Texts

evam uktā tu vaidehī priyārhā priyavādinī / (1.1) Par.?

praṇayād eva saṃkruddhā bhartāram idam abravīt // (1.2) Par.?

āryaputra pitā mātā bhrātā putras tathā snuṣā / (2.1) Par.?

svāni puṇyāni bhuñjānāḥ svaṃ svaṃ bhāgyam upāsate // (2.2) Par.?

bhartur bhāgyaṃ tu bhāryaikā prāpnoti puruṣarṣabha / (3.1) Par.?

ataś caivāham ādiṣṭā vane vastavyam ity api // (3.2) Par.?

na pitā nātmajo nātmā na mātā na sakhījanaḥ / (4.1) Par.?

iha pretya ca nārīṇāṃ patir eko gatiḥ sadā // (4.2) Par.?

yadi tvaṃ prasthito durgaṃ vanam adyaiva rāghava / (5.1) Par.?

agratas te gamiṣyāmi mṛdnantī kuśakaṇṭakān // (5.2) Par.?

īrṣyāroṣau bahiṣkṛtya bhuktaśeṣam ivodakam / (6.1) Par.?

naya māṃ vīra viśrabdhaḥ pāpaṃ mayi na vidyate // (6.2) Par.?

prāsādāgrair vimānair vā vaihāyasagatena vā / (7.1) Par.?

sarvāvasthāgatā bhartuḥ pādacchāyā viśiṣyate // (7.2) Par.?

anuśiṣṭāsmi mātrā ca pitrā ca vividhāśrayam / (8.1) Par.?

nāsmi samprati vaktavyā vartitavyaṃ yathā mayā // (8.2) Par.?

sukhaṃ vane nivatsyāmi yathaiva bhavane pituḥ / (9.1) Par.?

acintayantī trīṃl lokāṃś cintayantī pativratam // (9.2) Par.?

śuśrūṣamāṇā te nityaṃ niyatā brahmacāriṇī / (10.1) Par.?

saha raṃsye tvayā vīra vaneṣu madhugandhiṣu // (10.2) Par.?

tvaṃ hi kartuṃ vane śakto rāma samparipālanam / (11.1) Par.?

anyasyāpi janasyeha kiṃ punar mama mānada // (11.2) Par.?

phalamūlāśanā nityaṃ bhaviṣyāmi na saṃśayaḥ / (12.1) Par.?

na te duḥkhaṃ kariṣyāmi nivasantī saha tvayā // (12.2) Par.?

icchāmi saritaḥ śailān palvalāni vanāni ca / (13.1) Par.?

draṣṭuṃ sarvatra nirbhītā tvayā nāthena dhīmatā // (13.2) Par.?

haṃsakāraṇḍavākīrṇāḥ padminīḥ sādhupuṣpitāḥ / (14.1) Par.?

iccheyaṃ sukhinī draṣṭuṃ tvayā vīreṇa saṃgatā // (14.2) Par.?

saha tvayā viśālākṣa raṃsye paramanandinī / (15.1) Par.?

evaṃ varṣasahasrāṇāṃ śataṃ vāhaṃ tvayā saha // (15.2) Par.?

svarge 'pi ca vinā vāso bhavitā yadi rāghava / (16.1) Par.?

tvayā mama naravyāghra nāhaṃ tam api rocaye // (16.2) Par.?

ahaṃ gamiṣyāmi vanaṃ sudurgamaṃ mṛgāyutaṃ vānaravāraṇair yutam / (17.1) Par.?

vane nivatsyāmi yathā pitur gṛhe tavaiva pādāv upagṛhya saṃmatā // (17.2) Par.?

ananyabhāvām anuraktacetasaṃ tvayā viyuktāṃ maraṇāya niścitām / (18.1) Par.?

nayasva māṃ sādhu kuruṣva yācanāṃ na te mayāto gurutā bhaviṣyati // (18.2) Par.?

tathā bruvāṇām api dharmavatsalo na ca sma sītāṃ nṛvaro ninīṣati / (19.1) Par.?

uvāca caināṃ bahu saṃnivartane vane nivāsasya ca duḥkhitāṃ prati // (19.2) Par.?