Texts

śrīmārkaṇḍeya uvāca / (1.1) Par.?

tato gacchettu rājendra badaryāśramamuttamam / (1.2) Par.?

sarvatīrthavaraṃ puṇyaṃ kathitaṃ śaṃbhunā purā // (1.3) Par.?

yaścaiṣa bhāratasyārthe tatra siddhaḥ kirīṭabhṛt / (2.1) Par.?

bhrātā te phālguno nāma viddhyenaṃ naradaivatam // (2.2) Par.?

naranārāyaṇau dvau tāvāgatau narmadātaṭe / (3.1) Par.?

jñānaṃ tasyaiva yo rājanbhaktimānvai janārdane // (3.2) Par.?

samaṃ paśyati sarveṣu sthāvareṣu careṣu ca / (4.1) Par.?

brāhmaṇaṃ śvapacaṃ caiva tatra prīto janārdanaḥ // (4.2) Par.?

aikātmyaṃ paśya kaunteya mayi cātmani nāntaram / (5.1) Par.?

naranārāyaṇābhyāṃ hi kṛtaṃ badarikāśramam // (5.2) Par.?

sthāpitaḥ śaṅkarastatra lokānugrahakāraṇāt / (6.1) Par.?

trimūrtisthāpitaṃ liṅgaṃ svargamārgānumuktidam // (6.2) Par.?

tatra gatvā śucirbhūtvā hyekarātropavāsakṛt / (7.1) Par.?

rajastamas tathā tyaktvā sāttvikaṃ bhāvamāśrayet // (7.2) Par.?

rātrau jāgaraṇaṃ kṛtvā madhumāsāṣṭamīdine / (8.1) Par.?

athavā ca caturdaśyām ubhau pakṣau ca kārayet // (8.2) Par.?

āśvinasya viśeṣeṇa kathitaṃ tava pāṇḍava / (9.1) Par.?

snāpayet parayā bhaktyā kṣīreṇa madhunā saha // (9.2) Par.?

dadhnā śarkarayā yuktaṃ ghṛtena samalaṃkṛtam / (10.1) Par.?

pañcāmṛtam idaṃ puṇyaṃ snāpayed vṛṣabhadhvajam // (10.2) Par.?

snāpyamānaṃ śivaṃ bhaktyā vīkṣate yo vimatsaraḥ / (11.1) Par.?

tasya vāsaḥ śivopānte śakraloke na saṃśayaḥ // (11.2) Par.?

śāṭhyenāpi namaskāraḥ prayuktaḥ śūlapāṇine / (12.1) Par.?

saṃsāramūlabaddhānāmudveṣṭanakaro hi yaḥ // (12.2) Par.?

tenādhītaṃ śrutaṃ tena tena sarvamanuṣṭhitam / (13.1) Par.?

yenauṃ namaḥ śivāyeti mantrābhyāsaḥ sthirīkṛtaḥ // (13.2) Par.?

yaḥ punaḥ snāpayed bhaktyā ekabhakto jitendriyaḥ / (14.1) Par.?

tasyāpi yatphalaṃ pārtha vakṣye talleśatastava // (14.2) Par.?

pīḍito vṛddhabhāvena tava bhaktyā vadāmyaham / (15.1) Par.?

te yānti paramaṃ sthānaṃ bhittvā bhāskaramaṇḍalam // (15.2) Par.?

saṃsāre sarvasaukhyānāṃ nilayāste bhavanti ca / (16.1) Par.?

āścaryaṃ jñātivargāṇāṃ dharmāṇāṃ nilayāstu te // (16.2) Par.?

sampannāḥ sarvakāmaiste pṛthivyāṃ pṛthivīpate / (17.1) Par.?

śrāddhaṃ tatraiva yaḥ kuryānnarmadodakamiśritam // (17.2) Par.?

yogyaiśca brāhmaṇair rājankulīnairvedapāragaiḥ / (18.1) Par.?

surūpaiśca suśīlaiśca svadāranirataiḥ śubhaiḥ // (18.2) Par.?

āryadeśaprasūtaiśca ślakṣṇaiścaiva surūpibhiḥ / (19.1) Par.?

kārayetpiṇḍadānaṃ vai bhāskare kutapasthite // (19.2) Par.?

pitṝṇāṃ paramaṃ lokaṃ yadīccheddharmanandana / (20.1) Par.?

varjayettānprayatnena kāṇānduṣṭāṃśca dāmbhikān // (20.2) Par.?

tasmātsarvaprayatnena yogyaṃ vipraṃ samāśrayet / (21.1) Par.?

narakānmocayetpretānkumbhīpākapurogamān // (21.2) Par.?

mokṣo bhavati sarveṣāṃ pitṝṇāṃ nṛpanandana / (22.1) Par.?

viprebhyaḥ kāñcanaṃ dadyātprīyatāṃ me pitāmahaḥ // (22.2) Par.?

annaṃ ca dāpayettatra bhaktyā vastraṃ ca bhārata / (23.1) Par.?

gāṃ vṛṣaṃ medinīṃ dadyācchatraṃ śastaṃ nṛpottama // (23.2) Par.?

sa pumānsvargamāpnoti ityevaṃ śaṅkaro 'bravīt / (24.1) Par.?

prāṇatyāgaṃ tu yaḥ kuryācchikhinā salilena vā // (24.2) Par.?

anāśakena vā bhūyaḥ sa gacchecchivamandiram / (25.1) Par.?

naranārāyaṇītīre devadroṇyāṃ ca yo nṛpa // (25.2) Par.?

sa vasedīśvarasyāgre yāvad indrāścaturdaśa / (26.1) Par.?

punaḥ svargāccyutaḥ so 'pi rājā bhavati vīryavān // (26.2) Par.?

sarvaiśvaryaguṇairyuktaḥ prajāpālanatatparaḥ / (27.1) Par.?

tataḥ smarati tattīrthaṃ punarevāgamiṣyati // (27.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe nārāyaṇītīrthamāhātmyavarṇanaṃ nāma pañcanavatitamo 'dhyāyaḥ // (28.1) Par.?