Texts

śiśupāla uvāca / (1.1) Par.?

sa me bahumato rājā jarāsaṃdho mahābalaḥ / (1.2) Par.?

yo 'nena yuddhaṃ neyeṣa dāso 'yam iti saṃyuge // (1.3) Par.?

keśavena kṛtaṃ yat tu jarāsaṃdhavadhe tadā / (2.1) Par.?

bhīmasenārjunābhyāṃ ca kastat sādhviti manyate // (2.2) Par.?

advāreṇa praviṣṭena chadmanā brahmavādinā / (3.1) Par.?

dṛṣṭaḥ prabhāvaḥ kṛṣṇena jarāsaṃdhasya dhīmataḥ // (3.2) Par.?

yena dharmātmanātmānaṃ brahmaṇyam abhijānatā / (4.1) Par.?

naiṣitaṃ pādyam asmai tad dātum agre durātmane // (4.2) Par.?

bhujyatām iti tenoktāḥ kṛṣṇabhīmadhanaṃjayāḥ / (5.1) Par.?

jarāsaṃdhena kauravya kṛṣṇena vikṛtaṃ kṛtam // (5.2) Par.?

yadyayaṃ jagataḥ kartā yathainaṃ mūrkha manyase / (6.1) Par.?

kasmānna brāhmaṇaṃ samyag ātmānam avagacchati // (6.2) Par.?

idaṃ tvāścaryabhūtaṃ me yad ime pāṇḍavāstvayā / (7.1) Par.?

apakṛṣṭāḥ satāṃ mārgānmanyante tacca sādhviti // (7.2) Par.?

atha vā naitad āścaryaṃ yeṣāṃ tvam asi bhārata / (8.1) Par.?

strīsadharmā ca vṛddhaśca sarvārthānāṃ pradarśakaḥ // (8.2) Par.?

vaiśaṃpāyana uvāca / (9.1) Par.?

tasya tad vacanaṃ śrutvā rūkṣaṃ rūkṣākṣaraṃ bahu / (9.2) Par.?

cukopa balināṃ śreṣṭho bhīmasenaḥ pratāpavān // (9.3) Par.?

tasya padmapratīkāśe svabhāvāyatavistṛte / (10.1) Par.?

bhūyaḥ krodhābhitāmrānte rakte netre babhūvatuḥ // (10.2) Par.?

triśikhāṃ bhrukuṭīṃ cāsya dadṛśuḥ sarvapārthivāḥ / (11.1) Par.?

lalāṭasthāṃ trikūṭasthāṃ gaṅgāṃ tripathagām iva // (11.2) Par.?

dantān saṃdaśatastasya kopād dadṛśur ānanam / (12.1) Par.?

yugānte sarvabhūtāni kālasyeva didhakṣataḥ // (12.2) Par.?

utpatantaṃ tu vegena jagrāhainaṃ manasvinam / (13.1) Par.?

bhīṣma eva mahābāhur mahāsenam iveśvaraḥ // (13.2) Par.?

tasya bhīmasya bhīṣmeṇa vāryamāṇasya bhārata / (14.1) Par.?

guruṇā vividhair vākyaiḥ krodhaḥ praśamam āgataḥ // (14.2) Par.?

nāticakrāma bhīṣmasya sa hi vākyam ariṃdamaḥ / (15.1) Par.?

samuddhūto ghanāpāye velām iva mahodadhiḥ // (15.2) Par.?

śiśupālastu saṃkruddhe bhīmasene narādhipa / (16.1) Par.?

nākampata tadā vīraḥ pauruṣe sve vyavasthitaḥ // (16.2) Par.?

utpatantaṃ tu vegena punaḥ punar ariṃdamaḥ / (17.1) Par.?

na sa taṃ cintayāmāsa siṃhaḥ kṣudramṛgaṃ yathā // (17.2) Par.?

prahasaṃścābravīd vākyaṃ cedirājaḥ pratāpavān / (18.1) Par.?

bhīmasenam atikruddhaṃ dṛṣṭvā bhīmaparākramam // (18.2) Par.?

muñcainaṃ bhīṣma paśyantu yāvad enaṃ narādhipāḥ / (19.1) Par.?

matpratāpāgninirdagdhaṃ pataṃgam iva vahninā // (19.2) Par.?

tataścedipater vākyaṃ tacchrutvā kurusattamaḥ / (20.1) Par.?

bhīmasenam uvācedaṃ bhīṣmo matimatāṃ varaḥ // (20.2) Par.?