Texts

vaiśampāyana uvāca / (1.1) Par.?

gacchan sa tīrthāni mahānubhāvaḥ puṇyāni ramyāṇi dadarśa rājā / (1.2) Par.?

sarvāṇi viprair upaśobhitāni kvacit kvacid bhārata sāgarasya // (1.3) Par.?

sa vṛttavāṃs teṣu kṛtābhiṣekaḥ sahānujaḥ pārthivaputrapautraḥ / (2.1) Par.?

samudragāṃ puṇyatamāṃ praśastāṃ jagāma pārikṣita pāṇḍuputraḥ // (2.2) Par.?

tatrāpi cāplutya mahānubhāvaḥ saṃtarpayāmāsa pitṝn surāṃśca / (3.1) Par.?

dvijātimukhyeṣu dhanaṃ visṛjya godāvarīṃ sāgaragām agacchat // (3.2) Par.?

tato vipāpmā draviḍeṣu rājan samudram āsādya ca lokapuṇyam / (4.1) Par.?

agastyatīrthaṃ ca pavitrapuṇyaṃ nārītīrthānyatha vīro dadarśa // (4.2) Par.?

tatrārjunasyāgryadhanurdharasya niśamya tat karma parair asahyam / (5.1) Par.?

sampūjyamānaḥ paramarṣisaṃghaiḥ parāṃ mudaṃ pāṇḍusutaḥ sa lebhe // (5.2) Par.?

sa teṣu tīrtheṣvabhiṣiktagātraḥ kṛṣṇāsahāyaḥ sahito 'nujaiś ca / (6.1) Par.?

sampūjayan vikramam arjunasya reme mahīpālapatiḥ pṛthivyām // (6.2) Par.?

tataḥ sahasrāṇi gavāṃ pradāya tīrtheṣu teṣvambudharottamasya / (7.1) Par.?

hṛṣṭaḥ saha bhrātṛbhir arjunasya saṃkīrtayāmāsa gavāṃ pradānam // (7.2) Par.?

sa tāni tīrthāni ca sāgarasya puṇyāni cānyāni bahūni rājan / (8.1) Par.?

krameṇa gacchan paripūrṇakāmaḥ śūrpārakaṃ puṇyatamaṃ dadarśa // (8.2) Par.?

tatrodadheḥ kaṃcid atītya deśaṃ khyātaṃ pṛthivyāṃ vanam āsasāda / (9.1) Par.?

taptaṃ surair yatra tapaḥ purastād iṣṭaṃ tathā puṇyatamair narendraiḥ // (9.2) Par.?

sa tatra tām agryadhanurdharasya vedīṃ dadarśāyatapīnabāhuḥ / (10.1) Par.?

ṛcīkaputrasya tapasvisaṃghaiḥ samāvṛtāṃ puṇyakṛd arcanīyām // (10.2) Par.?

tato vasūnāṃ vasudhādhipaḥ sa marudgaṇānāṃ ca tathāśvinoś ca / (11.1) Par.?

vaivasvatādityadhaneśvarāṇām indrasya viṣṇoḥ savitur vibhoś ca // (11.2) Par.?

bhagasya candrasya divākarasya pater apāṃ sādhyagaṇasya caiva / (12.1) Par.?

dhātuḥ pitṝṇāṃ ca tathā mahātmā rudrasya rājan sagaṇasya caiva // (12.2) Par.?

sarasvatyāḥ siddhagaṇasya caiva pūṣṇaś ca ye cāpyamarās tathānye / (13.1) Par.?

puṇyāni cāpyāyatanāni teṣāṃ dadarśa rājā sumanoharāṇi // (13.2) Par.?

teṣūpavāsān vividhān upoṣya dattvā ca ratnāni mahādhanāni / (14.1) Par.?

tīrtheṣu sarveṣu pariplutāṅgaḥ punaḥ sa śūrpārakam ājagāma // (14.2) Par.?

sa tena tīrthena tu sāgarasya punaḥ prayātaḥ saha sodarīyaiḥ / (15.1) Par.?

dvijaiḥ pṛthivyāṃ prathitaṃ mahadbhis tīrthaṃ prabhāsaṃ samupājagāma // (15.2) Par.?

tatrābhiṣiktaḥ pṛthulohitākṣaḥ sahānujair devagaṇān pitṝṃś ca / (16.1) Par.?

saṃtarpayāmāsa tathaiva kṛṣṇā te cāpi viprāḥ saha lomaśena // (16.2) Par.?

sa dvādaśāhaṃ jalavāyubhakṣaḥ kurvan kṣapāhaḥsu tadābhiṣekam / (17.1) Par.?

samantato 'gnīn upadīpayitvā tepe tapo dharmabhṛtāṃ variṣṭhaḥ // (17.2) Par.?

tam ugram āsthāya tapaś carantaṃ śuśrāva rāmaś ca janārdanaś ca / (18.1) Par.?

tau sarvavṛṣṇipravarau sasainyau yudhiṣṭhiraṃ jagmatur ājamīḍham // (18.2) Par.?

te vṛṣṇayaḥ pāṇḍusutān samīkṣya bhūmau śayānān maladigdhagātrān / (19.1) Par.?

anarhatīṃ draupadīṃ cāpi dṛṣṭvā suduḥkhitāścukruśur ārtanādam // (19.2) Par.?

tataḥ sa rāmaṃ ca janārdanaṃ ca kārṣṇiṃ ca sāmbaṃ ca śineśca pautram / (20.1) Par.?

anyāṃśca vṛṣṇīn upagamya pūjāṃ cakre yathādharmam adīnasattvaḥ // (20.2) Par.?

te cāpi sarvān pratipūjya pārthāṃs taiḥ satkṛtāḥ pāṇḍusutais tathaiva / (21.1) Par.?

yudhiṣṭhiraṃ saṃparivārya rājann upāviśan devagaṇā yathendram // (21.2) Par.?

teṣāṃ sa sarvaṃ caritaṃ pareṣāṃ vane ca vāsaṃ paramapratītaḥ / (22.1) Par.?

astrārtham indrasya gataṃ ca pārthaṃ kṛṣṇe śaśaṃsāmararājaputram // (22.2) Par.?

śrutvā tu te tasya vacaḥ pratītās tāṃścāpi dṛṣṭvā sukṛśān atīva / (23.1) Par.?

netrodbhavaṃ saṃmumucur daśārhā duḥkhārtijaṃ vāri mahānubhāvāḥ // (23.2) Par.?