Texts

Help

Select a text:
Bibliography

Select a chapter:
(no revisions)
Show parallels Show headlines
Use dependency labeler

Chapter id: 3708

Click on a sentence to show its analysis
Keep the mouse pointer over a lemma to show its meanings.

athātaḥ kriyākalpaṃ vyākhyāsyāmaḥ // (1) Par.?

yathovāca bhagavān dhanvantariḥ // (2) Par.?

sarvaśāstrārthatattvajñastapodṛṣṭirudāradhīḥ / (3.1) Par.?

vaiśvāmitraṃ śaśāsātha śiṣyaṃ kāśipatirmuniḥ // (3.2) Par.?

tarpaṇaṃ puṭapākaśca seka āścyotanāñjane / (4.1) Par.?

tatra tatropadiṣṭāni teṣāṃ vyāsaṃ nibodha me // (4.2) Par.?

saṃśuddhadehaśiraso jīrṇānnasya śubhe dine / (5.1) Par.?

pūrvāhṇe vāparāhṇe vā kāryam akṣṇos tu tarpaṇam // (5.2) Par.?

vātātaparajohīne veśmanyuttānaśāyinaḥ / (6.1) Par.?

ādhārau māṣacūrṇena klinnena parimaṇḍalau // (6.2) Par.?

samau dṛḍhāvasaṃbādhau kartavyau netrakośayoḥ / (7.1) Par.?

pūrayedghṛtamaṇḍasya vilīnasya sukhodake // (7.2) Par.?

ā pakṣmāgrāttataḥ sthāpyaṃ pañca tadvākśatāni tu / (8.1) Par.?

svasthe kaphe ṣaṭ pitte 'ṣṭau daśa vāte taduttamam // (8.2) Par.?

rogasthānaviśeṣeṇa kecit kālaṃ pracakṣate / (9.1) Par.?

yathākramopadiṣṭeṣu trīṇyekaṃ pañca sapta ca // (9.2) Par.?

daśa dṛṣṭyāmathāṣṭau ca vākśatāni vibhāvayet / (10.1) Par.?

tataścāpāṅgataḥ snehaṃ srāvayitvākṣi śodhayet // (10.2) Par.?

svinnena yavapiṣṭena snehavīryeritaṃ tataḥ / (11.1) Par.?

yathāsvaṃ dhūmapānena kaphamasya viśodhayet // (11.2) Par.?

ekāhaṃ vā tryahaṃ vāpi pañcāhaṃ ceṣyate param / (12.1) Par.?

tarpaṇe tṛptiliṅgāni netrasyemāni lakṣayet // (12.2) Par.?

sukhasvapnāvabodhatvaṃ vaiśadyaṃ varṇapāṭavam / (13.1) Par.?

nirvṛtirvyādhividhvaṃsaḥ kriyālāghavam eva ca // (13.2) Par.?

gurvāvilam atisnigdham aśrukaṇḍūpadehavat / (14.1) Par.?

jñeyaṃ doṣasamutkliṣṭaṃ netramatyarthatarpitam // (14.2) Par.?

rūkṣamāvilamasrāḍhyamasahaṃ rūpadarśane / (15.1) Par.?

vyādhivṛddhiśca tajjñeyaṃ hīnatarpitamakṣi ca // (15.2) Par.?

anayor doṣabāhulyāt prayateta cikitsite / (16.1) Par.?

dhūmanasyāñjanaiḥ sekai rūkṣaiḥ snigdhaiśca yogavit // (16.2) Par.?

tāmyatyativiśuṣkaṃ yadrūkṣaṃ yaccātidāruṇam / (17.1) Par.?

śīrṇapakṣmāvilaṃ jihmaṃ rogakliṣṭaṃ ca yadbhṛśam // (17.2) Par.?

tadakṣi tarpaṇādeva labhetorjāmasaṃśayam / (18.1) Par.?

durdinātyuṣṇaśīteṣu cintāyāsabhrameṣu ca // (18.2) Par.?

aśāntopadrave cākṣṇi tarpaṇaṃ na praśasyate / (19.1) Par.?

puṭapākastathaiteṣu nasyaṃ yeṣu ca garhitam // (19.2) Par.?

tarpaṇārhā na ye proktāḥ snehapānākṣamāśca ye / (20.1) Par.?

tataḥ praśāntadoṣeṣu puṭapākakṣameṣu ca // (20.2) Par.?

puṭapākaḥ prayoktavyo netreṣu bhiṣajā bhavet / (21.1) Par.?

snehano lekhanīyaśca ropaṇīyaśca sa tridhā // (21.2) Par.?

