Texts

athātaḥ kṣārapākavidhim adhyāyaṃ vyākhyāsyāmaḥ // (1.1) Par.?

yathovāca bhagavān dhanvantariḥ // (2.1) Par.?

śastrānuśastrebhyaḥ kṣāraḥ pradhānatamaḥ chedyabhedyalekhyakaraṇāt tridoṣaghnatvād viśeṣakriyāvacāraṇācca // (3.1) Par.?

tatra kṣaraṇāt kṣaṇanādvā kṣāraḥ // (4.1) Par.?

nānauṣadhisamavāyāttridoṣaghnaḥ śuklatvāt saumyaḥ tasya saumyasyāpi sato dahanapacanadāraṇādiśaktiraviruddhā sa khalvāgneyauṣadhiguṇabhūyiṣṭhatvāt kaṭuka uṣṇastīkṣṇaḥ pācano vilayanaḥ śodhano ropaṇaḥ śoṣaṇaḥ stambhano lekhanaḥ kṛmyāmakaphakuṣṭhaviṣamedasām upahantā puṃstvasya cātisevitaḥ // (5.1) Par.?

sa dvividhaḥ pratisāraṇīyaḥ pānīyaś ca // (6.1) Par.?

tatra pratisāraṇīyaḥ kuṣṭhakiṭibhadadrumaṇḍalakilāsabhagaṃdarārbudārśoduṣṭavraṇanāḍīcarmakīlatilakālakanyacchavyaṅgamaśakabāhyavidradhikṛmiviṣādiṣūpadiśyate saptasu ca mukharogeṣūpajihvādhijihvopakuśadantavaidarbheṣu tisṛṣu ca rohiṇīṣu eteṣvevānuśastrapraṇidhānam uktam // (7.1) Par.?

pānīyastu garagulmodarāgnisaṅgājīrṇārocakānāhaśarkarāśmaryābhyantaravidradhikṛmiviṣārśaḥsūpayujyate // (8.1) Par.?

ahitastu raktapittajvaritapittaprakṛtibālavṛddhadurbalabhramamadamūrchātimiraparītebhyo 'nyebhyaścaivaṃvidhebhyaḥ // (9.1) Par.?

taṃ cetarakṣāravaddagdhvā parisrāvayet tasya vistaro 'nyatra // (10.1) Par.?

athetarastrividho mṛdurmadhyastīkṣṇaś ca / (11.1) Par.?

taṃ cikīrṣuḥ śaradi girisānujaṃ śucirupoṣya praśaste 'hani praśastadeśajātam anupahataṃ madhyamavayasaṃ mahāntam asitamuṣkakam adhivāsyāparedyuḥ pāṭayitvā khaṇḍaśaḥ prakalpyāvapāṭya nirvāte deśe nicitiṃ kṛtvā sudhāśarkarāś ca prakṣipya tilanālair ādīpayet / (11.2) Par.?

athopaśānte 'gnau tadbhasma pṛthaggṛhṇīyādbhasmaśarkarāś ca / (11.3) Par.?

athānenaiva vidhānena kuṭajapalāśāśvakarṇapāribhadrakavibhītakāragvadhatilvakārkasnuhyapāmārgapāṭalānaktamālavṛṣakadalīcitrakapūtīkendravṛkṣāsphotāśvamārakasaptacchadāgnimanthaguñjāścatasraś ca kośātakīḥ samūlaphalapattraśākhā dahet / (11.4) Par.?

tataḥ kṣāradroṇamudakadroṇaiḥ ṣaḍbhir āloḍya mūtrair vā yathoktair ekaviṃśatikṛtvaḥ parisrāvya mahati kaṭāhe śanair darvyāvaghaṭṭayan vipacet / (11.5) Par.?

sa yadā bhavatyaccho raktastīkṣṇaḥ picchilaś ca tamādāya mahati vastre parisrāvyetaraṃ vibhajya punaragnāvadhiśrayet / (11.6) Par.?

tata eva kṣārodakāt kuḍavamadhyardhaṃ vāpanayet / (11.7) Par.?

tataḥ kaṭaśarkarābhasmaśarkarākṣīrapākaśaṅkhanābhīr agnivarṇāḥ kṛtvāyase pātre tasminneva kṣārodake niṣicya piṣṭvā tenaiva dvidroṇe 'ṣṭapalasaṃmitaṃ śaṅkhanābhyādīnāṃ pramāṇaṃ prativāpya satatam apramattaś cainam avaghaṭṭayan vipacet / (11.8) Par.?

sa yathā nātisāndro nātidravaś ca bhavati tathā prayateta / (11.9) Par.?

athainam āgatapākam avatāryānuguptam āyase kumbhe saṃvṛtamukhe nidadhyādeṣa madhyamaḥ // (11.10) Par.?

eṣa evāpratīvāpaḥ pakvaḥ saṃvyūhimo mṛduḥ // (12.1) Par.?

