Texts

śrīmārkaṇḍeya uvāca / (1.1) Par.?

tato gacchettu rājendra gaṅgāvāhakamuttamam / (1.2) Par.?

narmadāyāṃ mahāpuṇyaṃ bhṛgutīrthasamīpataḥ // (1.3) Par.?

tatra gaṅgā mahāpuṇyā cacāra vipulaṃ tapaḥ / (2.1) Par.?

purā varṣaśataṃ sāgraṃ paramaṃ vratamāsthitā // (2.2) Par.?

dhyātvā devaṃ jagadyoniṃ nārāyaṇamakalmaṣam / (3.1) Par.?

ātmānaṃ paramaṃ dhāma saritsā jagatīpate // (3.2) Par.?

tato janārdano deva āgatyedamuvāca ha // (4.1) Par.?

viṣṇuruvāca / (5.1) Par.?

tapasā tava tuṣṭo 'haṃ matpādāmbujasambhave / (5.2) Par.?

mattaḥ kimicchase devi brūhi kiṃ karavāṇi te // (5.3) Par.?

gaṅgovāca / (6.1) Par.?

tvatpādakamalādbhraṣṭā gaṅgā sahacarā vibho / (6.2) Par.?

yadṛcchayā trilokeśa vandyamānā divaukasaiḥ // (6.3) Par.?

nṛpo bhagīrathas tasmāt tapaḥ kṛtvā suduṣkaram / (7.1) Par.?

samārādhya jagannāthaṃ śaṅkaraṃ lokaśaṅkaram // (7.2) Par.?

avatārayāmāsa hi māṃ pṛthivyāṃ dharaṇīdhara / (8.1) Par.?

mayā vai yuvayor vākyādavatāraḥ kṛto bhuvi // (8.2) Par.?

vaiṣṇavīmiti māṃ matvā janaḥ sarvāpluto mayi / (9.1) Par.?

ye vai brahmaṇo loke ye ca vai gurutalpagāḥ // (9.2) Par.?

tyāginaḥ pitṛmātṛbhyāṃ ye ca svarṇaharā narāḥ / (10.1) Par.?

goghnā ye manujā loke tathā ye prāṇihiṃsakāḥ // (10.2) Par.?

agamyāgāmino ye ca hyabhakṣyasya ca bhakṣakāḥ / (11.1) Par.?

ye cānṛtapravaktāro ye ca viśvāsaghātakāḥ // (11.2) Par.?

devabrāhmaṇavittānāṃ hartāro ye narādhamāḥ / (12.1) Par.?

devabrahmagurustrīṇāṃ ye ca nindākarā narāḥ // (12.2) Par.?

brahmaśāpapradagdhā ye ye caivātmahano dvijāḥ / (13.1) Par.?

bhraṣṭānaśanasaṃnyāsaniyatavratacāriṇaḥ // (13.2) Par.?

tathaivāpeyapeyāśca ye ca svagurunindakāḥ / (14.1) Par.?

niṣedhakā ye dānānāṃ pātradānaparāṅmukhāḥ // (14.2) Par.?

ṛtughnā ye svapatnīnāṃ pitroḥ sehaparā na hi / (15.1) Par.?

bāndhaveṣu ca dīneṣu karuṇā yasya nāsti vai // (15.2) Par.?

kṣetrasetuvibhedī ca pūrvamārgapralopakaḥ / (16.1) Par.?

nāstikaḥ śāstrahīnastu vipraḥ sandhyāvivarjitaḥ // (16.2) Par.?

ahutāśī hyasaṃtuṣṭaḥ sarvāśī sarvavikrayī / (17.1) Par.?

kadaryā nāstikāḥ krūrāḥ kṛtaghnā ye dvijāyaḥ // (17.2) Par.?

paiśunyā rasavikreyāḥ sarvakālavinākṛtāḥ / (18.1) Par.?

svagotrāṃ paragotrāṃ vā ye bhuñjanti dvijādhamāḥ // (18.2) Par.?