hitaḥ snigdho 'tirūkṣasya snigdhasyāpi ca lekhanaḥ / (22.1) Par.?

dṛṣṭerbalārthamaparaḥ pittāsṛgvraṇavātanut // (22.2) Par.?

snehamāṃsavasāmajjamedaḥsvādvauṣadhaiḥ kṛtaḥ / (23.1) Par.?

snehataḥ puṭapākastu dhāryo dve vākśate tu saḥ // (23.2) Par.?

jāṅgalānāṃ yakṛnmāṃsair lekhanadravyasaṃbhṛtaiḥ / (24.1) Par.?

kṛṣṇaloharajastāmraśaṅkhavidrumasindhujaiḥ // (24.2) Par.?

samudraphenakāsīsasrotojadadhimastubhiḥ / (25.1) Par.?

lekhano vākśataṃ tasya paraṃ dhāraṇam ucyate // (25.2) Par.?

stanyajāṅgalamadhvājyatiktadravyavipācitaḥ / (26.1) Par.?

lekhanāttriguṇaṃ dhāryaḥ puṭapākastu ropaṇaḥ // (26.2) Par.?

vitarettarpaṇoktaṃ tu dhūmaṃ hitvā tu ropaṇam / (27.1) Par.?

snehasvedau dvayoḥ kāryau kāryo naiva ca ropaṇe // (27.2) Par.?

ekāhaṃ vā dvyahaṃ vāpi tryahaṃ vāpyavacāraṇam / (28.1) Par.?

yantraṇā tu kriyākālāddviguṇaṃ kālamiṣyate // (28.2) Par.?

tejāṃsyanilamākāśamādarśaṃ bhāsvarāṇi ca / (29.1) Par.?

nekṣeta tarpite netre puṭapākakṛte tathā // (29.2) Par.?

mithyopacārādanayor yo vyādhirupajāyate / (30.1) Par.?

añjanāścyotanasvedair yathāsvaṃ tamupācaret // (30.2) Par.?

prasannavarṇaṃ viśadaṃ vātātapasahaṃ laghu / (31.1) Par.?

sukhasvapnāvabodhyakṣi puṭapākaguṇānvitam // (31.2) Par.?

atiyogādrujaḥ śophaḥ piḍakāstimirodgamaḥ / (32.1) Par.?

pāko 'śru harṣaṇaṃ cāpi hīne doṣodgamastathā // (32.2) Par.?

ata ūrdhvaṃ pravakṣyāmi puṭapākaprasādhanam / (33.1) Par.?

dvau bilvamātrau ślakṣṇasya piṇḍau māṃsasya peṣitau // (33.2) Par.?

dravyāṇāṃ bilvamātraṃ tu dravāṇāṃ kuḍavo mataḥ / (34.1) Par.?

tadaikadhyaṃ samāloḍya patraiḥ supariveṣṭitam // (34.2) Par.?

kāśmarīkumudairaṇḍapadminīkadalībhavaiḥ / (35.1) Par.?

mṛdāvaliptamaṅgāraiḥ khādirair avakūlayet // (35.2) Par.?

katakāśmantakairaṇḍapāṭalāvṛṣabādaraiḥ / (36.1) Par.?

sakṣīradrumakāṣṭhair vā gomayair vāpi yuktitaḥ // (36.2) Par.?

svinnamuddhṛtya niṣpīḍya rasamādāya taṃ nṛṇām / (37.1) Par.?

tarpaṇoktena vidhinā yathāvadavacārayet // (37.2) Par.?

kanīnake niṣecyaḥ syānnityam uttānaśāyinaḥ / (38.1) Par.?

rakte pitte ca tau śītau koṣṇau vātakaphāpahau // (38.2) Par.?

atyuṣṇatīkṣṇau satataṃ dāhapākakarau smṛtau / (39.1) Par.?

aplutau śītalau cāśrustambharuggharṣakārakau // (39.2) Par.?

atimātrau kaṣāyatvasaṃkocasphuraṇāvahau / (40.1) Par.?

hīnapramāṇau doṣāṇāmutkleśajananau bhṛśam // (40.2) Par.?

yuktau kṛtau dāhaśopharuggharṣasrāvanāśanau / (41.1) Par.?

kaṇḍūpadehadūṣīkāraktarājivināśanaḥ // (41.2) Par.?

tasmāt pariharan doṣān vidadhyāttau sukhāvahau / (42.1) Par.?

vyāpadaśca yathādoṣaṃ nasyadhūmāñjanair jayet // (42.2) Par.?

