Texts

ṛṣaya ūcuḥ / (1.1) Par.?

nṛtyārambhaḥ kathaṃ śaṃbhoḥ kimarthaṃ vā yathātatham / (1.2) Par.?

vaktumarhasi cāsmākaṃ śrutaḥ skandāgrajodbhavaḥ // (1.3) Par.?

sūta uvāca / (2.1) Par.?

dāruko 'surasambhūtas tapasā labdhavikramaḥ / (2.2) Par.?

sūdayāmāsa kālāgniriva devāndvijottamān // (2.3) Par.?

dārukeṇa tadā devāstāḍitāḥ pīḍitā bhṛśam / (3.1) Par.?

brahmāṇaṃ ca tatheśānaṃ kumāraṃ viṣṇumeva ca // (3.2) Par.?

yamamindramanuprāpya strīvadhya iti cāsuraḥ / (4.1) Par.?

strīrūpadhāribhiḥ stutyairbrahmādyairyudhi saṃsthitaiḥ // (4.2) Par.?

bādhitāstena te sarve brahmāṇaṃ prāpya vai dvijāḥ / (5.1) Par.?

vijñāpya tasmai tatsarvaṃ tena sārdhamumāpatim // (5.2) Par.?

samprāpya tuṣṭuvuḥ sarve pitāmahapurogamāḥ / (6.1) Par.?

brahmā prāpya ca deveśaṃ praṇamya bahudhā nataḥ // (6.2) Par.?

dāruṇo bhagavāndāruḥ pūrvaṃ tena vinirjitāḥ / (7.1) Par.?

nihatya dārukaṃ daityaṃ strīvadhyaṃ trātumarhasi // (7.2) Par.?

vijñaptiṃ brahmaṇaḥ śrutvā bhagavān bhaganetrahā / (8.1) Par.?

devīmuvāca deveśo girijāṃ prahasanniva // (8.2) Par.?

bhavatīṃ prārthayāmyadya hitāya jagatāṃ śubhe / (9.1) Par.?

vadhārthaṃ dārukasyāsya strīvadhyasya varānane // (9.2) Par.?

atha sā tasya vacanaṃ niśamya jagato'raṇiḥ / (10.1) Par.?

viveśa dehe devasya deveśī janmatatparā // (10.2) Par.?

ekenāṃśena deveśaṃ praviṣṭā devasattamam / (11.1) Par.?

na viveda tadā brahmā devāścendrapurogamāḥ // (11.2) Par.?

girijāṃ pūrvavacchaṃbhordṛṣṭvā pārśvasthitāṃ śubhām / (12.1) Par.?

māyayā mohitastasyāḥ sarvajño'pi caturmukhaḥ // (12.2) Par.?

sā praviṣṭā tanuṃ tasya devadevasya pārvatī / (13.1) Par.?

kaṇṭhasthena viṣeṇāsya tanuṃ cakre tadātmanaḥ // (13.2) Par.?

tāṃ ca jñātvā tathābhūtāṃ tṛtīyenekṣaṇena vai / (14.1) Par.?

sasarja kālīṃ kāmāriḥ kālakaṇṭhīṃ kapardinīm // (14.2) Par.?

jātā yadā kālimakālakaṇṭhī jātā tadānīṃ vipulā jayaśrīḥ / (15.1) Par.?

devetarāṇāmajayastvasiddhyā tuṣṭirbhavānyāḥ parameśvarasya // (15.2) Par.?

jātāṃ tadānīṃ surasiddhasaṃghā dṛṣṭvā bhayād dudruvur agnikalpām / (16.1) Par.?

kālīṃ garālaṃkṛtakālakaṇṭhīm upendrapadmodbhavaśakramukhyāḥ // (16.2) Par.?

tathaiva jātaṃ nayanaṃ lalāṭe sitāṃśulekhā ca śirasyudagrā / (17.1) Par.?

kaṇṭhe karālaṃ niśitaṃ triśūlaṃ kare karālaṃ ca vibhūṣaṇāni // (17.2) Par.?

sārdhaṃ divyāṃbarā devyāḥ sarvābharaṇabhūṣitāḥ / (18.1) Par.?

siddhendrasiddhāś ca tathā piśācā jajñire punaḥ // (18.2) Par.?

ājñayā dārukaṃ tasyāḥ pārvatyāḥ parameśvarī / (19.1) Par.?

dānavaṃ sūdayāmāsa sūdayantaṃ surādhipān // (19.2) Par.?

saṃraṃbhātiprasaṃgād vai tasyāḥ sarvamidaṃ jagat / (20.1) Par.?

krodhāgninā ca viprendrāḥ saṃbabhūva tadāturam // (20.2) Par.?

bhavo'pi bālarūpeṇa śmaśāne pretasaṃkule / (21.1) Par.?

ruroda māyayā tasyāḥ krodhāgniṃ pātum īśvaraḥ // (21.2) Par.?

taṃ dṛṣṭvā bālamīśānaṃ māyayā tasya mohitā / (22.1) Par.?

utthāpyāghrāya vakṣojaṃ stanaṃ sā pradadau dvijāḥ // (22.2) Par.?

stanajena tadā sārdhaṃ kopamasyāḥ papau punaḥ / (23.1) Par.?

krodhenānena vai bālaḥ kṣetrāṇāṃ rakṣako 'bhavat // (23.2) Par.?

mūrtayo 'ṣṭau ca tasyāpi kṣetrapālasya dhīmataḥ / (24.1) Par.?

evaṃ vai tena bālena kṛtā sā krodhamūrchitā // (24.2) Par.?

kṛtamasyāḥ prasādārthaṃ devadevena tāṇḍavam / (25.1) Par.?

saṃdhyāyāṃ sarvabhūtendraiḥ pretaiḥ prītena śūlinā // (25.2) Par.?

pītvā nṛtyāmṛtaṃ śaṃbhor ākaṇṭhaṃ parameśvarī / (26.1) Par.?

nanarta sā ca yoginyaḥ pretasthāne yathāsukham // (26.2) Par.?

tatra sabrahmakā devāḥ sendropendrāḥ samantataḥ / (27.1) Par.?

praṇemustuṣṭuvuḥ kālīṃ punardevīṃ ca pārvatīm // (27.2) Par.?

evaṃ saṃkṣepataḥ proktaṃ tāṇḍavaṃ śūlinaḥ prabhoḥ / (28.1) Par.?

yogānandena ca vibhostāṇḍavaṃ ceti cāpare // (28.2) Par.?

iti śrīliṅgamahāpurāṇe pūrvabhāge śivatāṇḍavakathanaṃ nāma ṣaḍadhikaśatatamo 'dhyāyaḥ // (29.1) Par.?