Texts

athātaḥ śoṇitavarṇanīyam adhyāyaṃ vyākhyāsyāmaḥ // (1.1) Par.?

yathovāca bhagavān dhanvantariḥ // (2.1) Par.?

tatra pāñcabhautikasya caturvidhasya ṣaḍrasasya dvividhavīryasyāṣṭavidhavīryasya vānekaguṇasyopayuktasyāhārasya samyakpariṇatasya yastejobhūtaḥ sāraḥ paramasūkṣmaḥ sa rasa ity ucyate tasya ca hṛdayaṃ sthānaṃ sa hṛdayāc caturviṃśatidhamanīr anupraviśyordhvagā daśa daśa cādhogāminyaś catasraś ca tiryaggāḥ kṛtsnaṃ śarīramaharahastarpayati vardhayati dhārayati yāpayati cādṛṣṭahetukena karmaṇā / (3.1) Par.?

tasya śarīram anusarato 'numānād gatir upalakṣayitavyā kṣayavṛddhivaikṛtaiḥ / (3.2) Par.?

tasmin sarvaśarīrāvayavadoṣadhātumalāśayānusāriṇi rase jijñāsā kimayaṃ saumyastaijasa iti / (3.3) Par.?

atrocyate sa khalu dravānusārī snehanajīvanatarpaṇadhāraṇādibhir viśeṣaiḥ saumya ityavagamyate // (3.4) Par.?

sa khalvāpyo raso yakṛtplīhānau prāpya rāgam upaiti // (4.1) Par.?

bhavataś cātra / (5.1) Par.?

rañjitās tejasā tv āpaḥ śarīrasthena dehinām / (5.2) Par.?

avyāpannāḥ prasannena raktamityabhidhīyate // (5.3) Par.?

rasādeva striyā raktaṃ rajaḥsaṃjñaṃ pravartate / (6.1) Par.?

tad varṣād dvādaśād ūrdhvaṃ yāti pañcāśataḥ kṣayam // (6.2) Par.?

ārtavaṃ śoṇitaṃ tv āgneyam agnīṣomīyatvād garbhasya // (7.1) Par.?

pāñcabhautikaṃ tv apare jīvaraktamāhurācāryāḥ // (8.1) Par.?

visratā dravatā rāgaḥ spandanaṃ laghutā tathā / (9.1) Par.?

bhūmyādīnāṃ guṇā hy ete dṛśyante cātra śoṇite // (9.2) Par.?

rasādraktaṃ tato māṃsaṃ māṃsānmedaḥ prajāyate / (10.1) Par.?

medaso 'sthi tato majjā majjñaḥ śukraṃ tu jāyate // (10.2) Par.?

tatraiṣāṃ dhātūnām annapānarasaḥ prīṇayitā // (11.1) Par.?

rasajaṃ puruṣaṃ vidyād rasaṃ rakṣetprayatnataḥ / (12.1) Par.?

annāt pānāc ca matimān ācārāccāpyatandritaḥ // (12.2) Par.?

tatra rasagatau dhātuḥ aharahar gacchatītyato rasaḥ // (13.1) Par.?

sa khalu trīṇi trīṇi kalāsahasrāṇi pañcadaśa ca kalā ekaikasmin dhātāv avatiṣṭhate evaṃ māsena rasaḥ śukrībhavati strīṇāṃ cārtavam // (14.1) Par.?

bhavati cātra / (15.1) Par.?

aṣṭādaśasahasrāṇi saṃkhyā hy asmin samuccaye / (15.2) Par.?

kalānāṃ navatiḥ proktā svatantraparatantrayoḥ // (15.3) Par.?

sa śabdārcirjalasaṃtānavad aṇunā viśeṣeṇānudhāvatyevaṃ śarīraṃ kevalam // (16.1) Par.?

vājīkaraṇyastvoṣadhayaḥ svabalaguṇotkarṣādvirecanavadupayuktāḥ śukraṃ virecayanti // (17.1) Par.?

