Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 17555

Click on a sentence to show its analysis
Keep the mouse pointer over a lemma to show its meanings.

tataḥ sa ratnaprabhayā samaṃ tadvāsaveśmani / (1.1) Par.?

sthito 'nyedyuḥ kathāḥ kurvaṃstāstāḥ sa sacivaiḥ saha // (1.2) Par.?

naravāhanadatto 'tra mandiraprāṅgaṇe bahiḥ / (2.1) Par.?

akasmātpuruṣasyeva śuśrāvākranditadhvanim // (2.2) Par.?

kim evam iti kasmiṃścit pṛcchaty āgatya ceṭikāḥ / (3.1) Par.?

abruvan kañcukī krandaty eṣa dharmagiriḥ prabho // (3.2) Par.?

ihāgatya hi mūrkheṇa mittreṇa kathito 'dhunā / (4.1) Par.?

tīrthayātrāgato 'muṣya bhrātā deśāntare mṛtaḥ // (4.2) Par.?

tena rājakulastho 'smīty asmarañ śokamohitaḥ / (5.1) Par.?

sākrandaḥ san gṛhaṃ nītaḥ saṃpraty eṣa bahir janaiḥ // (5.2) Par.?

tac chrutvā yuvarāje 'smiñ jātaduḥkhe 'nukampayā / (6.1) Par.?

rājñī ratnaprabhā tatra viṣaṇṇeva jagāda sā // (6.2) Par.?

priyabandhuviyogotthamaho duḥkhaṃ durutsaham / (7.1) Par.?

kaṣṭaṃ kiṃ na kṛto dhātrā jano 'yamajarāmaraḥ // (7.2) Par.?

iti rājñīvacaḥ śrutvā marubhūtiruvāca tām / (8.1) Par.?

martyeṣvetatkuto devi tathā hīmāṃ kathāṃ śṛṇu // (8.2) Par.?

cirāyurnāmni nagare cirāyurnāma bhūpatiḥ / (9.1) Par.?

pūrvaṃ cirāyur evāsīt ketanaṃ sarvasaṃpadām // (9.2) Par.?

tasya nāgārjuno nāma bodhisattvāṃśasaṃbhavaḥ / (10.1) Par.?

dayālurdānaśīlaś ca mantrī vijñānavānabhūt // (10.2) Par.?

yaḥ sarvauṣadhiyuktijñaścakre siddharasāyanaḥ / (11.1) Par.?

ātmānaṃ taṃ ca rājānaṃ vijaraṃ cirajīvitam // (11.2) Par.?

kadācinmantriṇas tasya bālaḥ pañcatvamāyayau / (12.1) Par.?

nāgārjunasya putreṣu sarveṣu dayitaḥ sutaḥ // (12.2) Par.?

sa tena dṛṣṭasaṃtāpo martyānāṃ mṛtyuśāntaye / (13.1) Par.?

amṛtaṃ saṃdadhe dravyaistapodānaprabhāvataḥ // (13.2) Par.?

śeṣauṣadhasya tvekasya kālayogaṃ sa melane / (14.1) Par.?

yāvatpratīkṣate tāvadindreṇa tad abudhyata // (14.2) Par.?

indraḥ samāmantrya surair aśvināv evam ādiśat / (15.1) Par.?

gatvā nāgārjunaṃ brūtam idaṃ madvacanād bhuvi // (15.2) Par.?

ko 'yaṃ kartum ihārabdho mantriṇāpy anayas tvayā / (16.1) Par.?

kiṃ tvaṃ prajāpatiṃ jetum udyato bata sāṃpratam // (16.2) Par.?

martyā maraṇadharmāṇas tena ye kila nirmitāḥ / (17.1) Par.?

sādhayitvāmṛtaṃ yat tān amarān kartum icchasi // (17.2) Par.?

evaṃ kṛte viśeṣo hi kaḥ syād devamanuṣyayoḥ / (18.1) Par.?

yaṣṭavyayājakābhāvād bhajyate ca jagatsthitiḥ // (18.2) Par.?

tad asmadvacanād etat saṃharāmṛtasādhanam / (19.1) Par.?

anyathā kupitā devāḥ śāpaṃ dāsyanti te dhruvam // (19.2) Par.?

yacchokādeṣa yatnaste sa svarge tvatsutaḥ sthitaḥ / (20.1) Par.?

iti saṃdiśya śakrastau prajighāyāśvināvubhau // (20.2) Par.?

tau cāgatya gṛhītārghau tadāgamanatoṣiṇe / (21.1) Par.?