pratīvāpe yathālābhaṃ dantīdravantīcitrakalāṅgalīpūtikapravālatālapattrīviḍasuvarcikākanakakṣīrīhiṅguvacātiviṣāḥ samāḥ ślakṣṇacūrṇāḥ śuktipramāṇāḥ pratīvāpaḥ / (13.1) Par.?

sa eva sapratīvāpaḥ pakvaḥ pākyastīkṣṇaḥ // (13.2) Par.?

teṣāṃ yathāvyādhibalam upayogaḥ // (14.1) Par.?

kṣīṇabale tu kṣārodakam āvapedbalakaraṇārtham // (15.1) Par.?

bhavataś cātra / (16.1) Par.?

naivātitīkṣṇo na mṛduḥ śuklaḥ ślakṣṇo 'tha picchilaḥ / (16.2) Par.?

aviṣyandī śivaḥ śīghraḥ kṣāro hyaṣṭaguṇaḥ smṛtaḥ // (16.3) Par.?

atimārdavaśvaityauṣṇyataikṣṇyapaicchilyasarpitāḥ / (17.1) Par.?

sāndratāpakvatā hīnadravyatā doṣa ucyate // (17.2) Par.?

tatra kṣārasādhyavyādhivyādhitam upaveśya nivātātape deśe 'saṃbādhe 'gropaharaṇīyoktena vidhānenopasaṃbhṛtasambhāraṃ tato 'sya tamavakāśaṃ nirīkṣyāvaghṛṣyāvalikhya pracchayitvā śalākayā kṣāraṃ pratisārayet dattvā vākśatamātramupekṣeta // (18.1) Par.?

tasminnipatite vyādhau kṛṣṇatā dagdhalakṣaṇam / (19.1) Par.?

tatrāmlavargaḥ śamanaḥ sarpirmadhukasaṃyutaḥ // (19.2) Par.?

atha cet sthiramūlatvāt kṣāradagdhaṃ na śīryate / (20.1) Par.?

idamālepanaṃ tatra samagramavacārayet // (20.2) Par.?

amlakāñjikabījāni tilān madhukam eva ca / (21.1) Par.?

prapeṣya samabhāgāni tenainamanulepayet // (21.2) Par.?

tilakalkaḥ samadhuko ghṛtākto vraṇaropaṇaḥ / (22.1) Par.?

rasenāmlena tīkṣṇena vīryoṣṇena ca yojitaḥ // (22.2) Par.?

āgneyenāgninā tulyaḥ kathaṃ kṣāraḥ praśāmyati / (23.1) Par.?

evaṃ cenmanyase vatsa procyamānaṃ nibodha me // (23.2) Par.?

kaṭukastatra bhūyiṣṭho lavaṇo 'nurasastathā / (24.1) Par.?

amlena saha saṃyuktaḥ satīkṣṇalavaṇo rasaḥ // (24.2) Par.?

mādhuryaṃ bhajate 'tyarthaṃ tīkṣṇabhāvaṃ vimuñcati / (25.1) Par.?

mādhuryācchamamāpnoti vahnir adbhir ivāplutaḥ // (25.2) Par.?

tatra samyagdagdhe vikāropaśamo lāghavam anāsrāvaś ca / (26.1) Par.?

hīnadagdhe todakaṇḍujāḍyāni vyādhivṛddhiś ca / (26.2) Par.?

atidagdhe dāhapākarāgasrāvāṅgamardaklamapipāsāmūrchāḥ syurmaraṇaṃ vā // (26.3) Par.?

kṣāradagdhavraṇaṃ tu yathādoṣaṃ yathāvyādhi copakramet // (27.1) Par.?

atha naite kṣārakṛtyāḥ tadyathā durbalabālasthavirabhīrusarvāṅgaśūnodariraktapittigarbhiṇyṛtumatīpravṛddhajvaripramehirūkṣakṣatakṣīṇatṛṣṇāmūrcchopadrutaklībāpavṛttodvṛttaphalayonayaḥ // (28.1) Par.?

tathā marmasirāsnāyusaṃdhitaruṇāsthisevanīdhamanīgalanābhinakhāntaḥśephaḥsrotaḥsvalpamāṃseṣu ca pradeśeṣv akṣṇoś ca na dadyādanyatra vartmarogāt // (29.1) Par.?

tatra kṣārasādhyeṣvapi vyādhiṣu śūnagātram asthiśūlinam annadveṣiṇaṃ hṛdayasaṃdhipīḍopadrutaṃ ca kṣāro na sādhayati // (30.1) Par.?

bhavati cātra / (31.1) Par.?

viṣāgniśastrāśanimṛtyukalpaḥ kṣāro bhavatyalpamatiprayuktaḥ / (31.2) Par.?

sa dhīmatā samyaganuprayukto rogānnihanyādacireṇa ghorān // (31.3) Par.?