yathāhi puṣpamukulastho gandho na śakyamihāstīti vaktumatho naiva nāstīti atha cāsti satāṃ bhāvānāmabhivyaktiriti jñātvā kevalaṃ saukṣmyānnābhivyajyate sa eva puṣpe vivṛtapattrakesare kālāntareṇābhivyaktiṃ gacchati evaṃ bālānām api vayaḥpariṇāmācchukraprādurbhāvo bhavati romarājyādayaś ca viśeṣā nārīṇām // (18.1) Par.?

sa evānnaraso vṛddhānāṃ jarāparipakvaśarīratvād aprīṇano bhavati // (19.1) Par.?

ta ete śarīradhāraṇād dhātava ity ucyante // (20.1) Par.?

teṣāṃ kṣayavṛddhī śoṇitanimitte tasmāt tadadhikṛtya vakṣyāmaḥ / (21.1) Par.?

tatra phenilam aruṇaṃ kṛṣṇaṃ paruṣaṃ tanu śīghragam askandi ca vātena duṣṭaṃ nīlaṃ pītaṃ haritaṃ śyāvaṃ visramaniṣṭaṃ pipīlikāmakṣikāṇāmaskandi ca pittaduṣṭaṃ gairikodakapratīkāśaṃ snigdhaṃ śītalaṃ bahalaṃ picchilaṃ cirasrāvi māṃsapeśīprabhaṃ ca śleṣmaduṣṭaṃ sarvalakṣaṇasaṃyuktaṃ kāñjikābhaṃ viśeṣato durgandhi ca saṃnipātaduṣṭaṃ dvidoṣaliṅgaṃ saṃsṛṣṭam // (21.2) Par.?

indragopakapratīkāśamasaṃhatamavivarṇaṃ ca prakṛtisthaṃ jānīyāt // (22.1) Par.?

visrāvyāṇyanyatra vakṣyāmaḥ // (23.1) Par.?

athāvisrāvyāḥ sarvāṅgaśophaḥ kṣīṇasya cāmlabhojananimittaḥ pāṇḍurogyarśasodariśoṣigarbhiṇīnāṃ ca śvayathavaḥ // (24.1) Par.?

tatra śastravisrāvaṇaṃ dvividhaṃ pracchānaṃ sirāvyadhanaṃ ca // (25.1) Par.?

tatra ṛjvasaṃkīrṇaṃ sūkṣmaṃ samam anavagāḍham anuttānamāśu ca śastraṃ pātayenmarmasirāsnāyusaṃdhīnāṃ cānupaghāti // (26.1) Par.?

tatra durdine durviddhe śītavātayor asvinne bhuktamātre skandatvācchoṇitaṃ na sravatyalpaṃ vā sravati // (27.1) Par.?

madamūrchāśramārtānāṃ vātaviṇmūtrasaṃginām / (28.1) Par.?

nidrābhibhūtabhītānāṃ nṛṇāṃ nāsṛk pravartate // (28.2) Par.?

tadduṣṭaṃ śoṇitam anirhriyamāṇaṃ kaṇḍūśopharāgadāhapākavedanā janayet // (29.1) Par.?

atyuṣṇe 'tisvinne 'tividdhe 'jñair visrāvitam atipravartate tad atipravṛttaṃ śiro'bhitāpam āndhyam adhimanthatimiraprādurbhāvaṃ dhātukṣayamākṣepakaṃ pakṣāghātam ekāṅgavikāraṃ tṛṣṇādāhau hikkāṃ kāsaṃ śvāsaṃ pāṇḍurogaṃ maraṇaṃ cāpādayati // (30.1) Par.?

bhavanti cātra / (31.1) Par.?

tasmānna śīte nātyuṣṇe nāsvinne nātitāpite / (31.2) Par.?

yavāgūṃ pratipītasya śoṇitaṃ mokṣayedbhiṣak // (31.3) Par.?

samyaggatvā yadā raktaṃ svayamevāvatiṣṭhate / (32.1) Par.?