ūcatuḥ śakrasaṃdeśaṃ tasmai nāgārjunāya tam // (21.2) Par.?

putraṃ jagadatuścāsya divi devaiḥ samaṃ sthitam / (22.1) Par.?

tato nāgārjunaḥ so 'tra viṣaṇṇaḥ sannacintayat // (22.2) Par.?

na karomīndravākyaṃ ced devās tat tāvad āsatām / (23.1) Par.?

imāveva na kiṃ śāpamaśvinau me prayacchataḥ // (23.2) Par.?

tadetadāstām amṛtaṃ na siddho me manorathaḥ / (24.1) Par.?

putraś ca me prāksukṛtair aśocyāṃ sa gato gatim // (24.2) Par.?

ity ālocyāśvinau devau so 'tra nāgārjuno 'bravīt / (25.1) Par.?

anuṣṭhitā mayendrājñā saṃharāmyamṛtakriyām // (25.2) Par.?

pañcāhenāmṛte siddhe kṛtaivaiṣājarāmarā / (26.1) Par.?

mayābhaviṣyatpṛthivī yuvāṃ cennāgamiṣyatam // (26.2) Par.?

ity uktvā tatsamakṣaṃ tattadvākyān nicakhāna saḥ / (27.1) Par.?

dharaṇyāmamṛtaṃ siddhaprāyaṃ nāgārjunastadā // (27.2) Par.?

tato 'śvinau tam āpṛcchya gatvā śakrāya taddivi / (28.1) Par.?

ācakhyatuḥ kṛtaṃ kāryaṃ nanandātha ca devarāṭ // (28.2) Par.?

tāvac cātra cirāyuḥ sa rājā nāgārjunaprabhuḥ / (29.1) Par.?

putraṃ jīvaharaṃ nāma yauvarājye 'bhiṣiktavān // (29.2) Par.?

abhiṣiktaṃ ca taṃ mātā praṇāmārtham upāgatam / (30.1) Par.?

rājñī dhanaparā nāma hṛṣṭaṃ dṛṣṭvābravīt sutam // (30.2) Par.?

yauvarājyamidaṃ prāpya putra hṛṣyasi kiṃ mṛṣā / (31.1) Par.?

rājyaprāptyai kramo hy eṣa tapasā ca na vidyate // (31.2) Par.?

yuvarājā hi bahavo gatāḥ putrāḥ pitustava / (32.1) Par.?

na rājyaṃ kenacitprāptaṃ prāptaṃ sarvair viḍambanam // (32.2) Par.?

nāgārjunena dattaṃ hi tadrājñe 'smai rasāyanam / (33.1) Par.?

vayo varṣaśataṃ yena prāptamasyedamaṣṭamam // (33.2) Par.?

ko jānāti kiyantyanyānyapi prāpsyanti ca kramāt / (34.1) Par.?

yuvarājānnṛpasyāsya kurvato 'lpāyuṣaḥ sutān // (34.2) Par.?

etac chrutvā viṣaṇṇaṃ taṃ putraṃ sā punarabravīt / (35.1) Par.?

yadi rājyena te kṛtyaṃ tadupāyamimaṃ kuru // (35.2) Par.?

eṣa nāgārjuno mantrī pratyahaṃ vihitāhnikaḥ / (36.1) Par.?

āhārasamaye dātā karotyudghoṣaṇāmimām // (36.2) Par.?

ko 'rthī prārthayate kaḥ kiṃ tasmai kiṃ dīyatāmiti / (37.1) Par.?

svaśiro me prayaccheti tatkālaṃ brūhi gaccha tam // (37.2) Par.?

satyavāci tatas tasmiṃśchinnamūrdhni mṛte nṛpaḥ / (38.1) Par.?

tacchokātpañcatāṃ yāyādvanaṃ vaiṣa samāśrayet // (38.2) Par.?

tataḥ prāpsyasi rājyaṃ tvamupāyo 'nyo 'tra nāsti te / (39.1) Par.?

iti māturvacaḥ śrutvā rājaputrastutoṣa saḥ // (39.2) Par.?

tatheti tadvidhātuṃ ca cakāraiva sa niścayam / (40.1) Par.?

kaṣṭo hi bāndhavasnehaṃ rājyalobho 'tivartate // (40.2) Par.?

atha rājasuto 'nyedyuḥ svairaṃ jīvaharo yayau / (41.1) Par.?

tasya bhojanavelāyāṃ gṛhaṃ nāgārjunasya saḥ // (41.2) Par.?

kaḥ kiṃ yācata ityādi tadā tatra ca mantriṇam / (42.1) Par.?

vadantaṃ taṃ praviśyaiva sa mūrdhānamayācata // (42.2) Par.?