ādyantayoścāpyanayoḥ sveda uṣṇāmbucailikaḥ / (43.1) Par.?

tathā hito 'vasāne ca dhūmaḥ śleṣmasamucchritaḥ // (43.2) Par.?

yathādoṣopayuktaṃ tu nātiprabalamojasā / (44.1) Par.?

rogamāścyotanaṃ hanti sekastu balavattaram // (44.2) Par.?

tau tridhaivopayujyete rogeṣu puṭapākavat / (45.1) Par.?

lekhane sapta cāṣṭau vā bindavaḥ snaihike daśa // (45.2) Par.?

āścyotane prayoktavyā dvādaśaiva tu ropaṇe / (46.1) Par.?

sekasya dviguṇaḥ kālaḥ puṭapākāt paro mataḥ // (46.2) Par.?

athavā kāryanirvṛtterupayogo yathākramam / (47.1) Par.?

pūrvāparāhṇe madhyāhne rujākāleṣu cobhayoḥ // (47.2) Par.?

yogāyogāt snehaseke tarpaṇoktān pracakṣate / (48.1) Par.?

rogāñchirasi sambhūtān hatvātiprabalān guṇān // (48.2) Par.?

karoti śiraso bastiruktā ye mūrdhatailikāḥ / (49.1) Par.?

śuddhadehasya sāyāhne yathāvyādhyaśitasya tu // (49.2) Par.?

ṛjvāsīnasya badhnīyādbastikośaṃ tato dṛḍham / (50.1) Par.?

yathāvyādhiśṛtasnehapūrṇaṃ saṃyamya dhārayet // (50.2) Par.?

tarpaṇoktaṃ daśaguṇaṃ yathādoṣaṃ vidhānavit / (51.1) Par.?

vyaktarūpeṣu doṣeṣu śuddhakāyasya kevale // (51.2) Par.?

netra eva sthite doṣe prāptamañjanamācaret / (52.1) Par.?

lekhanaṃ ropaṇaṃ cāpi prasādanamathāpi vā // (52.2) Par.?

tatra pañca rasān vyastānādyaikarasavarjitān / (53.1) Par.?

pañcadhā lekhanaṃ yuñjyādyathādoṣamatandritaḥ // (53.2) Par.?

netravartmasirākośasrotaḥśṛṅgāṭakāśritam / (54.1) Par.?

mukhanāsākṣibhir doṣamojasā srāvayettu tat // (54.2) Par.?

kaṣāyaṃ tiktakaṃ vāpi sasnehaṃ ropaṇaṃ matam / (55.1) Par.?

tatsnehaśaityādvarṇyaṃ syāddṛṣṭeśca balavardhanam // (55.2) Par.?

madhuraṃ snehasampannam añjanaṃ tu prasādanam / (56.1) Par.?

dṛṣṭidoṣaprasādārthaṃ snehanārthaṃ ca taddhitam // (56.2) Par.?

yathādoṣaṃ prayojyāni tāni rogaviśāradaiḥ / (57.1) Par.?

añjanāni yathoktāni prāhṇasāyāhnarātriṣu // (57.2) Par.?

guṭikārasacūrṇāni trividhānyañjanāni tu / (58.1) Par.?

yathāpūrvaṃ balaṃ teṣāṃ śreṣṭhamāhurmanīṣiṇaḥ // (58.2) Par.?

hareṇumātrā vartiḥ syāllekhanasya pramāṇataḥ / (59.1) Par.?

prasādanasya cādhyardhā dviguṇā ropaṇasya ca // (59.2) Par.?

rasāñjanasya mātrā tu yathāvartimitā matā / (60.1) Par.?

dvitricatuḥśalākāśca cūrṇasyāpyanupūrvaśaḥ // (60.2) Par.?

teṣāṃ tulyaguṇānyeva vidadhyādbhājanānyapi / (61.1) Par.?

sauvarṇaṃ rājataṃ śārṅgaṃ tāmraṃ vaidūryakāṃsyajam // (61.2) Par.?

āyasāni ca yojyāni śalākāśca yathākramam / (62.1) Par.?

vaktrayor mukulākārā kalāyaparimaṇḍalā // (62.2) Par.?

aṣṭāṅgulā tanurmadhye sukṛtā sādhunigrahā / (63.1) Par.?

audumbaryaśmajā vāpi śārīrī vā hitā bhavet // (63.2) Par.?

vāmenākṣi vinirbhujya hastena susamāhitaḥ / (64.1) Par.?

śalākayā dakṣiṇena kṣipet kānīnamañjanam // (64.2) Par.?

