Texts

nānākṣauṇījanānājalamṛgasahitaṃ nirjharavrātaśītaṃ śailākīrṇaṃ kanīyaḥ kuraramukhakhagālaṃkṛtaṃ tāmrabhūmi / (1.1) Par.?

bibhrad vrīhyādikaṃ yat sthalam ativipulaṃ nīrasaṃ yat tv anuṣṇaṃ pittaghnaṃ śleṣmavātapradam udararujāpāmadaṃ syād anūpam // (1.2) Par.?

tac coktakṛtsnanijalakṣaṇadhāribhūrichāyāvṛtāntaravahad bahuvārimukhyam / (2.1) Par.?

īṣat prakāśasalilaṃ yadi madhyamaṃ tat etac ca nātibahalāmbu bhavet kanīyaḥ // (2.2) Par.?

yatrānūpaviparyayas tanutṛṇāstīrṇā dharā dhūsarā mudgavrīhiyavādidhānyaphaladā tīvroṣmavaty uttamā / (3.1) Par.?

prāyaḥ pittavivṛddhir uddhatabalāḥ syur nīrajaḥ prāṇino gāvo 'jāś ca payaḥ kṣaranti bahu tatkūpe jalaṃ jāṅgalam // (3.2) Par.?

etac ca mukhyam uditaṃ svaguṇaiḥ samagram alpālpabhūruhayutaṃ yadi madhyamaṃ tat / (4.1) Par.?

tac cāpi kūpakhanane sulabhāmbu yat taj jñeyaṃ kanīya iti jāṅgalakaṃ trirūpam // (4.2) Par.?

lakṣmonmīlati yatra kiṃcid ubhayos taj jāṅgalānūpayor godhūmolvaṇayāvanālavilasanmāṣādidhānyodbhavaḥ / (5.1) Par.?

nānāvarṇam aśeṣajantusukhadaṃ deśaṃ budhā madhyamaṃ doṣodbhūtivikopaśāntisahitaṃ sādhāraṇaṃ taṃ viduḥ // (5.2) Par.?

tac ca sādhāraṇaṃ dvedhānūpajāṅgalayoḥ param / (6.1) Par.?

yatra yatra guṇādhikyaṃ tatra tasya guṇaṃ bhajet // (6.2) Par.?

mukhyaṃ taddeśavaiṣamyān nāsti sādhāraṇaṃ kvacit / (7.1) Par.?

sūkṣmatvāl lakṣma tattvasya tadvidhair vedam iṣyate // (7.2) Par.?

kṣetrabhedaṃ pravakṣyāmi śivenākhyātam añjasā / (8.1) Par.?

brāhmaṃ kṣātraṃ ca vaiśyīyaṃ śaudraṃ ceti yathākramāt // (8.2) Par.?

tatra kṣetre brahmabhūmīruhāḍhyaṃ vārisphāraṃ yat kuśāṅkūrakīrṇam / (9.1) Par.?

ramyaṃ yac ca śvetamṛtsnāsametaṃ tad vyācaṣṭe brāhmam ity aṣṭamūrtiḥ // (9.2) Par.?

tāmrabhūmivalayaṃ vibhūdharaṃ yan mṛgendramukhasaṃkulaṃ kulam / (10.1) Par.?

ghoraghoṣi khadirādidurgamaṃ kṣātram etad uditaṃ pinākinā // (10.2) Par.?

śātakumbhanibhabhūmibhāsvaraṃ svarṇareṇunicitaṃ vidhānavat / (11.1) Par.?

siddhakiṃnarasuparvasevitaṃ vaiśyam ākhyad idam induśekharaḥ // (11.2) Par.?

