Texts

suniviṣṭaṃ hitaṃ vākyam uktavantaṃ vibhīṣaṇam / (1.1) Par.?

abravīt paruṣaṃ vākyaṃ rāvaṇaḥ kālacoditaḥ // (1.2) Par.?

vaset saha sapatnena kruddhenāśīviṣeṇa vā / (2.1) Par.?

na tu mitrapravādena saṃvasecchatrusevinā // (2.2) Par.?

jānāmi śīlaṃ jñātīnāṃ sarvalokeṣu rākṣasa / (3.1) Par.?

hṛṣyanti vyasaneṣvete jñātīnāṃ jñātayaḥ sadā // (3.2) Par.?

pradhānaṃ sādhakaṃ vaidyaṃ dharmaśīlaṃ ca rākṣasa / (4.1) Par.?

jñātayo hyavamanyante śūraṃ paribhavanti ca // (4.2) Par.?

nityam anyonyasaṃhṛṣṭā vyasaneṣvātatāyinaḥ / (5.1) Par.?

pracchannahṛdayā ghorā jñātayastu bhayāvahāḥ // (5.2) Par.?

śrūyante hastibhir gītāḥ ślokāḥ padmavane kvacit / (6.1) Par.?

pāśahastānnarān dṛṣṭvā śṛṇu tān gadato mama // (6.2) Par.?

nāgnir nānyāni śastrāṇi na naḥ pāśā bhayāvahāḥ / (7.1) Par.?

ghorāḥ svārthaprayuktāstu jñātayo no bhayāvahāḥ // (7.2) Par.?

upāyam ete vakṣyanti grahaṇe nātra saṃśayaḥ / (8.1) Par.?

kṛtsnād bhayājjñātibhayaṃ sukaṣṭaṃ viditaṃ ca naḥ // (8.2) Par.?

vidyate goṣu sampannaṃ vidyate brāhmaṇe damaḥ / (9.1) Par.?

vidyate strīṣu cāpalyaṃ vidyate jñātito bhayam // (9.2) Par.?

tato neṣṭam idaṃ saumya yad ahaṃ lokasatkṛtaḥ / (10.1) Par.?

aiśvaryam abhijātaśca ripūṇāṃ mūrdhni ca sthitaḥ // (10.2) Par.?

anyastvevaṃvidhaṃ brūyād vākyam etanniśācara / (11.1) Par.?

asminmuhūrte na bhavet tvāṃ tu dhik kulapāṃsanam // (11.2) Par.?

ityuktaḥ paruṣaṃ vākyaṃ nyāyavādī vibhīṣaṇaḥ / (12.1) Par.?

utpapāta gadāpāṇiścaturbhiḥ saha rākṣasaiḥ // (12.2) Par.?

abravīcca tadā vākyaṃ jātakrodho vibhīṣaṇaḥ / (13.1) Par.?

antarikṣagataḥ śrīmān bhrātaraṃ rākṣasādhipam // (13.2) Par.?

sa tvaṃ bhrātāsi me rājan brūhi māṃ yad yad icchasi / (14.1) Par.?

idaṃ tu paruṣaṃ vākyaṃ na kṣamāmyanṛtaṃ tava // (14.2) Par.?

sunītaṃ hitakāmena vākyam uktaṃ daśānana / (15.1) Par.?

na gṛhṇantyakṛtātmānaḥ kālasya vaśam āgatāḥ // (15.2) Par.?

sulabhāḥ puruṣā rājan satataṃ priyavādinaḥ / (16.1) Par.?

apriyasya tu pathyasya vaktā śrotā ca durlabhaḥ // (16.2) Par.?

baddhaṃ kālasya pāśena sarvabhūtāpahāriṇā / (17.1) Par.?

na naśyantam upekṣeyaṃ pradīptaṃ śaraṇaṃ yathā // (17.2) Par.?

dīptapāvakasaṃkāśaiḥ śitaiḥ kāñcanabhūṣaṇaiḥ / (18.1) Par.?

na tvām icchāmyahaṃ draṣṭuṃ rāmeṇa nihataṃ śaraiḥ // (18.2) Par.?

śūrāśca balavantaśca kṛtāstrāśca raṇājire / (19.1) Par.?

kālābhipannāḥ sīdanti yathā vālukasetavaḥ // (19.2) Par.?

ātmānaṃ sarvathā rakṣa purīṃ cemāṃ sarākṣasām / (20.1) Par.?

svasti te 'stu gamiṣyāmi sukhī bhava mayā vinā // (20.2) Par.?

nivāryamāṇasya mayā hitaiṣiṇā na rocate te vacanaṃ niśācara / (21.1) Par.?

parītakālā hi gatāyuṣo narā hitaṃ na gṛhṇanti suhṛdbhir īritam // (21.2) Par.?