āpāṅgyaṃ vā yathāyogaṃ kuryāccāpi gatāgatam / (65.1) Par.?

vartmopalepi vā yattadaṅgulyaiva prayojayet // (65.2) Par.?

akṣi nātyantayor añjyād bādhamāno 'pi vā bhiṣak / (66.1) Par.?

na cānirvāntadoṣe 'kṣṇi dhāvanaṃ saṃprayojayet // (66.2) Par.?

doṣaḥ pratinivṛttaḥ san hanyād dṛṣṭerbalaṃ tathā / (67.1) Par.?

gatadoṣamapetāśru paśyedyat samyagambhasā // (67.2) Par.?

prakṣālyākṣi yathādoṣaṃ kāryaṃ pratyañjanaṃ tataḥ / (68.1) Par.?

śramodāvartaruditamadyakrodhabhayajvaraiḥ // (68.2) Par.?

vegāghātaśirodoṣaiścārtānāṃ neṣyate 'ñjanam / (69.1) Par.?

rāgaruktimirāsrāvaśūlasaṃrambhasaṃbhavāt // (69.2) Par.?

nidrākṣaye kriyāśaktiṃ pravāte dṛgbalakṣayam / (70.1) Par.?

rajodhūmahate rāgasrāvādhīmanthasaṃbhavam // (70.2) Par.?

saṃrambhaśūlau nasyānte śiroruji śirorujam / (71.1) Par.?

śiraḥsnāte 'tiśīte ca ravāvanudite 'pi ca // (71.2) Par.?

doṣasthairyādapārthaṃ syāddoṣotkleśaṃ karoti ca / (72.1) Par.?

ajīrṇe 'pyevam eva syāt srotomārgāvarodhanāt // (72.2) Par.?

doṣavegodaye dattaṃ kuryāttāṃstānupadravān / (73.1) Par.?

tasmāt pariharan doṣānañjanaṃ sādhu yojayet // (73.2) Par.?

lekhanasya viśeṣeṇa kāla eṣa prakīrtitaḥ / (74.1) Par.?

vyāpadaśca jayedetāḥ sekāścyotanalepanaiḥ // (74.2) Par.?

yathāsvaṃ dhūmakavalair nasyaiścāpi samutthitāḥ / (75.1) Par.?

viśadaṃ laghvanāsrāvi kriyāpaṭu sunirmalam // (75.2) Par.?

saṃśāntopadravaṃ netraṃ viriktaṃ samyagādiśet / (76.1) Par.?

jihmaṃ dāruṇadurvarṇaṃ srastaṃ rūkṣamatīva ca // (76.2) Par.?

netraṃ virekātiyoge syandate cātimātraśaḥ / (77.1) Par.?

tatra saṃtarpaṇaṃ kāryaṃ vidhānaṃ cānilāpaham // (77.2) Par.?

akṣi mandaviriktaṃ syādudagrataradoṣavat / (78.1) Par.?

dhūmanasyāñjanaistatra hitaṃ doṣāvasecanam // (78.2) Par.?

snehavarṇabalopetaṃ prasannaṃ doṣavarjitam / (79.1) Par.?

jñeyaṃ prasādane samyagupayukte 'kṣi nirvṛtam // (79.2) Par.?

kiṃciddhīnavikāraṃ syāttarpaṇāddhi kṛtādati / (80.1) Par.?

tatra doṣaharaṃ rūkṣaṃ bheṣajaṃ śasyate mṛdu // (80.2) Par.?

sādhāraṇam api jñeyamevaṃ ropaṇalakṣaṇam / (81.1) Par.?

prasādanavadācaṣṭe tasmin yukte 'tibheṣajam // (81.2) Par.?

snehanaṃ ropaṇaṃ vāpi hīnayuktamapārthakam / (82.1) Par.?

kartavyaṃ mātrayā tasmād añjanaṃ siddhimicchatā // (82.2) Par.?

puṭapākakriyādyāsu kriyāsveṣaiva kalpanā / (83.1) Par.?

sahasraśaścāñjaneṣu bījenoktena pūjitāḥ // (83.2) Par.?

dṛṣṭerbalavivṛddhyarthaṃ yāpyarogakṣayāya ca / (84.1) Par.?

rājārhānyañjanāgryāṇi nibodhemānyataḥ param // (84.2) Par.?

aṣṭau bhāgānañjanasya nīlotpalasamatviṣaḥ / (85.1) Par.?

audumbaraṃ śātakumbhaṃ rājataṃ ca samāsataḥ // (85.2) Par.?

ekādaśaitān bhāgāṃstu yojayet kuśalo bhiṣak / (86.1) Par.?

mūṣākṣiptaṃ tadādhmātamāvṛtaṃ jātavedasi // (86.2) Par.?