śyāmasthalāḍhyaṃ bahuśasyabhūtidaṃ lasattṛṇair babbulavṛkṣavṛddhidam / (12.1) Par.?

dhānyodbhavaiḥ karṣakalokaharṣadaṃ jagāda śaudraṃ jagatau vṛṣadhvajaḥ // (12.2) Par.?

dravyaṃ kṣetrād uditam anaghaṃ brāhma tat siddhidāyi kṣatrād utthaṃ valipalitajid viśvarogāpahāri / (13.1) Par.?

vaiśyāj jātaṃ prabhavatitarāṃ dhātulohādisiddhau śaudrād etaj janitam akhilavyādhividrāvakaṃ drāk // (13.2) Par.?

brahmā śakraḥ kiṃnareśas tathā bhūr ity eteṣāṃ devatāḥ syuḥ krameṇa / (14.1) Par.?

proktās tatra prāg umāvallabhena pratyekaṃ te pañca bhūtāni vakṣye // (14.2) Par.?

pītasphuradvalayaśarkarilāśmaramyaṃ pītaṃ yad uttamamṛgaṃ caturasrabhūtam / (15.1) Par.?

prāyaś ca pītakusumānvitavīrudādi tat pārthivaṃ kaṭhinam udyad aśeṣatas tu // (15.2) Par.?

ardhacandrākṛtiśvetaṃ kamalābhaṃ dṛṣaccitam / (16.1) Par.?

nadīnadajalākīrṇam āpyaṃ tat kṣetram ucyate // (16.2) Par.?

khadirādidrumākīrṇaṃ bhūricitrakaveṇukam / (17.1) Par.?

trikoṇaṃ raktapāṣāṇaṃ kṣetraṃ taijasam uttamam // (17.2) Par.?

dhūmrasthalaṃ dhūmradṛṣatparītaṃ ṣaṭkoṇakaṃ tūrṇamṛgāvakīrṇam / (18.1) Par.?

śākais tṛṇair añcitarūkṣavṛkṣakaṃ prakāram etat khalu vāyavīyam // (18.2) Par.?

nānāvarṇaṃ vartulaṃ tat praśastaṃ prāyaḥ śubhraṃ parvatākīrṇam uccaiḥ / (19.1) Par.?

yacca sthānaṃ pāvanaṃ devatānāṃ prāha kṣetraṃ trīkṣaṇas tv āntarikṣam // (19.2) Par.?

dravyaṃ vyādhiharaṃ balātiśayakṛt svādu sthiraṃ pārthivaṃ syād āpyaṃ kaṭukaṃ kaṣāyam akhilaṃ śītaṃ ca pittāpaham / (20.1) Par.?

yat tiktaṃ lavaṇaṃ ca dīpyamarujic coṣṇaṃ ca tat taijasaṃ vāyavyaṃ tu himoṣṇam amlam abalaṃ syān nābhasaṃ nīrasam // (20.2) Par.?

brahmā viṣṇuś ca rudro 'smād īśvaro 'tha sadāśivaḥ / (21.1) Par.?

ity etāḥ kāmataḥ pañca kṣetrabhūtādhidevatāḥ // (21.2) Par.?

jitvā javād ajarasainyam ihājahāra vīraḥ purā yudhi sudhākalaśaṃ garutmān / (22.1) Par.?

kīrṇais tadā bhuvi sudhāśakalaiḥ kilāsīd vṛkṣādikaṃ sakalam asya sudhāṃśur īśaḥ // (22.2) Par.?

tatrotpannās tūttame kṣetrabhāge viprīyādau vipruṣo yatra yatra / (23.1) Par.?

kṣauṇījādidravyabhūyaṃ prapannās tās tāḥ saṃjñā bibhrate tatra bhūyaḥ // (23.2) Par.?

evaṃ kṣetrānuguṇyena tajjā viprādivarṇinaḥ / (24.1) Par.?

yadi vā lakṣaṇaṃ vakṣyāmy amohāya manīṣiṇām // (24.2) Par.?

kisalayakusume prakāṇḍaśākhādiṣu viśadeṣu vadanti vipram etān / (25.1) Par.?

narapatimatilohiteṣu vaiśyaṃ kanakanibheṣu sitetareṣu śūdram // (25.2) Par.?

viprādijātisambhūtān viprādiṣv eva yojayet / (26.1) Par.?

guṇāḍhyān api vṛkṣādīn prātilomyaṃ na cācaret // (26.2) Par.?

vipro viprādyeṣu varṇeṣu rājā rājanyādau vaiśyamukhyeṣu vaiśyaḥ / (27.1) Par.?