āścaryaṃ vatsa śirasā kiṃ karoṣi mamāmunā / (43.1) Par.?

māṃsāsthikeśasaṃgho hi kvopayujyata eṣa te // (43.2) Par.?

tathāpyarthastavānena yadi chittvā gṛhāṇa tat / (44.1) Par.?

ity uktvopānayattasmai sa ca mantrī śirodharām // (44.2) Par.?

rasāyanadṛḍhāyāṃ ca tasyāṃ praharataściram / (45.1) Par.?

rājasūnoryayuḥ khaḍgā bahavas tasya khaṇḍaśaḥ // (45.2) Par.?

tāvadbuddhvaitadāyāntaṃ rājānaṃ taṃ cirāyuṣam / (46.1) Par.?

vārayantaṃ śirodānātso 'tra nāgārjuno 'bravīt // (46.2) Par.?

jātismaro 'haṃ nṛpate navatiṃ ca navādhikām / (47.1) Par.?

janmāni svaśiro dattaṃ mayā janmani janmani // (47.2) Par.?

idaṃ śatatamaṃ janma śirodānāya me prabho / (48.1) Par.?

tanmā sma vocaḥ kiṃcittvaṃ vimukho 'rthī na yāti me // (48.2) Par.?

tadidānīṃ dadāmy asmai tvatputrāya nijaṃ śiraḥ / (49.1) Par.?

tvanmukhālokanāyaiṣa vilambo hi kṛto mayā // (49.2) Par.?

ityuktvāśliṣya taṃ bhūpaṃ cūrṇamānāyya koṣataḥ / (50.1) Par.?

alipad rājaputrasya kṛpāṇaṃ tena tasya saḥ // (50.2) Par.?

tatkṛpāṇaprahāreṇa so 'tha tasya nṛpātmajaḥ / (51.1) Par.?

nāgārjunasya cicheda śiro nālādivāmbujam // (51.2) Par.?

athotthite mahākrande prāṇatyāgonmukhe nṛpe / (52.1) Par.?

ity uccacāra gaganādaśarīrātra bhāratī // (52.2) Par.?

akāryaṃ mā kṛthā rājann aśocyo hy eṣa te sakhā / (53.1) Par.?

nāgārjuno 'punarjanmā gato buddhasamāṃ gatim // (53.2) Par.?

etac chrutvā sa virataścirāyurmaraṇānnṛpaḥ / (54.1) Par.?

dattadānaḥ śucā tyaktarājyo vanamaśiśriyat // (54.2) Par.?

tatra kālena tapasā sa prāpa paramāṃ gatim / (55.1) Par.?

tatputro 'py adhitasthau tadrājyaṃ jīvaharo 'tra saḥ // (55.2) Par.?

prāptarājyaś ca nacirādrāṣṭrabhedaṃ vidhāya saḥ / (56.1) Par.?

hato nāgārjunasutaiḥ smaradbhistadvadhaṃ pituḥ // (56.2) Par.?

tacchokād atha tanmātus tasyā hṛdayamasphuṭat / (57.1) Par.?

anāryajuṣṭena pathā pravṛttānāṃ śivaṃ kutaḥ // (57.2) Par.?

rājye ca rājñyām anyasyāṃ jātas tasya cirāyuṣaḥ / (58.1) Par.?

śatāyur nāma putras tair mantrimukhyair nyaveśyata // (58.2) Par.?

evaṃ nāgārjunārabdhaṃ martyānāṃ mṛtyunāśanam / (59.1) Par.?

na soḍhuṃ daivatairyāvatso 'pi mṛtyuvaśaṃ gataḥ // (59.2) Par.?

tasmādvidhātṛvihito 'yamanitya eva durvāraduḥkhabahulo nanu jīvalokaḥ / (60.1) Par.?

śakyaṃ na kartum api yatnaśatais tadatra kenāpi kiṃcid api necchati yadvidhātā // (60.2) Par.?

ityākhyāya kathāṃ kila virate marubhūtike samaṃ sacivaiḥ / (61.1) Par.?

naravāhanadatto nijamutthāya cakāra divasakartavyam // (61.2) Par.?

Duration=0.34341788291931 secs.