Texts

sūta uvāca / (1.1) Par.?

gate maheśvare deve dagdhvā ca tripuraṃ kṣaṇāt / (1.2) Par.?

sadasyāha surendrāṇāṃ bhagavānpadmasaṃbhavaḥ // (1.3) Par.?

pitāmaha uvāca / (2.1) Par.?

saṃtyajya devadeveśaṃ liṅgamūrtimaheśvaram / (2.2) Par.?

tārapautro mahātejāstārakasya suto balī // (2.3) Par.?

tārakākṣo'pi ditijaḥ kamalākṣaś ca vīryavān / (3.1) Par.?

vidyunmālī ca daityeśaḥ anye cāpi sabāndhavāḥ // (3.2) Par.?

tyaktvā devaṃ mahādevaṃ māyayā ca hareḥ prabhoḥ / (4.1) Par.?

sarve vinaṣṭāḥ pradhvastāḥ svapuraiḥ purasaṃbhavaiḥ // (4.2) Par.?

tasmātsadā pūjanīyo liṅgamūrtiḥ sadāśivaḥ / (5.1) Par.?

yāvatpūjā sureśānāṃ tāvadeva sthitiryataḥ // (5.2) Par.?

pūjanīyaḥ śivo nityaṃ śraddhayā devapuṅgavaiḥ / (6.1) Par.?

sarvaliṅgamayo lokaḥ sarvaṃ liṅge pratiṣṭhitam // (6.2) Par.?

tasmāt sampūjayelliṅgaṃ ya icchetsiddhimātmanaḥ / (7.1) Par.?

sarve liṅgārcanādeva devā daityāś ca dānavāḥ // (7.2) Par.?

yakṣā vidyādharāḥ siddhā rākṣasāḥ piśitāśanāḥ / (8.1) Par.?

pitaro munayaścāpi piśācāḥ kinnarādayaḥ // (8.2) Par.?

arcayitvā liṅgamūrti saṃsiddhā nātra saṃśayaḥ / (9.1) Par.?

tasmālliṅgaṃ yajennityaṃ yena kenāpi vā surāḥ // (9.2) Par.?

paśavaś ca vayaṃ tasya devadevasya dhīmataḥ / (10.1) Par.?

paśutvaṃ ca parityajya kṛtvā pāśupataṃ tataḥ // (10.2) Par.?

pūjanīyo mahādevo liṅgamūrtiḥ sanātanaḥ / (11.1) Par.?

viśodhya caiva bhūtāni pañcabhiḥ praṇavaiḥ samam // (11.2) Par.?

prāṇāyāmaiḥ samāyuktaiḥ pañcabhiḥ surapuṅgavāḥ / (12.1) Par.?

caturbhiḥ praṇavaiścaiva prāṇāyāmaparāyaṇaiḥ // (12.2) Par.?

tribhiś ca praṇavairdevāḥ prāṇāyāmaistathāvidhaiḥ / (13.1) Par.?

dvidhā nyasya tathauṃkāraṃ prāṇāyāmaparāyaṇaḥ // (13.2) Par.?

tataścauṃkāram uccārya prāṇāpānau niyamya ca / (14.1) Par.?

jñānāmṛtena sarvāṅgānyāpūrya praṇavena ca // (14.2) Par.?

guṇatrayaṃ caturdhākhyam ahaṅkāraṃ ca suvratāḥ / (15.1) Par.?

tanmātrāṇi ca bhūtāni tathā buddhīndriyāṇi ca // (15.2) Par.?

karmendriyāṇi saṃśodhya puruṣaṃ yugalaṃ tathā / (16.1) Par.?

cidātmānaṃ tanuṃ kṛtvā cāgnirbhasmeti saṃspṛśet // (16.2) Par.?

vāyurbhasmeti ca vyoma tathāmbhaḥ pṛthivī tathā / (17.1) Par.?

triyāyuṣaṃ trisaṃdhyaṃ ca dhūlayed bhasitena yaḥ // (17.2) Par.?

sa yogī sarvatattvajño vrataṃ pāśupataṃ tvidam / (18.1) Par.?

bhavena pāśamokṣārthaṃ kathitaṃ devasattamāḥ // (18.2) Par.?

evaṃ pāśupataṃ kṛtvā sampūjya parameśvaram / (19.1) Par.?

liṅge purā mayā dṛṣṭe viṣṇunā ca mahātmanā // (19.2) Par.?

paśavo naiva jāyante varṣamātreṇa devatāḥ / (20.1) Par.?

asmābhiḥ sarvakāryāṇāṃ devamabhyarcya yatnataḥ // (20.2) Par.?

bāhye cābhyantare caiva manye kartavyamīśvaram / (21.1) Par.?

pratijñā mama viṣṇoś ca divyaiṣā surasattamāḥ // (21.2) Par.?

munīnāṃ ca na saṃdehas tasmāt sampūjayecchivam / (22.1) Par.?

sā hānistanmahacchidraṃ sa mohaḥ sā ca mūkatā // (22.2) Par.?

yatkṣaṇaṃ vā muhūrtaṃ vā śivamekaṃ na cintayet / (23.1) Par.?

bhavabhaktiparā ye ca bhavapraṇatacetasaḥ // (23.2) Par.?

bhavasaṃsmaraṇodyuktā na te duḥkhasya bhājanam / (24.1) Par.?

bhavanāni manojñāni divyamābharaṇaṃ striyaḥ // (24.2) Par.?

dhanaṃ vā tuṣṭiparyantaṃ śivapūjāvidheḥ phalam / (25.1) Par.?

ye vāñchanti mahābhogān rājyaṃ ca tridaśālaye / (25.2) Par.?

te'rcayantu sadā kālaṃ liṅgamūrtiṃ maheśvaram // (25.3) Par.?

hatvā bhittvā ca bhūtāni dagdhvā sarvamidaṃ jagat // (26.1) Par.?

yajedekaṃ virūpākṣaṃ na pāpaiḥ sa pralipyate / (27.1) Par.?

śailaṃ liṅgaṃ madīyaṃ hi sarvadevanamaskṛtam // (27.2) Par.?

ityuktvā pūrvamabhyarcya rudraṃ tribhuvaneśvaram / (28.1) Par.?

tuṣṭāva vāgbhir iṣṭābhir devadevaṃ triyaṃbakam // (28.2) Par.?

tadāprabhṛti śakrādyāḥ pūjayāmāsurīśvaram / (29.1) Par.?

sākṣātpāśupataṃ kṛtvā bhasmoddhūlitavigrahāḥ // (29.2) Par.?

iti śrīliṅgamahāpurāṇe pūrvabhāge brahmaproktaliṅgārcanavidhir nāma trisaptatitamo 'dhyāyaḥ // (30.1) Par.?