te māṃ prāpya vimucyante pāpasaṅghaiḥ susaṃcitaiḥ / (19.1) Par.?

tatpāpakṣārataptāyā na śarma mama vidyate // (19.2) Par.?

tathā kuru jagannātha yathāhaṃ śarma cāpnuyām / (20.1) Par.?

evamuktastu deveśastuṣṭaḥ provāca jāhnavīm // (20.2) Par.?

viṣṇuruvāca / (21.1) Par.?

ahamatra vasiṣyāmi gaṅgādharasahāyavān / (21.2) Par.?

praviśasva sadā revāṃ tvamatraiva ca mūrtinā // (21.3) Par.?

mama pādatalaṃ prāpya vaha tripathagāmini / (22.1) Par.?

yadā bahūdakakāle narmadājalasaṃbhṛtā // (22.2) Par.?

prāvṛṭkālaṃ samāsādya bhaviṣyati jalākulā / (23.1) Par.?

plāvyobhayataṭaṃ devī prāpya māmuttarasthitam // (23.2) Par.?

plāvayiṣyati toyena yadā śaṅkhaṃ kare sthitam / (24.1) Par.?

tadā parvaśatodyuktaṃ vaiṣṇavaṃ parvasaṃjñitam // (24.2) Par.?

na tena sadṛśaṃ kiṃcidvyatīpātādisaṃkramam / (25.1) Par.?

ayane dve ca na tathā puṇyātpuṇyataraṃ yathā // (25.2) Par.?

tasminparvaṇi deveśi śaṅkhaṃ saṃspṛśya mānavaḥ / (26.1) Par.?

snānamācarate toye miśre gāṅgeyanārmade // (26.2) Par.?

puṇyaṃ tvaśeṣapuṇyānāṃ maṅgalānāṃ ca maṅgalam / (27.1) Par.?

viṣṇunā vidhṛto yena tasmācchāntiḥ pracakrame // (27.2) Par.?

tatrāntaṃ pāpasaṅghasya dhruvamāpnoti mānavaḥ / (28.1) Par.?

śaṅkhoddhāre naraḥ snātvā tarpayet pitṛdevatāḥ // (28.2) Par.?

tṛptāste dvādaśābdāni siddhiṃ ca sārvakāmikīm / (29.1) Par.?

gaṅgāvahe tu yaḥ śrāddhaṃ śaṅkhoddhāre pradāsyati // (29.2) Par.?

tena piṇḍapradānena nṛtyanti pitarastathā / (30.1) Par.?

śaṅkhoddhāre naraḥ snātvā pūjayed balakeśavau // (30.2) Par.?

rātrau jāgaraṇaṃ kṛtvā śuddho bhavati jāhnavi / (31.1) Par.?

yattvaṃ lokakṛtaṃ karma manyase bhuvi duḥsaham // (31.2) Par.?

tasminparvaṇi tatsarvaṃ tatra snātvā vyapohaya / (32.1) Par.?

evamuktvā naraśreṣṭha viṣṇuścāntaradhīyata // (32.2) Par.?

tadāprabhṛti tattīrthaṃ gaṅgāvāhakamuttamam / (33.1) Par.?

brahmādyairṛṣibhistāta pāramparyakramāgataiḥ // (33.2) Par.?

tatra tīrthe tu yaḥ snātvā bhaktibhāvena bhārata / (34.1) Par.?

gaṅgātīrthe tu sa snātaḥ samasteṣu na saṃśayaḥ // (34.2) Par.?

tatra tīrthe mṛtānāṃ tu narāṇāṃ bhāvitātmanām / (35.1) Par.?

anivartikā gatisteṣāṃ viṣṇulokātkadācana // (35.2) Par.?

iti śrīskānde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe revākhaṇḍe gaṅgāvahakatīrthamāhātmyavarṇanaṃ nāmāṣṭasaptatyuttaraśatatamo 'dhyāyaḥ // (36.1) Par.?