khadirāśmantakāṅgārair gośakṛdbhirathāpi vā / (87.1) Par.?

gavāṃ śakṛdrase mūtre dadhni sarpiṣi mākṣike // (87.2) Par.?

tailamadyavasāmajjasarvagandhodakeṣu ca / (88.1) Par.?

drākṣārasekṣutriphalāraseṣu suhimeṣu ca // (88.2) Par.?

sārivādikaṣāye ca kaṣāye cotpalādike / (89.1) Par.?

niṣecayet pṛthak cainaṃ dhmātaṃ dhmātaṃ punaḥ punaḥ // (89.2) Par.?

tato 'ntarīkṣe saptāhaṃ plotabaddhaṃ sthitaṃ jale / (90.1) Par.?

viśoṣya cūrṇayenmuktāṃ sphaṭikaṃ vidrumaṃ tathā // (90.2) Par.?

kālānusārivāṃ cāpi śucirāvāpya yogataḥ / (91.1) Par.?

etaccūrṇāñjanaṃ śreṣṭhaṃ nihitaṃ bhājane śubhe // (91.2) Par.?

dantasphaṭikavaidūryaśaṅkhaśailāsanodbhave / (92.1) Par.?

śātakumbhe 'tha śārṅge vā rājate vā susaṃskṛte / (92.2) Par.?

sahasrapākavat pūjāṃ kṛtvā rājñaḥ prayojayet // (92.3) Par.?

tenāñjitākṣo nṛpatirbhavet sarvajanapriyaḥ / (93.1) Par.?

adhṛṣyaḥ sarvabhūtānāṃ dṛṣṭirogavivarjitaḥ // (93.2) Par.?

kuṣṭhaṃ candanamelāśca patraṃ madhukamañjanam / (94.1) Par.?

meṣaśṛṅgasya puṣpāṇi vakraṃ ratnāni sapta ca // (94.2) Par.?

utpalasya bṛhatyośca padmasyāpi ca keśaram / (95.1) Par.?

nāgapuṣpamuśīrāṇi pippalī tutthamuttamam // (95.2) Par.?

kukkuṭāṇḍakapālāni dārvīṃ pathyāṃ sarocanām / (96.1) Par.?

maricānyakṣamajjānaṃ tulyāṃ ca gṛhagopikām // (96.2) Par.?

kṛtvā sūkṣmaṃ tataścūrṇaṃ nyasedabhyarcya pūrvavat / (97.1) Par.?

etadbhadrodayaṃ nāma sadaivārhati bhūmipaḥ // (97.2) Par.?

vakraṃ samaricaṃ caiva māṃsīṃ śaileyam eva ca / (98.1) Par.?

tulyāṃśāni samānaistaiḥ samagraiśca manaḥśilā // (98.2) Par.?

patrasya bhāgāścatvāro dviguṇaṃ sarvato 'ñjanam / (99.1) Par.?

tāvacca yaṣṭīmadhukaṃ pūrvavaccaitadañjanam // (99.2) Par.?

manaḥśilāṃ devakāṣṭhaṃ rajanyau triphaloṣaṇam / (100.1) Par.?

lākṣālaśunamañjiṣṭhāsaindhavailāḥ samākṣikāḥ // (100.2) Par.?

rodhraṃ sāvarakaṃ cūrṇamāyasaṃ tāmram eva ca / (101.1) Par.?

kālānusārivāṃ caiva kukkuṭāṇḍadalāni ca // (101.2) Par.?

tulyāni payasā piṣṭvā guṭikāṃ kārayedbudhaḥ / (102.1) Par.?

kaṇḍūtimiraśuklārmaraktarājyupaśāntaye // (102.2) Par.?

kāṃsyāpamārjanamasī madhukaṃ saindhavaṃ tathā / (103.1) Par.?

eraṇḍamūlaṃ ca samaṃ bṛhatyaṃśadvayānvitam // (103.2) Par.?

ājena payasā piṣṭvā tāmrapātraṃ pralepayet / (104.1) Par.?

saptakṛtvastu tā vartyaśchāyāśuṣkā rujāpahāḥ // (104.2) Par.?

pathyātutthakayaṣṭyāhvaistulyair maricaṣoḍaśā / (105.1) Par.?

pathyā sarvavikāreṣu vartiḥ śītāmbupeṣitā // (105.2) Par.?

rasakriyāvidhānena yathoktavidhikovidaḥ / (106.1) Par.?

piṇḍāñjanāni kurvīta yathāyogamatandritaḥ // (106.2) Par.?

Duration=0.40627288818359 secs.