāne satye prāṇābhirakṣaṇe / (42.1) Par.?
catuṣpādapravṛttaṃ ca dharmam āpsyanti mānavāḥ // (42.2) Par.?
teṣāṃ dharmābhimānānāṃ guṇeṣu parivartatām / (43.1) Par.?
svādu kiṃ nv iti vijñāya dharma eva svadiṣyati // (43.2) Par.?
yathā hāniḥ kramaprāptā tathā vṛddhiḥ kramāgatā / (44.1) Par.?
pragṛhīte tato dharme prapatsyanti kṛtaṃ punaḥ // (44.2) Par.?
sādhuvṛttiḥ kṛtayuge kaṣāye hānir ucyate / (45.1) Par.?
eka eva tu kālaḥ sa hīnavarṇo yathā śaśī // (45.2) Par.?
channo hi tamasā somo yathā kaliyuge tathā / (46.1) Par.?
pūrṇaś ca tapasā hīno yathā kaliyuge tathā // (46.2) Par.?
arthavādaparo dharmo vedārtha iti tu viduḥ / (47.1) Par.?
anirṇiktam avijñātaṃ dāyādyam iva dhāryate // (47.2) Par.?
iṣṭaṃ dānaṃ tapo nāma brahmacaryaṃ supūjitam / (48.1) Par.?
guṇaiḥ karmābhinirvṛttir guṇās tathyena karmaṇā // (48.2) Par.?
āśīs tu puruṣaṃ dṛṣṭvā deśakālānuvartinī / (49.1) Par.?
yuge yuge yathākālam ṛṣibhiḥ samudāhṛtā // (49.2) Par.?
iha dharmārthakāmānāṃ vedānāṃ ca pratikriyā / (50.1) Par.?
āśiṣaś ca śubhāḥ puṇyās tathaivāyur yuge yuge // (50.2) Par.?
yathā yugānāṃ parivartanāni cirapravṛttāni vidhisvabhāvāt / (51.1) Par.?
kṣaṇaṃ na saṃtiṣṭhati jīvalokaḥ kṣayodayābhyāṃ parivartamānaḥ // (51.2) Par.?
Duration=0.27141189575195 secs.