śuddhaṃ tadā vijānīyāt samyagvisrāvitaṃ ca tat // (32.2) Par.?

lāghavaṃ vedanāśāntirvyādhervegaparikṣayaḥ / (33.1) Par.?

samyagvisrāvite liṅgaṃ prasādo manasastathā // (33.2) Par.?

tvagdoṣā granthayaḥ śophā rogāḥ śoṇitajāśca ye / (34.1) Par.?

raktamokṣaṇaśīlānāṃ na bhavanti kadācana // (34.2) Par.?

atha khalvapravartamāne rakte elāśītaśivakuṣṭhatagarapāṭhābhadradāruviḍaṅgacitrakatrikaṭukāgāradhūmaharidrārkāṅkuranaktamālaphalair yathālābhaṃ tribhiścaturbhiḥ samastair vā cūrṇīkṛtair lavaṇatailapragāḍhair vraṇamukham avagharṣayed evaṃ samyak pravartate // (35.1) Par.?

athātipravṛtte rodhramadhukapriyaṅgupattaṅgagairikasarjarasarasāñjanaśālmalīpuṣpaśaṅkhaśuktimāṣayavagodhūmacūrṇaiḥ śanaiḥ śanair vraṇamukham avacūrṇyāṅgulyagreṇāvapīḍayet sālasarjārjunārimedameṣaśṛṅgadhavadhanvanatvagbhir vā cūrṇitābhiḥ kṣaumeṇa vā dhmāpitena samudraphenalākṣācūrṇair vā yathoktair vraṇabandhanadravyair gāḍhaṃ badhnīyāt śītācchādanabhojanāgāraiḥ śītaiḥ pariṣekapradehaiścopācaret kṣārenāgninā vā dahedyathoktaṃ vyadhanād anantaraṃ vā tāmevātipravṛttāṃ sirāṃ vidhyet kākolyādikvāthaṃ vā śarkarāmadhumadhuraṃ pāyayet eṇahariṇorabhraśaśamahiṣavarāhāṇāṃ vā rudhiraṃ kṣīrayūṣarasaiḥ susnigdhaiścāśnīyāt upadravāṃś ca yathāsvam upacaret // (36.1) Par.?

dhātukṣayāt srute rakte mandaḥ saṃjāyate 'nalaḥ / (37.1) Par.?

pavanaś ca paraṃ lopaṃ yāti tasmāt prayatnataḥ // (37.2) Par.?

taṃ nātiśītair laghubhiḥ snigdhaiḥ śoṇitavardhanaiḥ / (38.1) Par.?

īṣadamlair anamlair vā bhojanaiḥ samupācaret // (38.2) Par.?

caturvidhaṃ yadetaddhi rudhirasya nivāraṇam / (39.1) Par.?

saṃdhānaṃ skandanaṃ caiva pācanaṃ dahanaṃ tathā // (39.2) Par.?

vraṇaṃ kaṣāyaḥ saṃdhatte raktaṃ skandayate himam / (40.1) Par.?

tathā saṃpācayedbhasma dāhaḥ saṃkocayet sirāḥ // (40.2) Par.?

askandamāne rudhire saṃdhānāni prayojayet / (41.1) Par.?

saṃdhāne bhraśyamāne tu pācanaiḥ samupācaret // (41.2) Par.?

kalpair etaistribhir vaidyaḥ prayateta yathāvidhi / (42.1) Par.?

asiddhimatsu caiteṣu dāhaḥ parama iṣyate // (42.2) Par.?

śeṣadoṣe yato rakte na vyādhirativartate / (43.1) Par.?

sāvaśeṣe tataḥ stheyaṃ na tu kuryādatikramam // (43.2) Par.?

dehasya rudhiraṃ mūlaṃ rudhireṇaiva dhāryate / (44.1) Par.?

tasmād yatnena saṃrakṣyaṃ raktaṃ jīva iti sthitiḥ // (44.2) Par.?

srutaraktasya sekādyaiḥ śītaiḥ prakupite 'nile / (45.1) Par.?

śophaṃ satodaṃ koṣṇena sarpiṣā pariṣecayet // (45.2) Par.?