Texts

saṃdiśya rāmaṃ nṛpatiḥ śvobhāviny abhiṣecane / (1.1) Par.?

purohitaṃ samāhūya vasiṣṭham idam abravīt // (1.2) Par.?

gacchopavāsaṃ kākutsthaṃ kārayādya tapodhana / (2.1) Par.?

śrīyaśorājyalābhāya vadhvā saha yatavratam // (2.2) Par.?

tatheti ca sa rājānam uktvā vedavidāṃ varaḥ / (3.1) Par.?

svayaṃ vasiṣṭho bhagavān yayau rāmaniveśanam // (3.2) Par.?

sa rāmabhavanaṃ prāpya pāṇḍurābhraghanaprabham / (4.1) Par.?

tisraḥ kakṣyā rathenaiva viveśa munisattamaḥ // (4.2) Par.?

tam āgatam ṛṣiṃ rāmas tvarann iva sasaṃbhramaḥ / (5.1) Par.?

mānayiṣyan sa mānārhaṃ niścakrāma niveśanāt // (5.2) Par.?

abhyetya tvaramāṇaś ca rathābhyāśaṃ manīṣiṇaḥ / (6.1) Par.?

tato 'vatārayāmāsa parigṛhya rathāt svayam // (6.2) Par.?

sa cainaṃ praśritaṃ dṛṣṭvā sambhāṣyābhiprasādya ca / (7.1) Par.?

priyārhaṃ harṣayan rāmam ity uvāca purohitaḥ // (7.2) Par.?

prasannas te pitā rāma yauvarājyam avāpsyasi / (8.1) Par.?

upavāsaṃ bhavān adya karotu saha sītayā // (8.2) Par.?

prātas tvām abhiṣektā hi yauvarājye narādhipaḥ / (9.1) Par.?

pitā daśarathaḥ prītyā yayātiṃ nahuṣo yathā // (9.2) Par.?

ity uktvā sa tadā rāmam upavāsaṃ yatavratam / (10.1) Par.?

mantravat kārayāmāsa vaidehyā sahitaṃ muniḥ // (10.2) Par.?

tato yathāvad rāmeṇa sa rājño gurur arcitaḥ / (11.1) Par.?

abhyanujñāpya kākutsthaṃ yayau rāmaniveśanāt // (11.2) Par.?

suhṛdbhis tatra rāmo 'pi tān anujñāpya sarvaśaḥ / (12.1) Par.?

sabhājito viveśātha tān anujñāpya sarvaśaḥ // (12.2) Par.?

hṛṣṭanārīnarayutaṃ rāmaveśma tadā babhau / (13.1) Par.?

yathā mattadvijagaṇaṃ praphullanalinaṃ saraḥ // (13.2) Par.?

sa rājabhavanaprakhyāt tasmād rāmaniveśanāt / (14.1) Par.?

nirgatya dadṛśe mārgaṃ vasiṣṭho janasaṃvṛtam // (14.2) Par.?

vṛndavṛndair ayodhyāyāṃ rājamārgāḥ samantataḥ / (15.1) Par.?

babhūvur abhisaṃbādhāḥ kutūhalajanair vṛtāḥ // (15.2) Par.?

janavṛndormisaṃgharṣaharṣasvanavatas tadā / (16.1) Par.?

babhūva rājamārgasya sāgarasyeva nisvanaḥ // (16.2) Par.?

siktasaṃmṛṣṭarathyā hi tad ahar vanamālinī / (17.1) Par.?

āsīd ayodhyā nagarī samucchritagṛhadhvajā // (17.2) Par.?

tadā hy ayodhyānilayaḥ sastrībālābalo janaḥ / (18.1) Par.?

rāmābhiṣekam ākāṅkṣann ākāṅkṣann udayaṃ raveḥ // (18.2) Par.?

prajālaṃkārabhūtaṃ ca janasyānandavardhanam / (19.1) Par.?

utsuko 'bhūj jano draṣṭuṃ tam ayodhyāmahotsavam // (19.2) Par.?

evaṃ taṃ janasambādhaṃ rājamārgaṃ purohitaḥ / (20.1) Par.?

vyūhann iva janaughaṃ taṃ śanai rājakulaṃ yayau // (20.2) Par.?

sitābhraśikharaprakhyaṃ prāsādam adhiruhya saḥ / (21.1) Par.?

samiyāya narendreṇa śakreṇeva bṛhaspatiḥ // (21.2) Par.?

tam āgatam abhiprekṣya hitvā rājāsanaṃ nṛpaḥ / (22.1) Par.?

papraccha sa ca tasmai tat kṛtam ity abhyavedayat // (22.2) Par.?

guruṇā tv abhyanujñāto manujaughaṃ visṛjya tam / (23.1) Par.?

viveśāntaḥpuraṃ rājā siṃho giriguhām iva // (23.2) Par.?

tad agryaveṣapramadājanākulaṃ mahendraveśmapratimaṃ niveśanam / (24.1) Par.?

vidīpayaṃś cāru viveśa pārthivaḥ śaśīva tārāgaṇasaṃkulaṃ nabhaḥ // (24.2) Par.?