śūdraḥ śūdrādyeṣu śastaṃ guṇāḍhyaṃ dravyaṃ naiva prātilomyena kiṃcit // (27.2) Par.?

dravyaṃ yad aṅkūrajam āhur āryās tat te punaḥ pañcavidhaṃ vadanti / (28.1) Par.?

vanaspatiś cāpi sa eva vānaspatyaḥ kṣupo vīrud athauṣadhīś ca // (28.2) Par.?

jñeyaḥ so 'tra vanaspatiḥ phalati yaḥ puṣpair vinā taiḥ phalaṃ vānaspatya iti smṛtas tanur asau hrasvaḥ kṣupaḥ kathyate / (29.1) Par.?

yā vellaty agamādisaṃśrayavaśād eṣā tu vallī matā śālyādiḥ punar oṣadhiḥ phalaparīpākāvasānānvitā // (29.2) Par.?

strīpuṃnapuṃsakatvena traividhyaṃ sthāvareṣv api / (30.1) Par.?

śṛṇu vakṣyāmi tallakṣma vyaktam atra yathākramam // (30.2) Par.?

ikṣuveṇutaruvīrudādayaḥ skandhakāṇḍaphalapuṣpapallavaiḥ / (31.1) Par.?

snigdhadīrghatanutāmanoramās tāḥ striyaḥ khalu matā vipaścitām // (31.2) Par.?

yatra puṣpapravālādi nātidīrghaṃ na cālpakam / (32.1) Par.?

sthūlaṃ paruṣam ity eṣa pumān ukto manīṣibhiḥ // (32.2) Par.?

strīpuṃsayor yatra vibhāti lakṣma dvayor api skandhaphalādikeṣu / (33.1) Par.?

saṃdehadaṃ naikatarāvadhāri napuṃsakaṃ tadvibudhā vadanti // (33.2) Par.?

dravyaṃ pumān syād akhilasya jantor ārogyadaṃ tadbalavardhanaṃ ca / (34.1) Par.?

strī durbalā svalpaguṇā guṇāḍhyā strīṣv eva na kvāpi napuṃsakaḥ syāt // (34.2) Par.?

yadi striyaḥ strīṣu kṛtā guṇāḍhyāḥ klībāni tu klībaśarīrabhājām / (35.1) Par.?

sadā ca sarvatra pumān prayuktau guṇāvahaś ceti ca kecid āhuḥ // (35.2) Par.?

kṣutpipāsā ca nidrā ca vṛkṣādiṣv api lakṣyate / (36.1) Par.?

mṛjjalādānatas tv ādye parṇasaṃkocitāntimā // (36.2) Par.?

yatkāṭhinye sā kṣitiryodbhavo 'mbhastejastūṣmā vardhate yat sa vātaḥ / (37.1) Par.?

yad yacchidraṃ tan nabhaḥ sthāvarāṇām ity eteṣāṃ pañcabhūtātmakatvam // (37.2) Par.?

itthaṃ deśaguṇasvarūpakathanaprakrāntakāntārajakṣetradravyaguṇānvayakramam imaṃ vargaṃ paṭhitvā naraḥ / (38.1) Par.?

prāpnoty āśu bhiṣak prayogaviṣayaprāvīṇyapārīṇatāhaṃkurvāṇasuparvasaṃsadagadaṅkārakriyākauśalam // (38.2) Par.?

asūta sutam īśvaraḥ śrutayaśā yam aṣṭādaśaprabhedavidhavāṅmayāmbunidhipārapārīṇadhīḥ / (39.1) Par.?

amuṣya nṛharīśituḥ kṛtivarasya vargaḥ kṛtāvasāvagamadādimaḥ sadabhidhānacūḍāmaṇau // (39.2) Par.?